قصة الطالب فوزي

قصة الطالب فوزي

الحلقة 1
ﻳﻮﻡ ﺍﻟﺴﺒﺖ ﺑﺎﻟﻌﺸﻴﺔ " ﻻﻓﺎﻙ " ﻛﺎﺗﻜﻮﻥ ﺧﺎﻭﻳﺔ ﻭﻣﺎﻛﺎﻳﻦ ﻣﺎﻳﺪﺍﺭ ﻓﻴﻬﺎ، ﺣﺘﻰ ﺃﻧﺎ ﺑﺮﺍﺳﻲ ﻣﺎﻋﺮﻓﺘﺶ ﺃﺵ ﺟﺎﺑﻨﻲ ﻟﻴﻬﺎ، ﻛﻨﺖ ﺯﻋﻤﺎ ﻧﺎﻭﻱ ﻧﺠﻲ ﻧﺤﻀﺮ ﻭﺍﺣﺪ ﺍﻟﻤﺤﺎﺿﺮﺓ ﻭﻧﺪﻳﺮ ﻓﻮﻃﻮﻛﻮﺑﻲ ﻟﺸﻲ ﺩﺭﻭﺱ ﻓﺎﺗﻮﻧﻲ، ﺳﺎﻋﺎ ﺍﻷﺳﺘﺎﺫ ﻣﺎﺟﺎﺵ ﻭﺣﺘﻰ ﻣﻦ ﺍﻟﻤﻜﺘﺒﺔ ﻣﺴﺪﻭﺩﺓ . ﻗﻠﺖ ﻣﻊ ﺭﺍﺳﻲ ﺟﻴﺖ ﺳﺎﻋﺎ ﺟﻴﺖ ﻧﻤﺸﻲ ﻧﺪﺧﻞ ﺷﻲ ﻣﺪﺭﺝ ﻧﺮﺍﺟﻊ ﺷﻮﻳﺔ ﺧﺼﻮﺻﺎ ﻭﺃﻥ ﻓﺘﺮﺓ ﺍﻹﻣﺘﺤﺎﻧﺎﺕ ﻣﺎﺑﻘﺎ ﻟﻴﻬﺎ ﻭﺍﻟﻮ ﺑﺎﺵ ﺗﺒﺪﺍ .
ﺩﺧﻠﺖ ﺍﻟﻤﺪﺭﺝ ﺭﻗﻢ 3 ﻭﺟﻠﺴﺖ ﻓﻲ ﺍﻟﻘﺪﺍﻡ ﺣﺪﺍ ﺍﻟﺒﺎﺏ ﺑﺎﺵ ﺍﻟﻠﻲ ﺩﺧﻞ ﻭﺍﻟﻠﻲ ﺧﺮﺝ ﻧﺸﻮﻓﻮ . ﺟﺒﺪﺕ ﺷﻲ ﺩﺭﻭﺱ ﻭﺑﺪﻳﺖ ﻛﺎﻧﺮﺍﺟﻊ ﻓﻴﻬﻮﻡ ﻭﻟﻜﻦ ﻣﺎﻗﺪﺭﺗﺶ ﻧﺮﺍﺟﻊ ﻋﻠﻰ ﺧﺎﻃﺮﻱ، ﺣﻴﺖ ﻛﻮﻟﺸﻲ ﺍﻟﻄﻠﺒﺔ ﺍﻟﻠﻲ ﻛﺎﻧﻮﺍ ﻓﻲ ﺫﺍﻙ ﺍﻟﻤﺪﺭﺝ ﻛﺎﻳﻬﻀﺮﻭ ﻭﻛﺎﻳﻀﺤﻜﻮ ﻣﻊ ﺑﻌﻀﻴﺎﺗﻬﻮﻡ ﻭﻛﺎﻳﺪﻳﺮﻭ ﻟﻴﺎ ﺍﻟﻀﺠﻴﺞ ﻓﺮﺍﺳﻲ، ﻭﺃﻧﺎ ﻛﺎﻧﺒﻐﻲ " ﺍﻟﻜﺎﻟﻢ " ﻭﺍﻟﻬﺪﻭﺀ ﺑﺎﺵ ﻧﻘﺪﺭ ﻧﺮﺍﺟﻊ .
ﻫﺰﻳﺖ ﺍﻟﺒﻮﺭﻃﺎﺑﻞ ﻭﻃﻠﻴﺖ ﻋﻠﻰ ﺍﻟﻔﺎﻳﺴﺒﻮﻙ ﺑﺎﻧﺖ ﻟﻴﺎ ﻭﺍﺣﺪ ﺍﻟﺒﻨﺖ " ﺃﻭﻧﻼﻳﻦ " ﻭﺑﺪﻳﺖ ﻛﺎﻧﻬﻀﺮ ﻣﻌﺎﻫﺎ ﻭﺍﺧﺎ ﻣﺎﻋﻨﺪﻳﺶ ﻣﻌﺎﻫﺎ ﺑﺰﺍﻑ ﻟﻜﻦ ﺑﻐﻴﺖ ﻏﻴﺮ ﻧﺪﻭﺯ ﺑﻴﻬﺎ ﺍﻟﻮﻗﺖ ﻗﺒﻞ ﻣﺎﻧﺮﺟﻊ ﻟﻠﺪﺍﺭ . ﺍﻟﻮﻗﺖ ﻛﺎﻳﺪﻭﺯ ﺛﻘﻴﻞ ﻭﺑﺪﻳﺖ ﻛﺎﻧﺸﻌﺮ ﺑﺎﻟﻤﻠﻞ، ﻭﺣﺘﻰ ﺍﻟﺪﺭﺍﺭﻱ ﺻﺤﺎﺑﻲ ﺣﺘﻰ ﺣﺪ ﻓﻴﻬﻮﻡ ﻣﺎ ﺑﺎﻥ ﻫﺎﺫ ﺍﻟﻌﺸﻴﺔ، ﺟﻤﻌﺖ ﺃﻭﺭﺍﻗﻲ ﻭﺣﻄﻴﺘﻬﻢ ﻓﻲ ﺍﻟﻤﻠﻒ ﻭﺑﻐﻴﺖ ﻧﺨﺮﺝ ﻣﻦ ﺍﻟﺒﺎﺏ، ﻟﻜﻦ ﻓﻲ ﻧﻔﺲ ﺍﻟﻠﺤﻈﺔ ﻭﺍﺣﺪ ﺍﻟﺒﻨﺖ ﺟﺎﻳﺔ ﻣﻦ ﺍﻟﺠﻨﺐ ﺣﺘﻰ ﻫﻲ ﺑﻐﺎﺕ ﺗﺨﺮﺝ، ﻭﺍﻟﺒﺎﺏ ﺻﻐﻴﺮ ﻣﺎﻳﻘﺪﺭﺵ ﻳﺪﻭﺯ ﺟﻮﺝ ﺩﻳﺎﻝ ﺍﻟﻨﺎﺱ ﻓﻲ ﺩﻗﺔ ﻭﺣﺪﺓ، ﻭﻗﻔﺖ ﻭﺧﻠﻴﺘﻬﺎ ﻫﻲ ﺍﻟﻠﻲ ﺩﻭﺯ ﺍﻷﻭﻝ ﺑﺤﺎﻝ ﺫﺍﻛﺸﻲ ﺩﻳﺎﻝ ﺍﻷﻓﻼﻡ ﺍﻷﻣﺮﻳﻜﻴﺔ . ﺷﺎﻓﺖ ﻓﻴﺎ ﺷﻮﻓﺔ ﺧﺠﻮﻟﺔ ﻭﺗﺒﺴﻤﺖ ﻭﻟﻜﻦ ﻓﻲ ﻧﻔﺲ ﺍﻟﻮﻗﺖ ﻋﺠﺒﻬﺎ ﺍﻟﺤﺎﻝ ﻭﻗﺎﻟﺖ ﻟﻴﺎ " ﻣﻴﺮﺳﻲ " ﻭﺣﺘﻰ ﺃﻧﺎ ﻋﺠﺒﻨﻲ ﺭﺍﺳﻲ ﻷﻧﻨﻲ ﻭﻟﻴﺖ ﻟﻠﺤﻈﺎﺕ " ﺟﻨﺘﻞ ﻣﺎﻥ ".
ﻋﺠﺒﺘﻨﻲ ﺭﻳﺤﺔ " ﻛﻮﻛﻮ ﺷﺎﻧﻴﻞ " ﺍﻟﻠﻲ ﺷﻤﻴﺘﻬﺎ ﻓﻴﻬﺎ ﻓﺎﺵ ﺩﺍﺯﺕ ﻣﻦ ﺣﺪﺍﻳﺎ، ﺑﺤﺎﻟﻬﺎ ﺷﺮﻳﺘﻬﺎ ﻟﺠﻴﻬﺎﻥ ﺍﻟﻠﻲ ﻛﻨﺖ ﻣﺼﺎﺣﺐ ﻣﻌﺎﻫﺎ ﺑﻤﻨﺎﺳﺒﺔ ﻋﻴﺪ ﺍﻟﻤﻴﻼﺩ ﺩﻳﺎﻟﻬﺎ ﻫﺎﺫﻱ ﻋﺎﻣﻴﻦ، ﻋﻠﻰ ﺍﻷﻗﻞ ﻣﺎﺷﻲ ﺑﺤﺎﻝ ﺫﻭﻙ ﺍﻟﺮﻭﺍﻳﺢ ﺩﻳﻮﻝ 50 ﺩﺭﻫﻢ ﺍﻟﻠﻲ ﻛﺎﻳﺪﻳﺮﻭ ﺷﻲ ﺑﻨﺎﺕ، ﻣﺎﻛﺮﻫﺘﺶ ﻧﻌﻴﻂ ﻟﻴﻬﺎ ﺫﻳﻚ ﺳﺎﻋﺔ ﻭﻧﺴﻮﻟﻬﺎ ﻋﻠﻰ ﺳﻤﻴﺘﻬﺎ ﺃﻭ ﻋﻠﻰ ﺍﻷﻗﻞ ﻧﻌﺮﻑ ﻓﻴﻦ ﻛﺎﺗﻘﺮﺍ، ﻭﻣﺎﻋﺮﻓﺘﺶ ﻋﻼﺵ ﺟﺎﺗﻨﻲ ﺫﻳﻚ ﺍﻟﺮﻏﺒﺔ ﺑﺎﺵ ﻧﺘﻌﺮﻑ ﻋﻠﻴﻬﺎ، ﻭﺍﺵ ﻏﻴﺮ ﺣﻴﺖ ﺩﺍﻳﺮﺓ ﻧﻔﺲ ﺍﻟﺮﻳﺤﺔ ﺩﻳﺎﻝ ﺟﻴﻬﺎﻥ، ﺃﻭ ﻷﻧﻬﺎ ﺯﻭﻳﻨﺔ، ﻣﺎﻋﺮﻓﺘﺶ . ﻟﻜﻦ ﻓﻲ ﻧﻔﺲ ﺍﻟﻮﻗﺖ ﺃﻧﺎ ﻣﺎﺷﻲ ﻣﻦ ﺫﺍﻙ ﺍﻟﻨﻮﻉ ﺩﻳﺎﻝ ﺍﻟﺪﺭﺍﺭﻱ ﺍﻟﻠﻲ ﻛﺎﻳﻨﻘﺰﻭ ﻋﻠﻰ ﺃﻱ ﺣﺎﺟﺔ ﺗﺤﺮﻛﺖ ﻗﺪﺍﻣﻬﻮﻡ، ﻭﺣﺘﻰ ﻓﻲ ﺫﺍﻙ ﺍﻟﻤﻮﻗﻒ ﻣﺎﺟﺎﺗﺶ ﻧﻌﻴﻂ ﻋﻠﻰ ﺑﻨﺖ ﺃﻭﻝ ﻣﺮﺓ ﻛﺎﻧﺸﻮﻓﻬﺎ ﻭﻧﺴﻮﻟﻬﺎ، ﻭﺣﺘﻰ ﻫﻲ ﻣﺸﺎﺕ ﻓﻲ ﺍﻹﺗﺠﺎﻩ ﺍﻟﻤﻌﺎﻛﺲ ﺍﻟﻠﻲ ﻛﻨﺖ ﻏﺎﺩﻱ ﻟﻴﻪ ﺃﻧﺎ .
ﺩﺯﺕ ﺍﻟﻤﻜﺘﺒﺔ ﺍﻟﻠﻲ ﻛﺎﻳﻨﺔ ﻓﻲ " ﻻﻓﺎﻙ " ﻃﻠﻴﺖ ﻋﻠﻴﻬﺎ ﻟﻌﻞ ﻭﻋﺴﻰ ﺗﻜﻮﻥ ﺗﺤﻼﺕ ﻭﻟﻘﻴﺘﻬﺎ ﻣﺤﻠﻮﻟﺔ، ﺷﺮﻳﺖ ﺷﻲ ﻣﺮﺍﺟﻊ ﻣﻦ ﻋﻨﺪﻫﻮﻡ ﻭﺧﺮﺟﺖ ﻓﺤﺎﻟﻲ ﺭﺍﺟﻊ ﻟﻠﺪﺍﺭ، ﻣﺸﻴﺖ ﻣﺒﺎﺷﺮﺓ ﻟﺒﻼﻛﺔ ﺩﻳﺎﻝ ﺍﻟﻄﻮﺑﻴﺲ ﻭﻣﺎﻏﺎﺩﻳﺶ ﺗﺨﻴﻠﻮﺍ ﺷﻜﻮﻥ ﺍﻟﻠﻲ ﻟﻘﻴﺘﻮ ﻭﺍﻗﻒ ﻛﺎﻳﺘﺴﻨﺎ ﺗﻤﺎ...
ﺍﻟﺤﻠﻘﺔ 2
ﻣﺸﻴﺖ ﻣﺒﺎﺷﺮﺓ ﻟﺒﻼﻛﺔ ﺩﻳﺎﻝ ﺍﻟﻄﻮﺑﻴﺲ ﻭﻣﺎﻏﺎﺩﻳﺶ ﺗﺨﻴﻠﻮﺍ ﺷﻜﻮﻥ ﺍﻟﻠﻲ ﻟﻘﻴﺘﻮ ﻭﺍﻗﻒ ﻛﺎﻳﺘﺴﻨﺎ ﻓﻴﻬﺎ . ﺁﻩ ﻭﺍﻟﻠﻪ ﺣﺘﻰ ﻫﻲ ﻭﺍﻗﻔﺔ ﺑﻮﺣﺪﻫﺎ، ﻛﺎﻥ ﻛﺎﻳﺴﺤﺎﺑﻠﻲ ﺃﻧﻨﻲ ﻣﺎﻏﺎﺩﻳﺶ ﻧﺸﻮﻓﻬﺎ ﻣﺎﺯﺍﻝ ﺧﺼﻮﺻﺎ ﻭﺃﻥ ﻻﻓﺎﻙ ﻛﺒﻴﺮﺓ ﺑﺰﺍﻑ ﻭﺍﻟﻄﻠﺒﺔ ﺑﺎﻵﻻﻑ، ﻭﺍﻟﻠﻲ ﺷﻔﺘﻴﻪ ﺍﻟﻴﻮﻡ ﺻﻌﻴﺐ ﺗﻌﺎﻭﺩ ﺗﺸﻮﻓﻮ ﻏﺪﺍ . ﺷﺎﻓﺘﻨﻲ ﻣﻦ ﺑﻌﻴﺪ ﺟﺎﻱ ﻗﺎﻃﻊ ﺍﻟﺸﺎﻧﻄﻲ ﺟﺎﻱ ﻟﺠﻴﻬﺘﺎ، ﺩﺍﺭﺕ ﺭﺍﺳﻬﺎ ﺑﺤﺎﻻ ﻣﺎﺷﺎﻓﺘﻨﻴﺶ ﻭﺣﺘﻰ ﺃﻧﺎ ﻓﺎﺵ ﻗﺮﺑﺖ ﻟﻴﻬﺎ ﺩﻭﺭﺕ ﻭﺟﻬﻲ ﻟﻠﺠﻬﺔ ﺍﻷﺧﺮﻯ ﻭﻋﺎﻭﺗﺎﻧﻲ ﺷﻤﻴﺖ ﻋﻄﺮ " ﻛﻮﻛﻮ ﺷﺎﻧﻴﻞ " ﺍﻟﻠﻲ ﺩﺍﻳﺮﺓ، ﺗﺨﻄﻴﺘﻬﺎ ﺑﺸﻲ 3 ﺃﻣﺘﺎﺭ ﻭﻭﻗﻔﺖ ﻭﺭﺍﻫﺎ ﺗﺤﺖ ﻭﺍﺣﺪ ﺍﻟﺸﺠﺮﺓ .
ﺑﺪﻳﺖ ﻛﺎﻧﺸﻮﻑ ﻭﻧﺘﺄﻣﻞ ﻓﻴﻬﺎ ﻋﻠﻰ ﺭﺍﺣﺘﻲ ﻷﻧﻬﺎ ﻋﺎﻃﻴﺎﻧﻲ ﺑﺎﻟﻈﻬﺮ، ﻟﺒﺴﻬﺎ ﺃﻧﻴﻖ ﻭﻟﻜﻦ ﻓﻲ ﻧﻔﺲ ﺍﻟﻮﻗﺖ ﻣﺜﻴﺮ ﻭﻛﺎﻳﺒﻴﻦ ﺗﻔﺎﺻﻴﻞ ﺍﻟﺠﺴﻢ ﺩﻳﺎﻟﻬﺎ، ﺷﻌﺮﻫﺎ ﻛﺤﻞ ﻭﻻﻣﻊ ﻭﻃﻮﻳﻞ، ﺍﻟﺒﺸﺮﺓ ﺩﻳﺎﻟﻬﺎ ﺑﻴﻀﺎﺀ ﻭﻛﺎﺗﺒﺎﻥ ﻧﺎﻋﻤﺔ، ﻭﺣﺘﻰ ﻋﻨﻘﻬﺎ ﻃﻮﻳﻞ ﻭﻓﺼﺎﻟﺘﻬﺎ ﺯﻭﻳﻨﺔ ﺑﺤﺎﻝ ﺷﻲ ﻋﺎﺭﺿﺔ ﺃﺯﻳﺎﺀ، ﻭﺍﻷﻣﺮ ﺍﻟﻠﻲ ﻋﺠﺒﻨﻲ ﺃﻛﺜﺮ ﺃﻥ ﺍﻟﺸﻌﺎﺭ ﺩﻳﺎﻝ ﺭﻳﺎﻝ ﻣﺪﺭﻳﺪ ﺍﻟﻔﺮﻗﺔ ﺩﻳﺎﻟﻲ ﺍﻟﻤﻔﻀﻠﺔ ﻣﻄﺮﻭﺯ ﻓﻲ ﺍﻟﺠﻴﺐ ﺍﻟﻠﻮﺭﺍﻧﻲ ﺩﻳﺎﻝ ﺳﺮﻭﺍﻟﻬﺎ، ﻭﺩﻏﻴﺎ ﺑﺪﻳﺖ ﻛﺎﻧﺘﺨﻴﻞ ﺭﺍﺳﻲ ﺟﺎﻟﺲ ﻣﻌﺎﻫﺎ ﻛﺎﻧﺘﻔﺮﺟﻮ ﻓﺸﻲ ﻣﺎﺗﺶ ﺩﻳﺎﻝ ﺍﻟﺮﻳﺎﻝ ﻷﻥ ﺟﻤﻴﻊ ﺍﻟﺒﻨﺎﺕ ﺍﻟﻠﻲ ﻋﺮﻓﺘﻬﻮﻡ ﻣﻦ ﻗﺒﻞ ﻳﺎ ﺇﻣﺎ ﺑﺎﺭﺻﺎﻭﻳﺎﺕ ﻳﺎ ﺇﻣﺎ ﻣﺎﻋﻨﺪﻫﻮﻣﺶ ﻣﻊ ﺍﻟﻜﻮﺭﺓ . ﺷﻮﻳﺔ ﻭﺑﺪﻭﻥ ﺳﺎﺑﻖ ﺇﻧﺬﺍﺭ ﻭﻫﻲ ﺗﻐﻔﻠﻨﻲ ﻭﺗﻠﻔﺘﺎﺕ ﺑﺎﻟﺰﺭﺑﺔ ﻟﺠﻴﻬﺘﻲ ﻭﻟﻘﺎﺗﻨﻲ ﻣﻬﺒﻂ ﻋﻴﻨﻲ ﺟﻴﻬﺔ ﺍﻟﺠﺴﻢ ﺩﻳﺎﻟﻬﺎ، ﻭﺍﺧﺎ ﺃﻧﻨﻲ ﻓﺬﻳﻚ ﺍﻟﻠﺤﻈﺔ ﻛﻨﺖ ﻏﻴﺮ ﻛﺎﻧﻔﻜﺮ، ﺷﻌﺮﺕ ﺑﺎﻹﺣﺮﺍﺝ ﻣﻦ ﺫﺍﻙ ﺍﻟﻤﻮﻗﻒ ﻭﺩﻭﺭﺕ ﻭﺟﻬﻲ ﺑﺎﻟﺰﺭﺑﺔ ﻟﻠﺠﻬﺔ ﺍﻷﺧﺮﻯ، ﻭﺑﺪﻳﺖ ﻛﺎﻧﻀﺤﻚ ﻣﻦ ﻫﺎﺫ ﺍﻟﻤﻮﻗﻒ .
ﺩﺍﺯﺕ ﻣﻦ ﺑﻌﺪﻫﺎ 2 ﺩﻗﺎﺋﻖ ﺗﻘﺮﻳﺒﺎ، ﺑﺎﻥ ﻟﻴﺎ ﺍﻟﻄﻮﺑﻴﺲ ﺍﻟﻠﻲ ﻏﺎﺩﻱ ﻧﺮﻛﺐ ﻓﻴﻪ ﺟﺎﻱ ﻭﻓﺮﺣﺖ ﻷﻧﻨﻲ ﻏﺎﺩﻱ ﻧﺘﺨﻠﺺ ﻣﻦ ﻫﺎﺫ ﺍﻟﻤﻮﻗﻒ ﺍﻟﻤﺤﺮﺝ، ﻭﻟﻜﻦ ﺍﻷﻣﺮ ﺍﻟﻐﺮﻳﺐ ﺃﻧﻬﺎ ﺣﺘﻰ ﻫﻲ ﻓﺎﺵ ﺑﺎﻥ ﻟﻴﻬﺎ ﺍﻟﻄﻮﺑﻴﺲ ﻣﺸﺎﺕ ﺑﻐﺎﺕ ﺗﺮﻛﺐ ﻓﻴﻪ . ﻫﺎﺫ ﺍﻟﺒﻼﻛﺔ ﻛﺎﻳﻮﻗﻔﻮ ﻓﻴﻬﺎ 8 ﺩﻳﺎﻝ ﺍﻟﺨﻄﻮﻁ ﻣﺨﺘﻠﻔﺔ، ﻭﻣﺎﺑﺎﻥ ﻟﻴﻬﺎ ﺗﺮﻛﺐ ﻏﻴﺮ ﻓﻲ ﺍﻟﺨﻂ ﺍﻟﻠﻲ ﻏﺎﺩﻱ ﻧﺮﻛﺐ ﻓﻴﻪ ﺃﻧﺎ . ﻃﻠﻌﺎﺕ ﻫﻲ ﺍﻷﻭﻟﻰ ﺍﻟﻄﻮﺑﻴﺲ ﻭﻣﺸﺎﺕ ﺟﻠﺴﺖ ﺑﻮﺣﺪﻫﺎ، ﻭﺃﻧﺎ ﻓﺎﺵ ﺧﻠﺼﺖ ﺍﻟﻮﺭﻗﺔ ﺩﻳﺎﻟﻲ ﺑﺪﻳﺖ ﻛﺎﻧﻘﻠﺐ ﻓﻴﻦ ﻧﺠﻠﺲ . ﺍﻟﺒﻼﺻﺔ ﺍﻟﻮﺣﻴﺪﺓ ﺍﻟﺨﺎﻭﻳﺔ ﻓﺬﺍﻙ ﺍﻟﻄﻮﺑﻴﺲ ﻛﺎﻣﻠﻮ ﻫﻲ ﺍﻟﻠﻲ ﺣﺪﺍﻫﺎ، ﺷﻔﺖ ﻓﻴﻬﺎ ﻟﻘﻴﺘﻬﺎ ﺣﺘﻰ ﻫﻲ ﻛﺎﺗﺸﻮﻑ ﻓﻴﺎ، ﻭﻗﻠﺖ ﻣﻊ ﺭﺍﺳﻲ ﻫﺎﺫﻱ ﻫﻲ ﺍﻟﻔﺮﺻﺔ ﺍﻟﻤﻨﺎﺳﺒﺔ ﺑﺎﺵ ﻧﻬﻀﺮ ﻣﻌﺎﻫﺎ، ﺟﻠﺴﺖ ﺣﺪﺍﻫﺎ ﻭﺑﺪﻳﺖ ﻛﺎﻧﻔﻜﺮ ﻛﻴﻔﺎﺵ ﻧﺒﺪﺍ ﺍﻟﺤﻮﺍﺭ ﻭﺃﺵ ﺧﺎﺻﻨﻲ ﻧﻘﻮﻝ ﻟﻴﻬﺎ، ﻭﻟﻜﻦ ﻓﺬﻳﻚ ﺍﻷﺛﻨﺎﺀ ﻓﺎﺵ ﻛﻨﺖ ﻛﺎﻧﻔﻜﺮ، ﻫﻲ ﺣﻼﺕ ﺍﻟﺼﺎﻙ ﻭﻫﺰﺍﺕ ﺻﻨﺎﺗﺎﺕ ﺍﻟﺒﻮﺭﺗﺎﺑﻞ ﺩﻳﺎﻟﻬﺎ ﻭﺑﺪﺍﺕ ﻛﺎﺗﺴﻤﻊ ﺍﻟﻤﻮﺳﻴﻘﻰ، ﻣﺎﻋﺮﻓﺘﺶ ﻭﺍﺵ ﺩﺍﺭﺕ ﻫﺎﻛﺎﻙ ﻏﻴﺮ ﺑﻠﻌﺎﻧﻲ ﺑﺎﺵ ﻣﺎﻧﻬﻀﺮﺵ ﻣﻌﺎﻫﺎ ﻭﻻ ﻻ، ﻭﻟﻜﻦ ﺃﻧﺎ ﻃﻠﻊ ﻟﻴﺎ ﺍﻟﺪﻡ ﻭﻗﺮﺭﺕ ﺃﻧﻨﻲ ﻣﺎﻧﻬﻀﺮﺵ ﻣﻌﺎﻫﺎ .
ﺩﺍﺯﺕ ﺗﻘﺮﻳﺒﺎ 5 ﺩﻳﺎﻝ ﺍﻟﺪﻗﺎﺋﻖ، ﻭﺍﻟﻄﻮﺑﻴﺲ ﻗﺮﺏ ﻳﻮﺻﻞ ﺍﻟﺒﻼﻛﺔ ﺍﻟﻠﻲ ﻏﺎﺩﻱ ﻧﻨﺰﻝ ﻓﻴﻬﺎ، ﺷﻮﻳﺔ ﻭﻫﻲ ﺗﻮﻗﻒ ﻭﻃﻠﺒﺖ ﻣﻨﻲ ﻧﺨﻠﻴﻬﺎ ﺩﻭﺯ . ﺃﻭﺍﺍﺍﺍﺍﺍﺍﺍﺍﺍﻩ ﻏﺎﺩﻱ ﺗﻨﺰﻝ ﻓﻲ ﻧﻔﺲ ﺍﻟﺒﻼﻛﺔ ﺍﻟﻠﻲ ﻏﺎﺩﻱ ﻧﻨﺰﻝ ﻓﻴﻬﺎ ﺃﻧﺎ، ﺻﺎﻓﻲ ﺩﺍﺑﺎ ﺇﻳﻼ ﻧﺰﻟﺖ ﺣﺘﻰ ﺃﻧﺎ ﻫﻨﺎ ﻏﺎﺩﻱ ﺗﻘﻮﻝ ﻭﺍﺵ ﻏﻴﺮ ﺗﺎﺑﻌﻬﺎ . ﺧﻠﻴﺘﻬﺎ ﺩﻭﺯ ﻭﻗﺮﺭﺕ ﺃﻧﻨﻲ ﻧﺰﻝ ﻓﻲ ﺍﻟﺒﻼﻛﺔ ﺍﻟﻠﻲ ﻣﻦ ﺑﻌﺪ ﻭﻧﺮﺟﻊ ﻟﻠﺪﺍﺭ ﺑﺎﻟﺮﺟﻞ...
ﺤﻠﻘﺔ 3
ﻧﺰﻟﺖ ﻣﻦ ﺍﻟﻄﻮﺑﻴﺲ ﻓﻲ ﺍﻟﺒﻼﻛﺔ ﺍﻟﻠﻲ ﻣﻦ ﺑﻌﺪ ﻭﻏﺎﺩﻱ ﺭﺍﺟﻊ ﻟﻠﺪﺍﺭ، ﺍﻟﻄﺮﻳﻖ ﻣﺎﺷﻲ ﺑﻌﻴﺪﺓ ﻭﻟﻜﻦ ﺃﻧﺎ ﺑﻐﻴﺖ ﻧﻄﻮﻟﻬﺎ ﺑﺎﺵ ﻣﺎﻧﺘﻼﻗﺎﺵ ﺑﻴﻬﺎ، ﺑﺎﻧﻮ ﻟﻴﺎ ﺍﻟﻨﺎﺱ ﻭﺍﻗﻔﻴﻦ ﻋﻨﺪ ﻣﻮﻻﺕ ﺍﻟﻤﺴﻤﻦ ﺷﺎﺩﻳﻦ ﺍﻟﻨﻮﺑﺔ، ﻭﺃﻧﺎ ﻣﻦ ﻃﺒﻌﻲ ﻣﺎﻛﺎﻧﺒﻐﻴﺶ ﺍﻟﺰﺣﺎﻡ ﻭﺣﺘﻰ ﺫﻳﻚ ﺍﻟﻤﺎﻛﻠﺔ ﺩﻳﺎﻝ ﺍﻟﺰﻧﻘﺔ ﻣﺎﻋﻨﺪﻳﺶ ﻣﻌﺎﻫﺎ ﺃﺻﻼ، ﻭﻟﻜﻦ ﺩﺍﺑﺎ ﺃﻧﺎ ﻏﺎﺩﻱ ﻧﺘﺴﻨﻰ ﻭﻧﺸﺮﻳﻪ، ﻭﺇﻳﻼ ﻛﺎﻥ ﺷﻲ ﺣﺪ ﺯﺭﺑﺎﻥ ﺑﻐﺎ ﻳﺸﺮﻱ ﺍﻟﻤﺴﻤﻦ ﻧﻌﻄﻴﻪ ﻧﻮﺑﺘﻲ ﻣﺎﻛﺎﻳﻦ ﺣﺘﻰ ﻣﺸﻜﻞ، ﺍﻟﻤﻬﻢ ﻳﺪﻭﺯ ﺍﻟﻮﻗﺖ .
ﺷﺮﻳﺘﻮ ﻭﺗﻤﻴﺖ ﺭﺍﺟﻊ ﻟﻠﺪﺍﺭ، ﻓﺎﺵ ﺩﺧﻠﺖ ﻟﻠﻌﻤﺎﺭﺓ ﺍﻟﻠﻲ ﺳﺎﻛﻦ ﻓﻴﻬﺎ ﺷﻌﺮﺕ ﺑﺎﻟﺮﺍﺣﺔ ﻷﻥ ﻫﺎﺫ ﺍﻟﻌﺸﻴﺔ ﺩﺍﺯﻭ ﻋﻠﻴﺎ ﺑﺰﺍﻑ ﺩﻳﺎﻝ ﺍﻟﻤﻮﺍﻗﻒ ﺍﻟﻤﺤﺮﺟﺔ، ﻗﻠﺖ ﻓﺨﺎﻃﺮﻱ : ﻭﺃﺧﻴﺮﺍ ﻏﺎﺩﻱ ﻧﺪﺧﻞ ﺍﻟﺪﺍﺭ ﻧﻌﻤﺮ ﺷﻲ ﺑﺮﺍﺩ ﺩﻳﺎﻝ ﺃﺗﺎﻱ ﻭﻧﺮﺗﺎﺡ ﺷﻮﻳﺔ ﺑﺎﺵ ﻧﺒﺪﺍ ﺍﻟﻤﺮﺍﺟﻌﺔ .
" ﻻﺳﻨﺴﻮﺭ " ﺩﻳﺎﻝ ﺍﻟﻌﻤﺎﺭﺓ ﻫﺎﺫﻱ 4 ﺃﻳﺎﻡ ﻭﻫﻮ ﺧﺎﺳﺮ، ﺧﺎﺻﻨﻲ ﻧﻄﻠﻊ ﺣﺘﺎﻝ ﺍﻟﻄﺎﺑﻖ ﺍﻟﺜﺎﻟﺚ ﻓﻴﻦ ﻛﺎﻧﺴﻜﻮﻥ ﺑﺎﻟﺮﺟﻞ . ﻓﺎﺵ ﻗﺮﺑﺖ ﻧﻮﺻﻞ ﻟﻠﺪﺍﺭ ‏( ﺑﺎﻟﻀﺒﻂ ﻣﺎﺑﻴﻦ ﺍﻟﻄﺎﺑﻖ ﺍﻟﺜﺎﻧﻲ ﻭﺍﻟﺜﺎﻟﺚ ‏) ﻫﻨﺎ ﻛﺎﻧﺖ ﺍﻟﺼﺪﻣﺔ ﺍﻟﻜﺒﻴﺮﺓ . ﻫﻲ ﻭﺍﻟﻠﻪ ﺣﺘﻰ ﻫﻲ، ﺍﻟﺒﻨﺖ ﺍﻟﻠﻲ ﻋﻠﻰ ﻭﺩﻫﺎ ﻧﺰﻟﻨﻲ ﺍﻟﻄﻮﺑﻴﺲ ﺑﻌﻴﺪ، ﻭﺍﻟﻠﻲ ﻋﻠﻰ ﻭﺩﻫﺎ ﻃﻮﻟﺖ ﺍﻟﻄﺮﻳﻖ ﺑﺎﺵ ﻣﺎﻧﺘﻼﻗﺎﺵ ﺑﻴﻬﺎ ﻫﺎﻫﻲ ﻭﺍﻗﻔﺔ ﻗﺪﺍﻣﻲ، ﻭﻟﻜﻦ ﺃﺵ ﺟﺎﺑﻬﺎ ﻟﻬﻨﺎ؟ ﻫﺎﺫ ﺍﻟﻤﺮﺓ ﻻﺑﺴﺔ ﺑﻴﺠﺎﻣﺔ ﺑﺎﻟﻠﻮﻥ ﺍﻟﻮﺭﺩﻱ ﻭﻃﺎﻟﻌﺔ ﻣﻦ ﺍﻟﺪﺭﻭﺝ ﻏﻴﺮ ﺑﺸﻮﻳﺔ ﻭﻫﺎﺯﺓ ﺑﻮﺭﻃﺎﺑﻞ ﺑﻴﺪﻫﺎ ﺍﻟﻴﻤﻴﻦ ﻭﻣﻴﻜﺔ ﺩﻳﺎﻝ ﺍﻟﺒﻼﺳﺘﻴﻚ ﺑﻴﺪﻫﺎ ﺍﻟﺸﻤﺎﻝ . ﻣﺎﺷﺎﻓﺘﻨﻴﺶ ﻷﻥ ﺍﻟﺘﺮﻛﻴﺰ ﺩﻳﺎﻟﻬﺎ ﻛﻠﻮ ﻓﻲ ﺍﻟﺒﻮﺭﺗﺎﺑﻞ ﺍﻟﻠﻲ ﻫﺎﺯﺓ، ﻟﻜﻨﻬﺎ ﺣﺴﺎﺕ ﺑﺸﻲ ﻭﺍﺣﺪ ﻃﺎﻟﻊ ﻭﺭﺍﻏﺖ ﺑﺎﺵ ﺗﺨﻠﻴﻨﻲ ﻧﺪﻭﺯ . ﺍﺭﺗﺒﻜﺖ ﻭﻣﺎﻋﺮﻓﺖ ﺃﺵ ﻧﺪﻳﺮ، ﻭﺍﺣﺪ ﺭﺟﻠﻲ ﺑﻐﺎﺕ ﺗﻄﻠﻊ ﺗﻜﻤﻞ ﺍﻟﻄﺮﻳﻖ ﻭﺍﻷﺧﺮﻯ ﺑﻐﺎﺕ ﺗﻨﺰﻝ، ﻫﺎﺫ ﺍﻟﻘﻤﻘﻮﻣﺔ ﺧﺮﺑﻘﺎﺗﻨﻲ ﻫﺎﺫ ﺍﻟﻨﻬﺎﺭ ﻣﺰﻳﺎﻥ . ﻭﻟﻜﻦ ﻗﺮﺭﺕ ﺃﻧﻨﻲ ﻧﻄﻠﻊ ﻭﻧﻜﻮﻥ ﺷﺠﺎﻉ، ﻣﺎﻟﻬﺎ ﺷﻜﻮﻥ ﺗﻜﻮﻥ ﺑﺎﻟﺴﻼﻣﺔ ﺣﺘﻰ ﻳﻮﻗﻊ ﻟﻴﺎ ﻣﻌﺎﻫﺎ ﻫﺎﻛﺎ . ﻓﻲ ﻧﻔﺲ ﺍﻟﻠﺤﻈﺔ ﻫﻲ ﺍﻧﺘﺒﻬﺖ ﻭﺗﻠﻔﺘﺎﺕ ﻟﻴﺎ، ﺍﻟﻤﻔﺎﺟﺄﺓ ﻭﺍﻟﺬﻫﻮﻝ ﺑﺎﻧﻮ ﻟﻴﺎ ﻓﻌﻴﻨﻴﻬﺎ، ﻣﺎﻓﻬﻤﺎﺕ ﻭﺍﻟﻮ ﺣﺘﻰ ﻫﻲ، ﻭﻫﺎﺫ ﺍﻟﻨﻮﻉ ﺩﻳﺎﻝ ﺍﻟﺼﺪﻑ ﻗﻠﻴﻞ ﺑﺰﺍﻑ ﻓﺎﺵ ﻛﺎﻳﻮﻗﻌﻮ .
ﺧﻨﺰﺭﺍﺕ ﻓﻴﺎ ﻭﻫﻲ ﺗﻘﻮﻝ ﻟﻴﺎ : " ﺭﺍﻙ ﻋﻴﻘﺘﻲ ﻋﻠﻴﺎ ﺑﺰﺍﻑ ﻫﺎﺫ ﺍﻟﻨﻬﺎﺭ، ﻭﺍﺵ ﺗﺎﺑﻌﻨﻲ ﺣﺘﺎﻝ ﺍﻟﺪﺍﺭ !!"
ﺣﺴﻴﺖ ﻓﺬﻳﻚ ﺍﻟﻠﺤﻈﺔ ﺑﺤﺎﻻ ﺷﻲ ﺣﺪ ﻛﺐ ﻋﻠﻴﺎ ﺳﻄﻞ ﺩﻳﺎﻝ ﺍﻟﻤﺎﺀ ﺑﺎﺭﺩ، ﻣﺎﺣﻤﻠﺘﺶ ﺭﺍﺳﻲ، ﺟﺎﺗﻨﻲ ﺍﻟﺮﻏﺒﺔ ﺃﻧﻨﻲ ﻧﺪﻭﺭ ﻓﻴﻬﺎ ﻭﻧﻐﻮﻁ ﻋﻠﻴﻬﺎ ﻭﻻ ﻧﻘﺠﻬﺎ . ﻣﻦ ﺑﻌﺪ ﻛﻮﻟﺸﻲ ﺍﻟﻠﻲ ﺩﺍﺯ ﻋﻠﻴﺎ ﻳﻮﻗﻊ ﻟﻴﺎ ﻫﺎﻛﺎ ! ﻭﻟﻜﻦ ﻗﺮﺭﺕ ﺃﻧﻨﻲ ﻣﺎﻧﻬﻀﺮﺵ ﻣﻌﺎﻫﺎ ﻭﻃﻠﻌﺖ ﺑﺎﻟﺰﺭﺑﺔ ﻭﺣﻠﻴﺖ ﺍﻟﺒﺎﺏ ﺩﻳﺎﻝ ﺍﻟﺪﺍﺭ، ﻭﻗﺒﻞ ﻣﺎﻧﺪﺧﻞ ﺗﻠﻔﺖ ﻟﻴﻬﺎ ﻟﻘﻴﺘﻬﺎ ﻣﺎﺯﺍﻝ ﻛﺎﺗﺤﻨﺰﺯ، ﺷﻔﺖ ﻓﻴﻬﺎ ﺷﻮﻓﺔ ﺩﻳﺎﻝ ﺍﻹﺳﺘﻬﺰﺍﺀ ﻭﺳﺪﻳﺖ ﺍﻟﺒﺎﺏ .
ﺫﻳﻚ ﺍﻟﻠﻴﻠﺔ ﻃﺎﺭ ﻋﻠﻴﺎ ﺍﻟﻨﻌﺎﺱ ﻭﺑﻘﻴﺖ ﻛﺎﻧﻔﻜﺮ ﻓﻴﻬﺎ ﻏﻴﺮ ﻫﻲ، ﻭﻛﺎﻧﺴﻮﻝ ﺭﺍﺳﻲ ﺃﺵ ﺟﺎﺕ ﻛﺎﺩﻳﺮ ﻓﺎﻟﻌﻤﺎﺭﺓ . ﻭﺍﺵ ﺟﺎﺕ ﺩﻭﺯ ﺍﻟﻮﻳﻜﺎﻧﺪ ﻋﻨﺪ ﺷﻲ ﺣﺪ ﻣﻦ ﻋﺎﺋﻠﺘﻬﺎ، ﻭﻻ ﺟﺎﺕ ﺗﺤﻮﻻﺕ ﻣﻊ ﻋﺎﺋﻠﺘﺘﻬﺎ ﻫﻨﺎ ﻭﻻ ﺷﻨﻮ؟ ﻭﻓﺎﺵ ﻛﺎﻧﺘﻔﻜﺮ ﺍﻟﻤﻮﻗﻒ ﺍﻷﺧﻴﺮ ﺍﻟﻠﻲ ﻃﺮﺍ ﻟﻴﺎ ﻣﻌﺎﻫﺎ ﻛﺎﻧﻀﺤﻚ ﻏﻴﺮ ﺑﻮﺣﺪﻱ .
ﺫﺍﻙ ﺍﻷﺳﺒﻮﻉ ﺍﻟﻠﻲ ﻣﻦ ﺑﻌﺪ ﻣﺎﻛﺎﻧﺘﺶ ﺍﻟﻘﺮﺍﻳﺔ ﻓﻲ ﻻﻓﺎﻙ، ﻭﺣﺘﻰ ﻫﻲ ﻣﺎﺑﻘﺎﺗﺶ ﺑﺎﻧﺖ ﻟﻴﺎ، ﺣﺘﺎﻝ ﺫﺍﻙ ﺍﻟﻨﻬﺎﺭ ﺍﻟﻠﻲ ﻣﺸﻴﺖ ﻧﺪﻭﺯ ﺍﻹﻣﺘﺤﺎﻥ ﻭﺩﺧﻠﺖ ﺍﻟﻤﺪﺭﺝ ﻭﺑﺎﻧﺖ ﻟﻴﺎ ﺟﺎﻟﺴﺔ ﺑﻮﺣﺪﻫﺎ ﻓﻲ ﺍﻟﻠﻮﺭ...
ﺤﻠﻘﺔ 4
ﻳﻮﻡ ﺍﻹﺛﻨﻴﻦ ﺃﻭﻝ ﻳﻮﻡ ﻣﻦ ﺃﻳﺎﻡ ﺍﻹﻣﺘﺤﺎﻧﺎﺕ، ﺍﻟﻄﻠﺒﺔ ﻫﺎﺫﻱ ﺷﻬﺮ ﻭﻫﻮﻣﺎ ﻛﺎﻳﺮﺍﺟﻌﻮ ﻭﻛﺎﻳﻮﺟﺪﻭ، ﺃﻣﺎ ﺃﻧﺎ ﻛﻴﻒ ﺍﻟﻌﺎﺩﺓ ﺣﺘﻰ ﺑﻘﺎﺕ ﺳﻴﻤﺎﻧﺔ ﻋﺎﺩ ﻃﻔﺎﺕ ﻋﻠﻴﺎ ﺍﻟﺸﻤﻌﺔ، ﻛﻞ ﺻﺒﺎﺡ ﻛﺎﻧﻘﻮﻝ ﺍﻟﻌﺸﻴﺔ ﻧﺒﺪﺍ ﺍﻟﻤﺮﺍﺟﻌﺔ ﻭﻓﺎﺵ ﻛﺎﺗﺠﻲ ﺍﻟﻌﺸﻴﺔ ﻛﺎﻧﺘﻠﻬﻰ ﺑﺸﻲ ﺣﺎﺟﺔ ﻭﻧﻌﺎﻭﺩ ﻧﻘﻮﻝ ﻏﺪﺍ ﻓﻲ ﺍﻟﺼﺒﺎﺡ ﻧﺒﺪﺍ، ﻭﺍﻟﻮﻗﺖ ﻛﺎﻳﺪﻭﺯ ﺩﻏﻴﺎ . ﻣﺪﺓ ﺃﺳﺒﻮﻉ ﻣﺎﻏﺎﺩﻳﺶ ﺗﻜﻔﻴﻨﻲ ﺣﺘﻰ ﺑﺎﺵ ﻧﺮﺍﺟﻊ 2 ﻣﻮﺍﺩ، ﻓﺒﺎﻷﺣﺮﻯ 8 ﺩﻳﺎﻝ ﺍﻟﻤﻮﺍﺩ ﻛﺎﻣﻠﺔ .
ﻓﻘﺖ ﻓﺬﺍﻙ ﺍﻟﻨﻬﺎﺭ ﺑﻜﺮﻱ ﻭﻋﺎﺭﻑ ﺭﺍﺳﻲ ﻣﺎﻏﺎﺩﻱ ﻧﺪﻳﺮ ﻭﺍﻟﻮ ﻓﺎﻹﻣﺘﺤﺎﻥ، ﻭﻟﻜﻦ ﻏﺎﺩﻱ ﻳﻜﻮﻥ ﻋﻨﺪﻱ ﺍﻟﺤﻖ ﺑﺎﺵ ﻧﺪﻭﺯ ﺍﻟﺪﻭﺭﺓ ﺍﻹﺳﺘﺪﺭﺍﻛﻴﺔ ﺧﺼﻮﺻﺎ ﻭﺃﻥ ﺍﻟﻨﺘﺎﺋﺞ ﻛﺎﻳﺘﻌﻄﻠﻮ ﺑﺎﺵ ﻳﺒﺎﻧﻮ، ﻭﻏﺎﺩﻱ ﻳﻜﻮﻥ ﻋﻨﺪﻱ ﺍﻟﻮﻗﺖ ﺍﻟﻜﺎﻓﻲ ﺑﺎﺵ ﻧﻮﺟﺪ ﻟﻴﻬﺎ، ﻏﺎﺩﻱ ﻓﺎﻟﻄﺮﻳﻖ ﺩﻳﺎﻝ " ﻻﻓﺎﻙ " ﻭﻛﺎﻧﺼﺒﺮ ﻓﺮﺍﺳﻲ ﺑﺄﻏﻨﻴﺔ ﻣﺤﻤﻮﺩ ﺍﻹﺩﺭﻳﺴﻲ " ﻣﺎﺯﺍﻝ ﻣﺎﺯﺍﻝ ﻣﺎﻓﻘﺪﺕ ﺍﻷﻣﻞ ﻣﺎﺯﺍﻝ ".
ﺩﺧﻠﺖ ﺍﻟﻤﺪﺭﺝ ﻓﺎﺵ ﻏﺎﺩﻱ ﻧﺪﻭﺯ ﻭﻛﺎﻥ ﻣﺎﺯﺍﻝ ﺧﺎﻭﻱ ﺷﻮﻳﺔ، ﻃﻠﻌﺖ ﻣﻊ ﺍﻟﺪﺭﻭﺝ ﻛﺎﻧﻘﻠﺐ ﻋﻠﻰ ﺑﻼﺻﺔ ﻓﺎﺵ ﻧﺠﻠﺲ، ﻓﺠﺄﺓ ﻭﻫﻲ ﺗﺒﺎﻥ ﻟﻴﺎ ﺫﻳﻚ ﺍﻟﻘﻤﻘﻮﻣﺔ ﺟﺎﻟﺴﺔ ﺑﻮﺣﺪﻫﺎ ﻭﻟﻜﻦ ﻫﺎﺫ ﺍﻟﻤﺮﺓ ﻻﺑﺴﺔ ﺍﻟﻔﻮﻻﺭ ﻭﺍﻟﺠﻼﺑﺔ، ﻓﻲ ﺍﻷﻭﻝ ﻣﻌﺮﻓﺘﻬﺎﺵ ﻭﺍﺵ ﻫﻲ ﻭﻟﻜﻦ ﻓﺎﺵ ﺣﻨﺰﺯﺕ ﻣﺰﻳﺎﻥ ﻋﺮﻓﺘﻬﺎ . ﺳﺒﺤﺎﻥ ﺍﻟﻠﻪ ﻣﺒﺪﻝ ﺍﻷﺣﻮﺍﻝ ﻏﻴﺮ ﻫﺎﺫﻱ ﺃﺳﺒﻮﻉ ﻛﺎﻧﺖ ﻻﺑﺴﺔ ﺍﻟﻤﺰﻳﺮ ﻭﻣﻌﺮﻳﺔ ﻛﺘﺎﻓﻬﺎ ﺃﻣﺎ ﺩﺍﺑﺎ ﺭﺑﻲ ﻫﺪﺍﻫﺎ ﻭﺩﺍﺭﺕ ﺍﻟﺰﻳﻒ، ﻭﻟﻜﻦ ﺑﻘﺎﺕ ﺯﻭﻳﻨﺔ ﻛﻴﻤﺎ ﺷﻔﺘﻬﺎ ﺍﻟﻤﺮﺓ ﺍﻷﻭﻟﻰ .
ﻭﺍﺧﺎ ﻃﺎﻟﻊ ﻣﻊ ﺍﻟﺪﺭﻭﺝ ﺑﻘﻴﺖ ﻛﺎﻧﺸﻮﻑ ﻓﻴﻬﺎ ﻭﺣﺘﻰ ﻫﻲ ﺑﻘﺎﺕ ﻛﺎﺗﺸﻮﻑ ﻓﻴﺎ ﺑﺤﺎﻻ ﻛﺎﺗﺴﻨﺎﻧﻲ ﻧﺴﻠﻢ ﻋﻠﻴﻬﺎ، ﻭﺃﻧﺎ ﻣﺎﻋﺮﻓﺘﺶ ﻛﻴﻔﺎﺵ ﻧﺘﺼﺮﻑ ﻓﻬﺎﺫ ﺍﻟﻤﻮﺍﻗﻒ، ﻭﺍﺵ ﻧﻤﺸﻲ ﻧﻬﻀﺮ ﻣﻌﺎﻫﺎ ﻭﻻ ﻧﺸﻴﺮ ﻟﻴﻬﺎ ﺑﻴﺪﻱ ﻭﻻ ﺷﻨﻮ، ﻭﻟﻜﻦ ﻓﻨﻔﺲ ﺫﻳﻚ ﺍﻟﻠﺤﻈﺔ ﺟﺎﺗﻨﻲ ﻭﺍﺣﺪ ﺍﻟﻔﻜﺮﺓ . ﺩﺭﺕ ﺭﺍﺳﻲ ﺑﺤﺎﻻ ﺗﻌﻜﻠﺖ ﻓﺎﻟﺪﺭﻭﺝ ﻭﻛﻨﺖ ﻏﺎﺩﻱ ﻧﻄﻴﺢ، ﻫﺰﻳﺖ ﺭﺍﺳﻲ ﻭﺷﻔﺖ ﻓﻴﻬﺎ ﻟﻘﻴﺘﻬﺎ ﻛﺎﺗﻀﺤﻚ ﻭﺣﺘﻰ ﺃﻧﺎ ﺑﺪﻳﺖ ﻛﺎﻧﻀﺤﻚ، ﻗﺮﺑﺖ ﻟﻴﻬﺎ ﻭﺃﻧﺎ ﻧﻘﻮﻝ ﻟﻴﻬﺎ " ﻋﻴﻨﻴﻚ ﺧﺎﻳﺒﻴﻦ ﻛﺎﻧﻮﺍ ﻏﺎﺩﻱ ﻳﻄﻴﺤﻮﻧﻲ " ، ﺣﺴﻴﺖ ﺑﺄﻥ ﺫﻳﻚ ﺍﻟﻬﻀﺮﺓ ﺧﺮﺟﺎﺕ ﻟﻴﺎ ﺑﻮﺣﺪﻫﺎ ﺑﻼ ﻣﺎﻧﻔﻜﺮ ﻓﻴﻬﺎ، ﻭﻫﻲ ﺗﺠﺎﻭﺑﻨﻲ ﺑﺎﻟﻀﺤﻚ ' ﻻ ﻻ ﻭﺍﻟﻠﻪ ﺣﺘﻰ ﺯﻭﻳﻨﻴﻦ " ، ﻭﺑﺪﻳﻨﺎ ﻛﺎﻧﻀﺤﻜﻮ ﻭﺑﻼ ﺷﻚ ﺣﺘﻰ ﻫﻲ ﻓﺬﻳﻚ ﺍﻟﻠﺤﻈﺔ ﻏﺎﺩﻱ ﺗﻜﻮﻥ ﺗﻔﻜﺮﺍﺕ ﺫﺍﻙ ﺍﻟﻤﻮﻗﻒ ﺍﻟﻠﻲ ﻭﻗﻊ ﻟﻴﻨﺎ ﻓﻲ ﺍﻟﻌﻤﺎﺭﺓ ﺍﻷﺳﺒﻮﻉ ﺍﻟﻠﻲ ﺩﺍﺯ .
ﺧﻠﻴﺘﻬﺎ ﻭﺑﻐﻴﺖ ﻧﻤﺸﻲ ﻧﺠﻠﺲ ﺑﻮﺣﺪﻱ ﺑﻌﻴﺪ ﻋﻠﻴﻬﺎ، ﻟﻜﻦ ﻫﻲ ﻋﻴﻄﺎﺕ ﻋﻠﻴﺎ ﻭﺳﻮﻻﺗﻨﻲ :
ـ ﻭﺍﺵ ﻛﺎﻳﺒﺎﻧﻮ ﻟﻴﺎ ﺍﻟﺼﻨﺎﺗﺎﺕ ﻣﻦ ﺗﺤﺖ ﺍﻟﻔﻮﻻﺭ؟
ـ ﻻ ﻣﺎﻛﻴﺒﺎﻧﻮﺵ ﻋﻼﺵ؟
ـ ﻻ ﻭﺍﻟﻮ ﻏﻴﺮ ﺩﺍﻳﺮﺓ ﻣﻊ ﻭﺍﺣﺪ ﺻﺎﺣﺒﺘﻲ ﻏﺎﺩﻱ ﻧﻌﻴﻂ ﻟﻴﻬﺎ ﺑﺎﻟﺘﻠﻴﻔﻮﻥ ﻭﻧﻌﻄﻴﻬﺎ ﺍﻷﺳﺌﻠﺔ ﺑﺎﺵ ﺗﺨﺮﺝ ﻟﻴﺎ ﺍﻷﺟﻮﺑﺔ ﻣﻦ ﺍﻟﻜﺘﺎﺏ، ﺇﻳﻼ ﺑﻐﻴﺘﻲ ﺃﺟﻲ ﺟﻠﺲ ﺣﺪﺍﻳﺎ ".
‏( ﻛﺎﻥ ﻳﺴﺤﺎﺏ ﻟﻴﺎ ﻫﺪﺍﻫﺎ ﺍﻟﻠﻪ ﻭﺩﺍﺭﺕ ﺍﻟﺤﺠﺎﺏ، ﺳﺎﻋﺎ ﻫﻲ ﺩﺍﺭﺗﻮ ﻏﻴﺮ ﺑﺎﺵ ﺗﻨﻘﻞ ‏)
ﻭﻛﺎﻥ ﻫﺬﺍ ﺃﻭﻝ ﺣﻮﺍﺭ ﻃﻮﻳﻞ ﺑﻴﻨﻲ ﻭﺑﻴﻨﻬﺎ ﻭﺗﻤﺎ ﻓﺎﺵ ﻋﺮﻓﺖ ﺃﻥ ﺍﺳﻤﻬﺎ ﻧﺴﺮﻳﻦ، ﻧﺴﺮﻳﻦ ﺍﻟﻠﻲ ﻏﺎﺩﻱ ﻳﻮﻗﻊ ﻟﻴﺎ ﻣﻌﺎﻫﺎ ﻣﻦ ﺑﻌﺪ ﺑﺰﺍﻑ ﺩﻳﺎﻝ ﺍﻷﺣﺪﺍﺙ ﻭﺍﻟﻤﻮﺍﻗﻒ ......
ﺍﻟﺤﻠﻘﺔ 5
ﻛﺎﻥ ﻫﺎﺫﺍﻙ ﺇﻣﺘﺤﺎﻥ ﺩﻳﺎﻝ " ﺍﻟﻘﺎﻧﻮﻥ ﺍﻟﺠﻨﺎﺋﻲ " ، ﺍﻟﻤﺎﺩﺓ ﺻﻌﻴﺒﺔ ﻭﺍﻟﻤﻘﺮﺭ ﺩﻳﺎﻟﻬﺎ ﻃﻮﻳﻞ ﺑﺰﺍﻑ ﻓﻴﻪ ﺗﻘﺮﻳﺒﺎ ﺷﻲ 300 ﺻﻔﺤﺔ ﻛﻠﻬﻢ ﻧﺼﻮﺹ ﻗﺎﻧﻮﻧﻴﺔ ﻭﺻﻌﻴﺐ ﺑﺎﺵ ﺗﺒﻘﻰ ﻋﺎﻗﻞ ﻋﻠﻴﻬﻢ ﻛﺎﻣﻠﻴﻦ، ﻣﻦ ﺑﻌﺪ ﻧﺼﻒ ﺳﺎﻋﺔ ﺑﺎﺵ ﺑﺪﺍ ﺍﻹﻣﺘﺤﺎﻥ ﺩﺭﺕ ﻟﻘﻴﺖ ﻛﻮﻟﺸﻲ ﺷﺎﺩﻳﻦ ﻓﺮﺍﺳﻬﻮﻡ ﻭﺗﺎﻟﻔﻴﻦ ﻭﺣﺘﻰ ﺃﻧﺎ ﺑﺤﺎﻟﻬﻮﻡ ﻣﺎﻋﺮﻓﺖ ﻣﻨﻴﻦ ﻧﺒﺪﺍ، ﺇﻻ ﻧﺴﺮﻳﻦ ﻋﻤﺮﺍﺕ ﺍﻟﻮﺭﻗﺔ ﺍﻷﻭﻟﻰ ﺩﻳﺎﻝ ﺍﻟﺘﺤﺮﻳﺮ ﻛﺎﻣﻠﺔ ﻭﻣﺎﺯﺍﻝ ﺟﺎﻟﺴﺔ ﻛﺎﺗﻜﺘﺐ، ﺷﻲﺀ ﻃﺒﻴﻌﻲ ﻣﺎﺩﺍﻡ ﺃﻥ ﺍﻷﺟﻮﺑﺔ ﻛﺎﺗﺠﻴﻬﺎ ﻓﻲ ﺍﻟﺘﻠﻴﻔﻮﻥ .
ﻣﺎﺩﺍﺯﺵ ﺑﺰﺍﻑ ﺩﻳﺎﻝ ﺍﻟﻮﻗﺖ ﺣﺘﻰ ﺣﺴﻴﺖ ﺑﻴﻬﺎ ﻛﺎﺗﻨﻐﺰﻧﻲ، ﺗﻠﻔﺖ ﻟﺠﻴﻬﺘﺎ ﻟﻘﻴﺘﻬﺎ ﻫﺎﺯﺓ ﺍﻟﻮﺭﻗﺔ ﺩﻳﺎﻟﻬﺎ ﺑﻴﺪﻳﻬﺎ ﻭﻣﺎﺩﺍﻫﺎ ﻟﻴﺎ .
ـ " ﻋﻄﻴﻨﻲ ﻭﺭﻗﺘﻚ ﻭﺷﺪ ﺍﻟﻮﺭﻗﺔ ﺩﻳﺎﻟﻲ ﺩﻏﻴﺎ، ﻛﺘﺐ ﻓﻴﻬﺎ ﺍﺳﻤﻚ ﻭﺳﻴﺮ ﺣﻄﻬﺎ ﺩﺍﺑﺎ ﻭﺧﺮﺝ ".
ـ " ﺍﻳﺎﻩ ﻭﺃﻧﺖ ﺃﺵ ﻏﺎﺩﻱ ﺩﻳﺮﻱ؟ "
ـ " ﺃﻧﺎ ﻋﻨﺪﻱ ﺩﺍﻛﺸﻲ ﻣﻜﺘﻮﺏ ﻓﻲ ﺍﻟﻮﺳﺎﺥ، ﻏﺎﺩﻱ ﻧﻄﻠﺐ ﻭﺭﻗﺔ ﺟﺪﻳﺪﺓ ﻧﻌﺎﻭﺩ ﻧﻜﺘﺐ ﺍﻷﺟﻮﺑﺔ ﻭﻧﺤﻄﻬﺎ ﻫﻲ ﺍﻷﺧﻴﺮﺓ ﺑﺎﺵ ﺍﻟﻤﺼﺤﺢ ﻣﺎﻳﻌﻴﻘﺶ ﺑﻴﻨﺎ ."
ﺩﺭﺕ ﺫﺍﻛﺸﻲ ﺍﻟﻠﻲ ﻗﺎﻟﺖ ﻟﻴﺎ ﻣﺎﻃﺎﻟﻌﺎ ﻣﺎﻃﺎﻟﻌﺎ . ﺧﺮﺟﺖ ﺑﻘﻴﺖ ﻛﺎﻧﺘﺴﻨﺎﻫﺎ ﺷﻲ ﺛﻠﺚ ﺳﺎﻋﺔ ﺣﺪﺍ ﺍﻟﺒﺎﺏ ﺩﻳﺎﻝ ﺍﻟﻤﺪﺭﺝ ﺣﺘﻰ ﺧﺮﺟﺎﺕ، ﻏﻴﺮ ﺷﺎﻓﺘﻨﻲ ﻭﺍﻗﻒ ﻭﻫﻲ ﺗﺒﺪﺍ ﺗﻀﺤﻚ ﻭﺣﺘﻰ ﺃﻧﺎ ﻣﺎﻗﺪﺭﺗﺶ ﻧﺤﺒﺲ ﺍﻟﻀﺤﻜﺔ ﻷﻥ ﺍﻟﺨﻄﺔ ﺩﻳﺎﻟﻨﺎ ﻧﺠﺤﺎﺕ . ﻛﺎﻧﺖ ﻫﺎﺫﻳﻚ ﺗﻘﺮﻳﺒﺎ ﺍﻟﻌﺸﺮﺓ ﺩﻳﺎﻝ ﺍﻟﺼﺒﺎﺡ، ﻋﺮﺿﺖ ﻋﻠﻴﻬﺎ ﺑﺎﺵ ﻧﻤﺸﻴﻮ ﻧﻔﻄﺮﻭ ﺑﺠﻮﺝ ﻗﺒﻞ ﻣﺎﻳﺒﺪﺍ ﺍﻹﻣﺘﺤﺎﻥ ﺍﻷﺧﺮ ﻣﻊ ﺍﻟﻌﺸﺮﺓ ﻭﻧﺺ ﻭﻗﺒﻠﺖ . ﻣﺎﻛﺎﻧﺶ ﻏﺮﺿﻲ ﻓﻲ ﺍﻟﻔﻄﻮﺭ ﻷﻧﻨﻲ ﻓﻄﺮﺕ ﻣﺰﻳﺎﻥ ﻓﺎﻟﺪﺍﺭ ﻗﺒﻞ ﻣﺎﻧﺨﺮﺝ، ﻭﺇﻧﻤﺎ ﻛﺎﻥ ﺍﻟﻬﺪﻑ ﺩﻳﺎﻟﻲ ﻧﺠﻠﺲ ﻣﻌﺎﻫﺎ ﻭﻧﻌﺮﻑ ﻋﻠﻴﻬﺎ ﻛﻮﻟﺸﻲ .
ﺩﻏﻴﺎ ﺩﺍﺯ ﺍﻟﻮﻗﺖ ﻣﻌﺎﻫﺎ، ﻭﻟﻜﻦ ﻗﺪﺭﺕ ﻧﻌﺮﻑ ﻣﻦ ﺧﻼﻝ ﺍﻟﻬﻀﺮﺓ ﻓﺎﺵ ﺟﻠﺴﻨﺎ ﻧﻔﻄﺮﻭ ﺃﻧﻬﺎ ﻗﺮﺍﺕ ﻓﻤﺮﺍﻛﺶ ﺍﻟﺴﻨﺔ ﺍﻷﻭﻟﻰ ﻭﺍﻟﺜﺎﻧﻴﺔ ﻭﺟﺎﺕ ﺗﻜﻤﻞ ﺍﻟﺴﻨﺔ ﺍﻟﺜﺎﻟﺜﺔ ﻓﺄﻛﺎﺩﻳﺮ ﻣﻦ ﺑﻌﺪ ﻣﺎﻟﻘﺎﺕ ﺧﺪﻣﺔ ﻓﻮﺍﺣﺪ ﻣﺮﻛﺰ ﺩﻳﺎﻝ ﺍﻟﻨﺪﺍﺀ ﻭﻛﺎﺗﺨﺪﻡ ﺍﻟﻨﻬﺎﺭ ﻛﺎﻣﻞ، ﺩﺍﻛﺸﻲ ﻋﻼﺵ ﻋﻤﺮﻫﺎ ﻣﺎﺑﺎﻧﺖ ﻟﻴﺎ ﻓﻲ " ﻻﻓﺎﻙ " ، ﻭﺃﻧﻬﺎ ﻛﺎﻧﺖ ﻛﺎﺭﻳﺔ ﻣﻊ ﺍﻟﺒﻨﺎﺕ ﻗﺒﻞ ﻣﺎﺗﻠﺢ ﻋﻠﻴﻬﺎ ﺧﺎﻟﺘﻬﺎ ﺧﺪﻳﺠﺔ ـ ﺍﻟﻠﻲ ﺳﺎﻛﻨﺔ ﻓﻨﻔﺲ ﺍﻟﻄﺎﺑﻖ ﺩﻳﺎﻝ ﺍﻟﻌﻤﺎﺭﺓ ﺍﻟﻠﻲ ﺳﺎﻛﻦ ﻓﻴﻪ ﺃﻧﺎ ـ ﺑﺎﺵ ﺗﺠﻲ ﺗﺴﻜﻦ ﻣﻌﺎﻫﺎ ﻭﺗﻮﻧﺴﻬﺎ، ﻫﺎﺫ ﺧﺪﻳﺠﺔ ﻓﺮﻣﻠﻴﺔ ﻛﺎﻧﺖ ﻣﺰﻭﺟﺔ ﻭﻃﻠﻘﺖ ﻭﺳﺎﻛﻨﺔ ﺑﻮﺣﺪﻫﺎ، ﻭﺍﻟﺠﻴﺮﺍﻥ ﻛﺎﻣﻠﻴﻦ ﻋﺎﺭﻓﻴﻨﻬﺎ ﺧﺎﺭﺟﺔ ﺍﻟﻄﺮﻳﻖ ﻭﻛﺎﺗﺠﻲ ﺑﺰﺍﻑ ﺩﻳﺎﻝ ﺍﻟﻤﺮﺍﺕ ﺳﻜﺮﺍﻧﺔ ﻟﻠﺪﺍﺭ، ﻭﻟﻜﻦ ﺃﻧﺎ ﻛﺎﺗﺒﺎﻥ ﻟﻴﺎ ﻇﺮﻳﻔﺔ ﻭﻋﻤﺮﻫﺎ ﻣﺎﺟﺒﺪﺕ ﺍﻟﺼﺪﺍﻉ ﻣﻊ ﺷﻲ ﺣﺪ، ﻭﺩﻳﻤﺎ ﻓﺎﺵ ﻛﺎﺗﻠﻘﺎﻧﻲ ﻭﺍﻗﻒ ﻛﺎﻧﺘﺴﻨﻰ ﺍﻟﻄﻮﺑﻴﺲ ﻛﺎﺗﻮﺻﻠﻨﻲ ﻣﻌﺎﻫﺎ ﻓﻄﻤﻮﺑﻴﻠﺘﻬﺎ .
ﺩﺧﻠﺖ ﺃﻧﺎ ﻭﻧﺴﺮﻳﻦ ﺍﻟﻤﺪﺭﺝ ﺑﺎﺵ ﻧﺪﻭﺯﻭ ﺍﻹﻣﺘﺤﺎﻥ ﺍﻟﺜﺎﻧﻲ ﻭﻋﺎﻭﺩﻧﺎ ﻧﻔﺲ ﺍﻟﻄﺮﻳﻘﺔ ﺍﻟﻠﻲ ﺩﺭﻧﺎﻫﺎ ﻓﻲ ﺍﻹﻣﺘﺤﺎﻥ ﺍﻷﻭﻝ، ﻭﻛﺮﺭﻧﺎﻫﺎ ﻓﻲ ﺟﻤﻴﻊ ﺍﻹﻣﺘﺤﺎﻧﺎﺕ ﺍﻟﻠﻲ ﻣﻦ ﺑﻌﺪ . ﻓﺬﺍﻙ ﺍﻷﺳﺒﻮﻉ ﺩﻳﺎﻝ ﺍﻹﻣﺘﺤﺎﻥ ﻭﻟﻴﻨﺎ ﻗﺮﺍﺑﻴﻦ ﺑﺰﺍﻑ ﻟﺒﻌﻀﻴﺎﺗﻨﺎ، ﻛﺎﻧﻤﺸﻴﻮ ﻻﻓﺎﻙ ﺑﺠﻮﺝ ﻭﻧﺮﺟﻌﻮ ﺑﺠﻮﺝ، ﺧﺪﻳﺖ ﻋﻨﺪﻫﺎ ﻧﻤﺮﺓ ﺍﻟﺘﻠﻴﻔﻮﻥ ﺩﻳﺎﻟﻬﺎ ﻭﺩﺧﻠﺘﻬﺎ ﻋﻨﺪﻱ ﺍﻟﻔﺎﻳﺴﺒﻮﻙ ﻭﻛﻨﺎ ﻛﺎﻧﻬﻀﺮﻭ ﺩﻳﻤﺎ ﻭﻭﻟﻔﻨﺎ ﺑﻌﻀﻴﺎﺗﻨﺎ ﺑﺰﺍﻑ، ﺣﺘﺎﻝ ﻭﺍﺣﺪ ﺍﻟﻨﻬﺎﺭ ﻋﻴﻄﺎﺕ ﻋﻠﻴﺎ ﻓﻲ ﺍﻟﺘﻠﻴﻔﻮﻥ ﻭﺳﻮﻻﺗﻨﻲ ﻭﺍﺵ ﻛﺎﻧﻌﺮﻑ ﻧﺒﺪﻝ ﺍﻟﻜﻮﺩ ﺩﻳﺎﻝ ﺍﻟﻮﻳﻔﻲ، ﺟﺎﻭﺑﺘﻬﺎ ﻗﻠﺖ ﻟﻴﻬﺎ ﺃﻩ ﻛﺎﻧﻌﺮﻑ ﻭﻫﻲ ﺗﻄﻠﺐ ﻣﻨﻲ ﻧﺪﻭﺯ ﻋﻨﺪﻫﺎ ﻟﻠﺪﺍﺭ ﻧﺒﺪﻟﻮ ﻟﻴﻬﺎ ﻗﺒﻞ ﻣﺎﺗﺠﻲ ﺧﺎﻟﺘﻬﺎ ﻣﻦ ﺍﻟﺨﺪﻣﺔ .....
ﺍﻟﺤﻠﻘﺔ 6
ﻣﺸﻴﺖ ﻗﺪﺍﻡ ﺍﻟﻤﺮﺍﻳﺎ ﻗﺎﺩﻳﺖ ﺣﺎﻟﺘﻲ ﺑﺎﻟﺰﺭﺑﺔ ﻭﺧﺮﺟﺖ ﻗﺪﺍﻡ ﺍﻟﺪﺍﺭ ﺑﺎﺵ ﻧﻌﻴﻂ ﻋﻠﻴﻬﺎ، ﻏﻴﺮ ﺳﻮﻧﻴﺖ ﻋﻠﻰ ﺍﻟﺮﻗﻢ ﺩﻳﺎﻟﻬﺎ ﻭﻫﻲ ﺗﺤﻞ ﺍﻟﺒﺎﺏ ﻗﺒﻞ ﻣﺎﺗﺠﺎﻭﺏ ﻋﻠﻰ ﺍﻟﻤﻜﺎﻟﻤﺔ، ﺑﺎﻥ ﻟﻴﺎ ﻏﻴﺮ ﺭﺍﺳﻬﺎ ﻣﻦ ﺍﻟﺒﺎﺏ ﻭﻟﻮﺣﺎﺕ ﻟﻴﺎ ﺑﻴﺪﻳﻬﺎ ﺑﺎﺵ ﻧﺪﺧﻞ ﺩﻏﻴﺎ ﻗﺒﻞ ﻣﺎﻳﺸﻮﻓﻨﺎ ﺷﻲ ﺣﺪ ﻣﻦ ﺍﻟﺠﻴﺮﺍﻥ، ﻭﺫﺍﻛﺸﻲ ﺍﻟﻠﻲ ﺩﺭﺕ . ﺩﺧﻠﺖ ﺣﺎﺩﺭ ﺭﺍﺳﻲ ﺑﺤﺎﻻ ﺩﺍﻳﺮ ﺷﻲ ﺟﺮﻳﻤﺔ ﻭﺳﺪﺍﺕ ﺍﻟﺒﺎﺏ ﻣﻦ ﻭﺭﺍﻫﺎ .
ﺩﺭﺕ ﻭﻣﺪﻳﺖ ﻟﻴﻬﺎ ﻳﺪﻱ ﻛﻴﻤﺎ ﻛﺎﻧﺪﻳﺮ ﺩﻳﻤﺎ ﺑﺎﺵ ﻧﺴﻠﻢ ﻋﻠﻴﻬﺎ، ﻭﻫﻲ ﺗﻘﻮﻝ ﻟﻴﺎ " ﻭﺍﺵ ﺣﻨﺎ ﻏﺎﺩﻱ ﻧﺒﻘﺎﻭ ﺩﻳﻤﺎ ﻛﺎﻧﺘﺴﺎﻟﻤﻮ ﻏﻴﺮ ﺑﺎﻟﻴﺪﻳﻦ " ، ﻭﻫﻲ ﺗﺒﻮﺳﻨﻲ ﻓﺤﻨﺎﻛﻲ ﺑﺠﻮﺝ، ﻭﻃﻠﺒﺎﺕ ﻣﻨﻲ ﺃﻧﻨﻲ ﻧﺘﺒﻌﻬﺎ ﻟﻠﺒﻴﺖ ﺩﻳﺎﻟﻬﺎ ﺑﺎﺵ ﻧﺒﺪﻝ ﻟﻴﻬﺎ ﺍﻟﻜﻮﺩ ﺩﻳﺎﻝ ﺍﻟﻮﻳﻔﻲ، ﻷﻧﻬﺎ ﻋﻠﻰ ﺣﺴﺎﺏ ﻣﺎ ﻗﺎﻟﺖ ﺍﻷﻧﺘﺮﻧﻴﺖ ﺩﻳﺎﻟﻬﺎ ﻭﻻﺕ ﺿﻌﻴﻔﺔ ﺑﺰﺍﻑ ﻭﺷﻜﺖ ﺑﺄﻥ ﺷﻲ ﺣﺪ ﺃﺧﺮ ﻋﺎﺭﻑ ﺍﻟﻜﻮﺩ ﻭﻛﺎﻳﺘﻜﻮﻧﻴﻜﺘﺎ ﺑﺎﻟﻮﻳﻔﻲ ﺩﻳﺎﻟﻬﺎ . ﺩﺧﻠﺖ ﺃﻧﺎ ﻭﻳﺎﻫﺎ ﺍﻟﺒﻴﺖ ﻭﺑﺪﻟﺖ ﻟﻴﻬﺎ ﺍﻟﻜﻮﺩ ﺑﺎﻟﺰﺭﺑﺔ ﻭﻣﺸﻴﺖ ﻟﺠﻴﻬﺔ ﺩﻳﺎﻝ ﺍﻟﺒﺎﺏ ﺑﻐﻴﺖ ﻧﺨﺮﺝ ﻓﺤﺎﻟﻲ، ﻭﻟﻜﻦ ﻫﻲ ﻗﺒﻄﺘﺎﺗﻨﻲ ﻣﻦ ﻳﺪﻱ ﻭﻃﻠﺒﺎﺕ ﻣﻨﻲ ﺑﺎﺵ ﻧﺠﻠﺲ ﻣﻌﺎﻫﺎ ﻭﻧﺪﻭﺯ ﻣﻌﺎﻫﺎ ﺍﻟﻌﺸﻴﺔ، ﻗﻠﺖ ﻟﻴﻬﺎ ﻻ ﻣﺎﻳﻤﻜﻨﺶ ﻷﻧﻪ ﻛﻴﻒ ﻭﺍﻟﻮ ﺗﺠﻲ ﺧﺎﻟﺘﻬﺎ ﻣﻦ ﺍﻟﺨﺪﻣﺔ ﻭﺗﻠﻘﺎﻧﻲ ﻓﻲ ﺍﻟﺪﺍﺭ . ﻭﺍﺧﺎ ﺧﺎﻟﺘﻬﺎ ﺧﺎﺭﺟﺔ ﺍﻟﻄﺮﻳﻖ ﻭﻛﺎﺗﺒﺪﻝ ﺍﻟﺮﺟﺎﻝ ﻛﻴﻤﺎ ﻛﺎﺗﺒﺪﻝ ﺣﻮﺍﻳﺠﻬﺎ ﻭﺳﻜﺎﻳﺮﻳﺔ، ﻭﻟﻜﻦ ﻣﺎﻏﺎﺩﻳﺶ ﺗﺒﻐﻲ ﺗﺸﻮﻑ ﺭﺍﺟﻞ ﻓﺪﺍﺭﻫﺎ ﻭﺟﺎﻟﺲ ﻣﻊ ﺑﻨﺖ ﺃﺧﺘﻬﺎ .
ﺑﺪﺍﺕ ﻛﺎﺿﺤﻚ ﻭﻗﺎﻟﺖ ﻟﻴﺎ ﺃﻥ ﺧﺎﻟﺘﻬﺎ ﻣﺸﺎﺕ ﺍﻟﺒﺎﺭﺡ ﻟﺘﺮﻛﻴﺎ ﺑﺎﺵ ﺩﻭﺯ " ﺍﻟﻜﻮﻧﺠﻲ " ﺩﻳﺎﻟﻬﺎ ﻭﻏﺎﺩﻱ ﺗﺒﻘﻰ ﺗﻤﺎ ﺃﺳﺒﻮﻉ ﻗﺒﻞ ﻣﺎﺗﺠﻲ . ﺗﺮﺩﺩﺕ ﻭﻣﺎﻋﺮﻓﺖ ﻣﺎﻧﺪﻳﺮ، ﻭﺍﺵ ﻧﺪﻳﺮ ﺍﻟﺴﺒﺔ ﺑﺸﻲ ﺣﺎﺟﺔ ﻭﻧﺨﺮﺝ ﻓﺤﺎﻟﻲ ﻭﻻ ﻧﺒﻘﻰ ﻣﻌﺎﻫﺎ . ﻭﺑﺎﺵ ﺯﺍﺩﺕ ﺧﺮﺑﻘﺎﺗﻨﻲ ﻭﺗﻠﻔﺎﺗﻨﻲ ﺃﻛﺜﺮ ﻓﺎﺵ ﺷﺎﻓﺘﻨﻲ ﻣﺘﺮﺩﺩ ﺃﻧﻬﺎ ﻗﺎﻟﺖ ﻟﻴﺎ " ﻓﻮﺯﻱ ﺃﻧﺎ ﻣﺎﻛﺎﻧﻤﺎﻧﻌﺶ ﻧﺪﻳﺮ ﻣﻌﺎﻙ ﻋﻼﻗﺔ ".
ﻓﻌﻼ ﻫﻲ ﻛﺎﺗﻌﺠﺒﻨﻲ ﻭﻭﻟﻔﻨﺎ ﺑﻌﻀﻴﺎﺗﻨﺎ ﺑﺰﺍﻑ ﻓﺬﺍﻙ ﺍﻷﺳﺒﻮﻉ ﺩﻳﺎﻝ ﺍﻹﻣﺘﺤﺎﻧﺎﺕ، ﻭﻟﻜﻦ ﺍﻟﻬﻀﺮﺓ ﺩﻳﺎﻟﻨﺎ ﻛﺎﻧﺖ ﻏﻴﺮ ﻋﻠﻰ ﺍﻟﻘﺮﺍﻳﺔ ﻭﻋﻤﺮﻧﻲ ﻣﺎﺟﺒﺪﺕ ﻟﻴﻬﺎ ﻭﻻ ﺟﺒﺪﺍﺕ ﻟﻴﺎ ﻫﻲ ﻣﻮﺿﻮﻉ ﺩﻳﺎﻝ ﺍﻟﺘﺼﺎﺣﻴﺐ، ﺫﺍﻛﺸﻲ ﻋﻼﺵ ﻓﺎﺵ ﻗﺎﻟﺖ ﻟﻴﺎ ﺫﻳﻚ ﺍﻟﻬﻀﺮﺓ ﺗﺒﻠﻮﻛﻴﺖ ﻭﻣﺎﻋﺮﻓﺖ ﻣﺎﻧﻘﻮﻝ ﻟﻴﻬﺎ، ﻭﺣﺘﻰ ﻫﻲ ﺑﻘﺎﺕ ﺳﺎﻛﺘﺔ ﻭﺑﻘﺎﺕ ﻛﺎﺗﺴﻨﺎﻧﻲ ﻧﻬﻀﺮ ﻭﻟﻜﻦ ﻣﺎﻗﻠﺖ ﻭﺍﻟﻮ، ﻭﻫﻲ ﺑﺎﺵ ﺗﻜﺴﺮ ﺍﻟﺼﻤﺖ ﻃﻠﺒﺖ ﻣﻨﻲ ﺃﻧﻨﻲ ﻧﺠﻠﺲ ﻓﻲ ﺍﻟﺼﺎﻟﻮﻥ ﻭﻧﺘﺴﻨﺎﻫﺎ ﺣﺘﻰ ﺗﺠﻴﺐ ﺍﻟﻌﺼﻴﺮ ﻣﻦ ﺍﻟﺜﻼﺟﺔ ﻭﺫﺍﻛﺸﻲ ﺍﻟﻠﻲ ﻛﺎﻥ .
ﺟﻠﺴﺖ ﻭﺷﻌﻠﺖ ﺍﻟﺘﻠﻔﺰﺓ ﻭﺑﻘﻴﺖ ﻛﺎﻧﺘﺴﻨﻰ ﻓﻴﻬﺎ، ﻗﺎﻝ ﻟﻴﺎ ﺭﺍﺳﻲ ﻓﺬﻳﻚ ﺍﻟﻠﺤﻈﺔ ﺃﻧﻨﻲ ﻧﺤﻞ ﺍﻟﺒﺎﺏ ﻭﻧﺨﺮﺝ ﻓﺤﺎﻟﻲ، ﻭﻟﻜﻦ ﺧﻔﺖ ﺗﻘﻮﻝ ﻫﺬﺍ ﻏﻴﺮ ﺧﻮﺍﻑ، ﺫﺍﻛﺸﻲ ﻋﻼﺵ ﺑﻘﻴﺖ ﺟﺎﻟﺲ، ﻭﺑﻘﻴﺖ ﻛﺎﻧﻔﻜﺮ ﻓﺬﺍﻛﺸﻲ ﺍﻟﻠﻲ ﻗﺎﻟﺖ ﻟﻴﺎ ﻭﺫﺍﻛﺸﻲ ﺍﻟﻠﻲ ﺧﺎﺻﻨﻲ ﻧﻘﻮﻝ ﻟﻴﻬﺎ ﻓﺎﺵ ﺗﺠﻲ . ﺩﺍﺯﺕ ﺗﻘﺮﻳﺒﺎ 10 ﺩﻳﺎﻝ ﺍﻟﺪﻗﺎﺋﻖ ﻭﺃﻧﺎ ﻧﻌﻴﻂ ﻋﻠﻴﻬﺎ، ﻭﻗﺎﻟﺖ ﻟﻴﺎ ﺃﻧﻬﺎ ﻏﺎﺩﻱ ﺗﺠﻲ ﺩﺍﺑﺎ . ﻭﻓﻌﻼ ﺟﺎﺕ ﺩﺍﻓﻌﺔ ﻃﺒﻠﺔ ﻓﻴﻬﺎ ﺍﻟﻌﺼﻴﺮ ﻭﺍﻟﺤﻠﻮﻯ، ﻭﻟﻜﻦ ﻫﺎﺫ ﺍﻟﻤﺮﺓ ﺑﺪﻻﺕ ﺣﻮﺍﻳﺠﻬﺎ ﻭﻟﺒﺴﺎﺕ ﺷﻮﺭﺕ ﻗﺼﻴﺮ ﺑﺰﺍﻑ، ﻭﻭﺍﺣﺪ " ﺩﻳﺒﺎﺭﺩﻭﺭ " ﻣﻌﻴﻖ ﺷﻮﻳﺔ، ﻭﺣﺘﻰ ﻭﺟﻬﻬﺎ ﻛﺜﺮﺍﺕ ﻟﻴﻪ ﺍﻟﻤﺎﻛﻴﺎﺝ، " ﺍﻟﻤﺎﺳﻜﺎﺭﺍ " ﻭ " ﺍﻷﻱ ﻻﻳﻨﺮ " ﻭﺣﺘﻰ ﺍﻟﻌﺪﺳﺎﺕ ﺯﺭﻗﻴﻦ ﺩﺍﺭﺗﻬﻮﻡ ﻓﻌﻴﻨﻴﻬﺎ، ﻭﺭﻳﺤﺔ " ﻛﻮﻛﻮ ﺷﺎﻧﻴﻞ " ﺍﻟﻠﻲ ﻛﺎﺗﻌﺠﺒﻨﻲ ﺣﺘﻰ ﻫﻲ ﻋﺎﻃﻴﺔ ﺭﻳﺤﺘﻬﺎ .
ﺗﺎﻳﻘﻮﻟﻮ ﺍﻟﺮﺟﺎﻝ ﻛﺎﻳﻌﺠﺒﻬﻮﻡ ﺍﻟﺠﻤﺎﻝ ﺍﻟﻄﺒﻴﻌﻲ ﻭﻣﺎﻛﻴﺤﻤﻠﻮﺵ ﺍﻟﺒﻨﺖ ﺍﻟﻠﻲ ﻛﺎﺗﻜﺜﺮ ﺍﻟﻤﺎﻛﻴﺎﺝ، ﺃﻧﺎ ﻣﺎﺷﻲ ﺑﺤﺎﻟﻬﻮﻡ ﻭﻛﺎﻧﻤﻮﺕ ﻓﻲ ﺍﻟﺒﻨﺎﺕ ﺍﻟﻠﻲ ﻛﺎﻳﺪﻳﺮﻭﻩ . ﻏﻴﺮ ﺷﻔﺘﻬﺎ ﻭﺃﻧﺎ ﻧﺘﻠﻒ ﻭﺣﺘﻰ ﺍﻟﻬﻀﺮﺓ ﺍﻟﻠﻲ ﺣﻔﻈﺘﻬﺎ ﻓﺎﺵ ﻛﻨﺖ ﺟﺎﻟﺲ ﻛﺎﻧﺘﺴﻨﻰ ﻓﻴﻬﺎ ﻣﺎﺑﻐﺎﺗﺶ ﺗﺨﺮﺝ ﻟﻴﺎ ....
ﺍﻟﺤﻠﻘﺔ 7
ﻛﺎﺗﻜﺐ ﻟﻴﺎ ﻓﻲ ﺍﻟﻌﺼﻴﺮ ﻭﻫﻲ ﻭﺍﻗﻔﺔ ﻣﺎﻳﻠﺔ ﻗﺒﺎﻟﺘﻲ ﻭﺻﺪﺭﻫﺎ ﻛﺎﻣﻠﻮ ﺗﻘﺮﻳﺒﺎ ﻛﺎﻳﺒﺎﻥ، ﻭﺣﺴﻴﺖ ﺑﺄﻥ ﺫﻳﻚ ﺍﻟﺜﻮﺍﻧﻲ ﺍﻟﻘﻠﻴﻠﺔ ﻃﻮﻳﻠﺔ ﻭﻣﺎﺑﻐﺎﺗﺶ ﺗﺴﺎﻟﻲ، ﻣﺎﻋﺮﻓﺘﺶ ﺃﺵ ﺧﺎﺻﻨﻲ ﻧﻘﻮﻝ ﻭﻻ ﻧﺪﻳﺮ ﻗﺪﺍﻡ ﻫﺎﺫ ﺍﻟﻤﻮﻗﻒ، ﺑﻘﺎﺕ ﻭﺍﻗﻔﺔ ﻭﻛﺎﺗﺸﻮﻑ ﻓﻴﺎ ﻭﻛﺎﺗﻀﺤﻚ ﺑﻮﺍﺣﺪ ﺍﻟﻄﺮﻳﻘﺔ ﻓﺸﻲ ﺷﻜﻞ، ﻭﻏﻴﺮ ﺍﻟﻤﻜﻠﺦ ﺍﻟﻠﻲ ﻣﺎﻏﺎﺩﻳﺶ ﻳﻔﻬﻢ ﺃﺵ ﻛﺎﺗﻘﺼﺪ ﺑﺬﻭﻙ ﺍﻟﺤﺮﻛﺎﺕ . ﻣﺎﺷﻌﺮﺗﺶ ﺑﺮﺍﺳﻲ ﺣﺘﻰ ﺷﺪﻳﺘﻬﺎ ﻣﻦ ﻳﺪﻳﻬﺎ ﺑﺸﻮﻳﺔ ﻭﺟﻠﺴﺘﻬﺎ ﺣﺪﺍﻳﺎ، ﻭﺣﺘﻰ ﻫﻲ ﻃﺎﻭﻋﺎﺗﻨﻲ ﻭﺟﺎﺕ ﺟﻠﺴﺖ ﺣﺪﺍﻳﺎ ﻭﺩﺍﺭﺕ ﺭﺍﺳﻬﺎ ﺑﺤﺎﻻ ﺣﺸﻤﺎﻧﺔ .
ﺻﺎﻓﻲ ﻓﺬﻳﻚ ﺍﻟﻠﺤﻈﺔ ﺣﺴﻴﺖ ﺑﺮﺍﺳﻲ ﺑﺤﺎﻻ ﺗﻘﻄﻌﻮ ﻟﻴﺎ ﺍﻟﻔﺮﺍﻧﺎﺕ، ﻭﻣﺎﺑﻘﻴﺘﺶ ﺫﺍﻙ ﻓﻮﺯﻱ ﺍﻟﺸﺨﺺ ﺍﻟﻤﻬﺪﻥ ﻭﺍﻟﺨﺠﻮﻝ . ﺑﺴﺘﻬﺎ ﻓﻲ ﺣﻨﻜﻬﺎ ﻭﻓﻤﻬﺎ ﻭﺣﺘﻰ ﻳﺪﻳﻬﺎ ﻭﺫﺭﺍﻋﻬﺎ، ﻭﻟﻜﻦ ﻏﻴﺮ ﻗﺮﺑﺖ ﻟﻌﻨﻘﻬﺎ ﻭﻫﻲ ﺗﺴﺪ ﻋﻴﻨﻴﻬﺎ ﻭﺑﺪﺍﺕ ﻛﺎﺗﻠﻮﻯ، ﻣﻦ ﺗﻤﺎ ﻋﺮﻓﺖ ﺃﻥ ﻫﺎﺫﻳﻚ ﻫﻲ ﻧﻘﻄﺔ ﺍﻟﻀﻌﻒ ﺩﻳﺎﻟﻬﺎ ﻭﺑﻘﻴﺖ ﻛﺎﻧﺒﻮﺱ ﻓﻴﻬﺎ ﻏﻴﺮ ﻓﻌﻨﻘﻬﺎ ﺣﺘﻰ ﻭﻗﻔﺖ ﻭﺷﺪﺍﺗﻨﻲ ﻣﻦ ﻳﺪﻱ ﻭﻃﻠﺒﺖ ﻣﻨﻲ ﻧﻤﺸﻴﻮ ﻟﺒﻴﺘﻬﺎ .
ﻧﺴﻴﺖ ﻣﺎﻧﻘﻮﻟﻴﻜﻮﻡ ﺃﻧﻨﻲ ﻋﻨﺪﻱ ﻫﻮﺱ ﻣﻦ ﺍﻷﻣﺮﺍﺽ ﺍﻟﻤﻨﻘﻮﻟﺔ ﺟﻨﺴﻴﺎ، ﺇﻳﻼ ﻛﺎﻧﻮﺍ ﺑﻌﺾ ﺍﻟﻨﺎﺱ ﻋﻨﺪﻫﻢ ﻓﻮﺑﻴﺎ ﻣﻦ ﺍﻷﻣﺎﻛﻦ ﺍﻟﻌﺎﻟﻴﺔ ﺃﻭ ﺍﻟﺒﻼﻳﺺ ﺍﻟﻀﻴﻘﺔ، ﻓﺄﻧﺎ ﺍﻟﺨﻮﻑ ﺩﻳﺎﻟﻲ ﺍﻟﻮﺣﻴﺪ ﻣﻦ ﻓﺎﺵ ﻛﻨﺖ ﺻﻐﻴﺮ ﻫﻮ ﺍﻷﻣﺮﺍﺽ ﺍﻟﻤﻨﻘﻮﻟﺔ ﺟﻨﺴﻴﺎ ﻭﺑﺎﻷﺧﺺ ﺍﻟﺴﻴﺪﺍ . ﻓﺎﺵ ﺷﻔﺘﻬﺎ ﺗﻌﺮﺍﺕ ﻛﺎﻣﻠﺔ ﻓﻜﺮﺕ ﺃﻧﻨﻲ ﻧﺘﺮﺍﺟﻊ ﻭﻧﻤﺸﻲ ﻓﺤﺎﻟﻲ ﻷﻥ ﺣﺘﻰ ﺍﻟﻮﺍﻗﻲ ﺍﻟﺬﻛﺮﻱ ﻣﺎﻛﺎﻧﺶ ﻋﻨﺪﻱ ﺫﻳﻚ ﺍﻟﺴﺎﻋﺔ، ﻭﺍﻟﻴﻮﻡ ﺍﻷﺣﺪ ﻛﻮﻟﺸﻲ ﺍﻟﺼﻴﺪﻟﻴﺎﺕ ﺳﺎﺩﻳﻦ . ﺑﺼﺢ ﺃﻧﻪ ﻛﺎﻥ ﻋﻨﺪﻱ ﻋﻼﻗﺎﺕ ﺟﻨﺴﻴﺔ ﻣﻦ ﻗﺒﻞ ﻛﺄﻱ ﺷﺨﺺ ﻓﻲ ﺍﻟﺴﻦ ﺩﻳﺎﻟﻲ، ﻭﻟﻜﻦ ﻛﺎﻧﺖ ﻛﻠﻬﺎ ﻋﻼﻗﺎﺕ ﻣﺤﻤﻴﺔ . ﻭﻟﻜﻦ ﻓﺬﻳﻚ ﺍﻟﻠﺤﻈﺔ ﻣﺎﻋﺮﻓﺘﺶ ﺃﺵ ﺩﻫﺎﻧﻲ ﻭﻣﺎﺑﻘﻴﺖ ﻛﺎﻧﻔﻜﺮ ﻓﻮﺍﻟﻮ ﻏﻴﺮ ﻓﻲ ﻧﺴﺮﻳﻦ ﺍﻟﻠﻲ ﻗﺪﺍﻣﻲ ﻭﻣﺎﺩﺍ ﻟﻴﺎ ﻳﺪﻳﻬﺎ ﻭﺣﺘﻰ ﺃﻧﺎ ﻣﺎﻗﺪﺭﺗﺶ ﻧﻘﺎﻭﻡ .
ﻓﺎﺵ ﺳﺎﻟﻴﻨﺎ ﻟﺒﺴﻨﺎ ﺣﻮﺍﻳﺠﻨﺎ ﻭﻛﻞ ﻭﺍﺣﺪ ﺣﺸﻤﺎﻥ ﻣﻦ ﺍﻷﺧﺮ ﻷﻥ ﺍﻟﻌﻼﻗﺔ ﺩﻳﺎﻟﻨﺎ ﻣﻦ ﻗﺒﻞ ﻛﺎﻧﺖ ﻏﻴﺮ ﻋﻼﻗﺔ ﺻﺪﺍﻗﺔ ﺣﺘﻰ ﻭﻗﻊ ﺍﻟﻠﻲ ﻭﻗﻊ ﺩﺍﺑﺎ، ﻧﻀﺖ ﺑﻐﻴﺖ ﻧﺮﺟﻊ ﻓﺤﺎﻟﻲ ﻭﺗﺒﻌﺎﺗﻨﻲ ﺑﺎﺵ ﺗﺴﺪ ﻣﻦ ﻭﺭﺍﻳﺎ ﺍﻟﺒﺎﺏ، ﻭﻗﺒﻞ ﻣﺎﺗﺴﺪﻭ ﻗﺎﻟﺖ ﻟﻴﺎ " ﺷﻜﺮﺍ ". ﺫﻳﻚ ﺷﻜﺮﺍ ﺩﻳﺎﻟﻬﺎ ﺻﺪﻣﺎﺗﻨﻲ ﻭﺟﺮﺣﺎﺗﻨﻲ، ﻓﻬﻤﺖ ﻣﻦ ﺧﻼﻟﻬﺎ ﺃﻧﻬﺎ ﻏﻴﺮ ﺩﻭﺯﺍﺕ ﺑﻴﺎ ﺍﻟﻮﻗﺖ ﻭﺻﺎﻓﻲ ﻭﻣﺎﻛﺎﺗﺒﺎﺩﻟﻨﻴﺶ ﻧﻔﺲ ﺍﻟﻤﺸﺎﻋﺮ، ﻣﺎﺟﺎﻭﺑﺘﻬﺎﺵ ﻭﺩﺧﻠﺖ ﻟﻠﺪﺍﺭ .
ﻓﺬﻳﻚ ﺍﻟﻠﻴﻠﺔ ﺭﺟﻌﺖ ﺍﻟﺴﻴﻨﺘﺔ ﺍﻟﻠﻮﺭ ﻭﺑﺪﻳﺖ ﻛﺎﻧﻔﻜﺮ ﻓﺬﺍﻛﺸﻲ ﺍﻟﻠﻲ ﻭﻗﻊ، ﻭﻋﺮﻓﺖ ﺍﻟﺨﻄﺄ ﺍﻟﻜﺒﻴﺮ ﺍﻟﻠﻲ ﺩﺭﺗﻮ ﻣﻊ ﻧﺴﺮﻳﻦ، ﻛﻴﻔﺎﺵ ﺩﺭﺕ ﺃﻧﺎ ﺍﻟﺜﻘﺔ ﻓﻮﺣﺪﺓ ﻣﺎﻋﻨﺪﻫﺎﺵ ﺍﻟﻌﺬﺭﻳﺔ، ﻋﻠﻢ ﺍﻟﻠﻪ ﺷﺤﺎﻝ ﻣﻦ ﻭﺍﺣﺪ ﺩﺍﺭﺕ ﻣﻌﺎﻩ ﺑﺤﺎﻝ ﻫﺎﻛﺎ، ﻭﻣﺎﺷﻲ ﺑﻌﻴﺪ ﺣﺘﻰ ﻫﺎﺫﻭﻙ ﺍﻟﻌﻼﻗﺎﺕ ﺩﻳﺎﻟﻬﺎ ﺍﻟﻠﻲ ﻣﻦ ﻗﺒﻞ ﻣﺎﻛﺎﻧﺘﺶ ﻣﺤﻤﻴﺔ .
ﻓﺬﻭﻙ ﺟﻮﺝ ﺍﻷﺳﺎﺑﻴﻊ ﺍﻟﻠﻲ ﻣﻦ ﺑﻌﺪ ﻃﻔﻴﺖ ﺍﻟﺘﻠﻴﻔﻮﻥ ﺩﻳﺎﻟﻲ ﻭﺳﺪﻳﺖ ﺍﻟﻔﺎﻳﺴﺒﻮﻙ، ﻭﺣﺘﻰ ﻓﺎﺵ ﻛﺎﻧﻜﻮﻥ ﻃﺎﻟﻊ ﻣﻊ ﺍﻟﺪﺭﻭﺝ ﺩﻳﺎﻝ ﺍﻟﻌﻤﺎﺭﺓ ﻛﺎﻧﻄﻠﻊ ﺑﺎﻟﺠﺮﻯ ﺑﺎﺵ ﻣﺎﻧﺘﻼﻗﺎﺵ ﻣﻌﺎﻫﺎ . ﺣﺎﻭﻟﺖ ﻧﺸﻐﻞ ﺭﺍﺳﻲ ﺑﺸﻲ ﺣﺎﺟﺔ ﻭﻣﺎﻧﺨﻠﻴﺶ ﺫﻭﻙ ﺍﻟﻬﻮﺍﺟﺲ ﻭﺍﻟﺨﻮﻑ ﻣﻦ ﺍﻷﻣﺮﺍﺽ ﺍﻟﺠﻨﺴﻴﺔ ﺗﺴﻴﻄﺮ ﻋﻠﻴﺎ، ﺑﺪﻳﺖ ﻛﺎﻧﻤﺸﻲ ﻟﻠﺒﺤﺮ ﺃﻧﺎ ﻭﺍﻟﺪﺭﺍﺭﻱ ﺻﺤﺎﺑﻲ ﻓﻲ ﺍﻟﺼﺒﺎﺡ، ﻭﻓﻲ ﺍﻟﻌﺸﻴﺔ ﻛﺎﻧﻤﺸﻴﻮ " ﻻﺳﺎﻝ " ﻣﺠﻤﻮﻋﻴﻦ ﻛﺎﻧﺘﺮﻳﻨﻮ . ﻛﻞ ﺷﻲﺀ ﻛﺎﻥ ﻃﺒﻴﻌﻲ ﺣﺘﻰ ﻟﻮﺍﺣﺪ ﺍﻟﻠﻴﻠﺔ ﺟﺎﺗﻨﻲ ﺍﻟﻔﻴﻘﺔ ﻣﻊ ﺍﻟﺮﺑﻌﺔ ﺩﻳﺎﻝ ﺍﻟﺼﺒﺎﺡ ﻭﻟﺤﻤﻲ ﻛﻠﻮ ﻛﺎﻳﺎﻛﻠﻨﻲ...
ﺍﻟﺤﻠﻘﺔ 8
ﻧﻀﺖ ﻣﻦ ﺑﻼﺻﺘﻲ ﻣﺨﻠﻮﻉ ﻭﻣﺸﻴﺖ ﻛﺎﻧﺠﺮﻱ ﻟﻠﺤﻤﺎﻡ ﻭﻟﺤﻤﻲ ﻛﻠﻮ ﻛﺎﻳﺎﻛﻠﻨﻲ، ﺷﻔﺖ ﺭﺍﺳﻲ ﻓﻲ ﺍﻟﻤﺮﺍﻳﺎ ﺑﺎﻧﻮ ﻟﻴﺎ ﻋﻴﻨﻲ ﺣﻤﺮﻳﻦ . ﺻﺎﻓﻲ ﺫﻳﻚ ﺍﻟﺴﺎﻋﺔ ﺷﺪﻳﺖ ﻓﺮﺍﺳﻲ ﻭﺟﺎﺗﻨﻲ ﺍﻟﺪﻭﺧﺔ، ﻭﺭﺟﻌﺖ ﻟﺒﻼﺻﺘﻲ ﻭﺑﻘﻴﺖ ﻏﻴﺮ ﻛﺎﻧﻔﻜﺮ . ﻃﺎﺭ ﻋﻠﻴﺎ ﺍﻟﻨﻌﺎﺱ ﺫﻳﻚ ﺍﻟﻠﻴﻠﺔ ﻭﺟﺎﻧﻲ ﻋﺎﻭﺗﺎﻧﻲ ﺍﻟﻮﺳﻮﺍﺱ ﺃﻧﻨﻲ ﻧﻜﻮﻥ ﻟﺼﻖ ﻓﻴﺎ ﺷﻲ ﻣﺮﺽ ﺟﻨﺴﻲ ﻣﻦ ﻫﺎﺫﻳﻚ ﺍﻟﻘﻤﻘﻮﻣﺔ ﺩﻳﺎﻝ ﻧﺴﺮﻳﻦ . ﻣﺎﻗﺪﺭﺗﺶ ﻧﺘﺴﻨﻰ ﺣﺘﻰ ﻳﻄﻠﻊ ﺍﻟﺼﺒﺎﺡ ﻭﻣﺸﻴﺖ ﻛﺎﻧﻘﻠﺐ ﻋﻠﻰ ﺗﻠﻴﻔﻮﻧﻲ، ﻏﻴﺮ ﺷﻌﻠﺘﻮ ﺟﺎﻭﻧﻲ ﺑﺰﺍﻑ ﺩﻳﺎﻝ ﺍﻟﻤﻴﺴﺎﺟﺎﺕ ﺩﻗﺔ ﻭﺣﺪﺓ ﻛﺎﻧﻮﺍ ﺗﺼﻴﻔﻄﻮ ﻓﺬﻳﻚ ﺍﻟﻔﺘﺮﺓ ﺍﻟﻠﻲ ﻛﻨﺖ ﻃﺎﻓﻴﻪ ﻓﻴﻬﺎ، ﻭﻣﻦ ﺑﻴﻦ ﻫﺎﺫﻭﻙ ﺍﻟﻤﻴﺴﺎﺟﺎﺕ ﻟﻘﻴﺖ ﻭﺍﺣﺪ ﺍﻟﻤﻴﺴﺎﺝ ﺧﻠﻌﻨﻲ ﻭﺩﺍﺭ ﻓﻴﺎ ﺍﻟﺬﻋﺮ ﻭﺍﺧﺎ ﻳﻘﺪﺭ ﻳﺒﺎﻥ ﻟﻠﺒﻌﺾ ﺃﻧﻪ ﻣﻴﺴﺎﺝ ﻋﺎﺩﻱ .
ﻟﻘﻴﺖ ﻧﺴﺮﻳﻦ ﻣﺴﻴﻔﻄﺎ ﻟﻴﺎ ﻣﻴﺴﺎﺝ ﻣﻜﺘﻮﺏ ﻓﻴﻪ " ﻓﻮﺯﻱ ﺑﻐﻴﺖ ﻧﻘﻮﻝ ﻟﻴﻚ ﺷﻲ ﻛﻼﻡ ﻣﻬﻢ ﺑﺰﺍﻑ " ﻭﻃﻠﺒﺖ ﻣﻨﻲ ﺃﻧﻨﻲ ﻧﺘﺼﻞ ﺑﻴﻬﺎ . ﺇﻳﻨﺎ ﻛﻼﻡ ﻣﻬﻢ ﺑﻐﺎﺕ ﺗﻘﻮﻝ ﻟﻴﺎ ﻫﺎﺫﻱ؟ ﺃﻭﻝ ﺣﺎﺟﺔ ﺟﺎﺗﻨﻲ ﻓﺒﺎﻟﻲ ﺃﻥ ﻧﺴﺮﻳﻦ ﺑﻐﺎﺕ ﺗﺼﺎﺭﺣﻨﻲ ﺑﺄﻥ ﻓﻴﻬﺎ ﺍﻟﺴﻴﺪﺍ ﺃﻭ ﺷﻲ ﻣﺮﺽ ﺃﺧﺮ، ﺣﺎﻭﻟﺖ ﻧﺘﺼﻞ ﺑﻴﻬﺎ ﻓﺬﻳﻚ ﺍﻟﺴﺎﻋﺔ ﺍﻟﻤﺘﺄﺧﺮﺓ ﻣﻦ ﺍﻟﻠﻴﻞ ﻟﻜﻦ ﻟﻘﻴﺖ ﺍﻟﺘﻠﻴﻔﻮﻥ ﺩﻳﺎﻟﻬﺎ ﻃﺎﻓﻲ . ﺑﻘﻴﺖ ﻛﺎﻧﻔﻜﺮ ﻭﻧﻔﻜﺮ ﺣﺘﻰ ﻣﺎﺷﻌﺮﺗﺶ ﺑﺮﺍﺳﻲ ﺣﺘﻰ ﺩﺍﻧﻲ ﺍﻟﻨﻌﺎﺱ ﻭﺟﺎﺗﻨﻲ ﺫﻳﻚ ﺍﻟﻠﻴﻠﺔ ﺑﺰﺍﻑ ﺩﻳﺎﻝ ﺍﻟﻜﻮﺍﺑﻴﺲ ﻭﺍﻷﺣﻼﻡ ﺍﻟﺨﺎﻳﺒﺔ .
ﻓﻘﺖ ﻓﻲ ﺍﻟﺼﺒﺎﺡ ﻣﺎﺑﻘﺎﺗﺶ ﻓﻴﺎ ﺫﻳﻚ ﺍﻟﺤﻜﺔ ﺍﻟﻠﻲ ﻛﺎﻧﺖ ﺍﻟﺒﺎﺭﺡ، ﻟﻜﻦ ﺣﺴﻴﺖ ﺑﻌﻈﺎﻣﻲ ﺛﻘﺎﻝ ﻭﺣﻼﻗﻤﻲ ﻛﺎﻳﻀﺮﻭﻧﻲ ﻭﻓﻴﺎ ﺷﻮﻳﺔ ﺩﻳﺎﻝ ﺍﻟﺪﻭﺧﺔ، ﺩﺭﺕ ﺍﻟﻤﻴﺰﺍﻥ ﺩﻳﺎﻝ ﺍﻟﺤﺮﺍﺭﺓ ﻟﻘﻴﺖ ﻓﻴﺎ ° 38.5 ، ﺷﺮﺑﺖ ﻭﺍﺣﺪ ﺍﻟﺪﻭﺍﺀ ﺑﺎﺵ ﺗﻬﺒﻂ ﻟﻴﺎ ﺍﻟﺤﺮﺍﺭﺓ ﻭﻋﺎﻭﺩﺕ ﻋﻴﻄﺖ ﻟﻨﺴﺮﻳﻦ ﻟﻜﻦ ﺩﻳﻤﺎ ﺍﻟﺘﻠﻴﻔﻮﻥ ﺩﻳﺎﻟﻬﺎ ﻃﺎﻓﻲ . ﻓﺎﺵ ﺣﺴﻴﺖ ﺑﺮﺍﺳﻲ ﺷﻮﻳﺔ ﺑﺪﻳﺖ ﻛﺎﻧﻘﻠﺐ ﻓﻲ ﺍﻷﻧﺘﺮﻧﻴﺖ ﻋﻠﻰ ﺃﻋﺮﺍﺽ ﻣﺮﺽ ﺍﻟﺴﻴﺪﺍ، ﻓﻲ ﺍﻷﻭﻝ ﻟﻘﻴﺖ ﺑﺄﻥ ﺍﻷﻋﺮﺍﺽ ﺩﻳﺎﻟﻬﺎ ﻣﺎﻛﻴﺒﺎﻧﻮ ﺣﺘﻰ ﻛﺎﻳﺪﻭﺯﻭ ﺳﻨﻮﺍﺕ ﻣﻦ ﻭﺭﺍﺀ ﺍﻹﺻﺎﺑﺔ ﺑﻴﻬﺎ، ﻭﻟﻜﻦ ﻓﺎﺵ ﺑﻘﻴﺖ ﻛﺎﻧﻘﻠﺐ ﻣﺰﻳﺎﻥ ﻟﻘﻴﺖ ﺑﺄﻥ ﻛﺎﻳﻨﺔ ﻣﺮﺣﻠﺔ ﺳﻤﻴﺘﻬﺎ ﺍﻟﻌﺪﻭﻯ ﺍﻷﻭﻟﻴﺔ " Primo infection VIH " ﻭﻛﺎﺗﺒﺎﻥ ﻣﻦ ﺑﻌﺪ 2 ﺣﺘﺎﻝ 6 ﺍﻷﺳﺎﺑﻴﻊ ﺍﻷﻭﻟﻰ ﻣﻦ ﻭﺭﺍﺀ ﺍﻟﻌﺪﻭﻯ، ﻭﺗﺼﺪﻣﺖ ﻓﺎﺵ ﻗﺮﻳﺖ ﺃﻥ ﺍﻷﻋﺮﺍﺽ ﺩﻳﺎﻟﻬﺎ ﻫﻲ ﻧﻔﺴﻬﺎ ﺍﻷﻋﺮﺍﺽ ﺍﻟﻠﻲ ﻛﺎﻳﻨﺔ ﻓﻴﺎ ﺩﺍﺑﺎ .
ﻣﺎﻗﺪﺭﺗﺶ ﺑﺎﻗﻲ ﻣﺎﺯﺍﻝ ﻧﺼﺒﺮ، ﺣﺎﻭﻟﺖ ﻧﻌﻴﻂ ﻋﻠﻰ ﻧﺴﺮﻳﻦ ﻣﺮﺓ ﺃﺧﻴﺮﺓ ﻟﻘﻴﺖ ﺗﻠﻴﻔﻮﻧﻬﺎ ﻃﺎﻓﻲ، ﻭﻓﻜﺮﺕ ﺃﻧﻨﻲ ﻧﺪﻭﺯ ﻋﻨﺪﻫﺎ ﻟﻠﺪﺍﺭ ﻭﻟﻜﻦ ﺷﻔﺖ ﺍﻟﻄﻮﻣﻮﺑﻴﻼ ﺩﻳﺎﻝ ﺧﺎﻟﺘﻬﺎ ﺗﺤﺖ ﺍﻟﻌﻤﺎﺭﺓ ﻭﻣﺎﺯﻋﻤﺘﺶ ﻧﺪﻕ ﻋﻠﻴﻬﺎ، ﻭﺭﺑﻤﺎ ﺣﺘﻰ ﻧﺴﺮﻳﻦ ﻏﺎﺩﻱ ﺗﻜﻮﻥ ﻓﻲ ﺍﻟﺨﺪﻣﺔ . ﻟﺒﺴﺖ ﺣﻮﺍﻳﺠﻲ ﻭﺧﺬﻳﺖ ﻃﺎﻛﺴﻲ ﻣﺒﺎﺷﺮﺓ ﻟﻤﺮﻛﺰ ﺍﻟﻨﺪﺍﺀ ﺍﻟﻠﻲ ﺧﺪﺍﻣﺔ ﻓﻴﻪ، ﻛﺎﻧﺖ ﺍﻟﺴﺎﻋﺔ ﺗﻘﺮﻳﺒﺎ 11 ﻭﻧﺼﻒ ﻓﺎﺵ ﻭﺻﻠﺖ ﺗﻤﺎ، ﺳﻮﻟﺖ ﺣﺎﺭﺱ ﺍﻟﻌﻤﺎﺭﺓ ﻋﻠﻴﻬﺎ ﻗﺎﻟﻴﺎ ﻣﺎﻛﺎﻳﻌﺮﻓﻬﺎﺵ ﻭﻟﻜﻦ ﻛﻮﻟﺸﻲ ﺍﻟﻠﻲ ﺧﺪﺍﻣﻴﻦ ﻏﺎﺩﻱ ﻳﺨﺮﺟﻮ ﻣﻊ 12. ﺑﺎﻧﺖ ﻟﻴﺎ ﻭﺍﺣﺪ ﺍﻟﻘﻬﻮﺓ ﻣﻘﺎﺑﻠﺔ ﻣﻊ ﺍﻟﻌﻤﺎﺭﺓ ﻓﻴﻦ ﺧﺪﺍﻣﺔ ﻭﻣﺸﻴﺖ ﺟﻠﺴﺖ ﻓﻴﻬﺎ، ﺩﺍﺯﺕ ﺗﻘﺮﻳﺒﺎ ﺛﻠﺚ ﺳﺎﻋﺔ ﻭﻫﻲ ﺗﺒﺎﻥ ﻟﻴﺎ ﺧﺎﺭﺟﺔ ﻣﻦ ﺍﻟﺒﺎﺏ ﻣﻊ ﺷﻲ ﺑﻨﺎﺕ . ﻧﻀﺖ ﺑﺤﺎﻝ ﺍﻷﺣﻤﻖ ﻛﺎﻧﺠﺮﻱ ﻭﻣﺸﻴﺖ ﺟﺮﻳﺘﻬﺎ ﻣﻦ ﻳﺪﻳﻬﺎ ﺑﺠﻬﺪ ﺣﺘﻰ ﺗﺨﻠﻌﺎﺕ ﻭﺍﺣﺪ ﺍﻟﺒﻨﺖ ﻛﺎﻧﺖ ﻏﺎﺩﻳﺔ ﻣﻌﺎﻫﺎ، ﻭﻗﻠﺖ ﻟﻴﻬﺎ ﺃﻧﻨﻲ ﺑﺎﻏﻲ ﻧﻬﻀﺮ ﻣﻌﺎﻙ .
ﺩﻳﺘﻬﺎ ﻟﻠﻘﻬﻮﺓ ﺍﻟﻠﻲ ﻛﻨﺖ ﻣﺮﻳﺢ ﻓﻴﻬﺎ، ﻟﻘﻴﺖ " ﺍﻟﺴﺮﺑﺎﻱ " ﻛﺎﻳﻤﺴﺢ ﺍﻟﻄﺒﻠﺔ ﺩﻳﺎﻝ ﻭﺍﺣﺪ ﺍﻟﺴﻴﺪ ﻛﺎﻥ ﺟﺎﻟﺲ ﺣﺪﺍﻳﺎ، ﻗﺎﻟﻴﺎ ﺍﻟﺴﺮﺑﺎﻱ ﺃﻧﻨﻲ ﺿﺮﺑﺖ ﻟﻴﻪ ﻃﺒﻠﺘﻮ ﺑﻼ ﻣﺎﻧﺸﻌﺮ ﻭﺗﺨﻮﺍﺕ ﺍﻟﻘﻬﻮﺓ، ﻭﻃﻠﺒﺖ ﻣﻨﻮ ﻳﻌﻄﻴﻪ ﻗﻬﻮﺓ ﺃﺧﺮﻯ ﻋﻠﻰ ﺣﺴﺎﺑﻲ . ﻣﺎﺯﺍﻝ ﻛﺎﻉ ﻣﺎﺟﻠﺴﺖ ﻓﻮﻕ ﺍﻟﻜﺮﺳﻲ ﻭﺃﻧﺎ ﻧﺴﻮﻝ ﻧﺴﺮﻳﻦ : " ﻗﻮﻟﻲ ﻟﻴﺎ ﻭﺍﺵ ﻓﻴﻚ ﺍﻟﺴﻴﺪﺍ؟ ". ﻣﺎﺟﺎﻭﺑﺎﺗﻨﻴﺶ ﻭﺑﻘﺎﺕ ﺳﺎﻛﺘﺔ ﻭﻛﺎﺗﺸﻮﻑ ﻓﻴﺎ، ﻭﺣﺴﻴﺖ ﺑﺬﻭﻙ ﺍﻟﺜﻮﺍﻧﻲ ﺃﻧﻬﻢ ﺍﻷﻃﻮﻝ ﻓﺤﻴﺎﺗﻲ ﻛﺎﻣﻠﺔ...
اﻟﺤﻠﻘﺔ 9
ﺑﻘﺎﺕ ﺳﺎﻛﺘﺔ ﻣﺎﺟﺎﻭﺑﺎﺗﻨﻴﺶ ﻭﺃﻧﺎ ﻛﺎﻧﺘﺴﻨﺎﻫﺎ ﺗﻬﻀﺮ ﺗﻘﻮﻝ ﺃﻱ ﺣﺎﺟﺔ ﺍﻟﻤﻬﻢ ﺗﺪﻭﻱ، ﺷﺎﻓﺖ ﻓﻴﺎ ﻟﻘﺎﺗﻨﻲ ﻣﺨﺮﺝ ﻓﻴﻬﺎ ﻋﻴﻨﻲ ﻭﻃﺎﻟﻊ ﻟﻴﺎ ﺍﻟﺪﻡ ﻭﺑﺪﺍﺕ ﻛﺎﺗﻀﺤﻚ ﻋﻠﻴﺎ : " ﻭﺍﺵ ﺟﻴﺘﻲ ﻋﻨﺪﻱ ﺣﺘﺎﻝ ﻫﻨﺎ ﺑﺎﺵ ﺗﺴﻮﻟﻨﻲ ﻭﺍﺵ ﻓﻴﺎ ﺍﻟﺴﻴﺪﺍ ﻭﻻ ﻻ، ﺇﻳﻮﺍ ﺃﺳﻴﺪﻱ ﻫﻨﻲ ﺭﺍﺳﻚ ﻣﺎﻓﻴﺎ ﻭﺍﻟﻮ ". ﺳﻮﻟﺘﻬﺎ ﻋﺎﻭﺗﺎﻧﻲ ﻭﺍﺵ ﻫﻲ ﻣﺘﺄﻛﺪﺓ ﺟﺎﻭﺑﺎﺗﻨﻲ ﻗﺎﻟﺖ ﻟﻴﺎ ﺁﻩ، ﻭﺃﻧﻬﺎ ﺩﺍﺭﺕ " ﺩﻳﺒﻴﺴﺘﺎﺝ " ﺩﻳﺎﻝ ﺍﻟﺴﻴﺪﺍ ﻫﺎﺫﻱ ﺷﻬﺮﻳﻦ ﻭﺍﻟﻨﺘﻴﺠﺔ ﻛﺎﻧﺖ ﻣﺰﻳﺎﻧﺔ، ﻭﺃﻥ ﺍﻟﻮﺭﻗﺔ ﻣﺎﺯﺍﻝ ﻋﻨﺪﻫﺎ ﻭﻣﻤﻜﻦ ﺗﻌﻄﻴﻬﺎ ﻟﻴﺎ ﻓﺎﺵ ﺗﺮﺟﻊ ﻟﻠﺪﺍﺭ .
ﻓﺎﺵ ﺗﻤﻴﻨﺎ ﻃﺎﻟﻌﻴﻦ ﻣﻊ ﺍﻟﺪﺭﻭﺝ ﻋﺎﻭﺩﺕ ﺫﻛﺮﺗﻬﺎ ﺑﺎﺵ ﺗﺠﻴﺐ ﻟﻴﺎ ﻧﺘﻴﺠﺔ ﺍﻟﺘﺤﻠﻴﻠﺔ، ﻭﻗﻠﺖ ﻟﻴﻬﺎ ﻏﺎﺩﻱ ﻧﺘﺴﻨﺎﻙ ﺣﺪﺍ ﺍﻟﺒﺎﺏ ﺣﺘﻰ ﺗﺠﻴﺒﻴﻬﺎ ﻟﻴﺎ . ﻭﺫﺍﻛﺸﻲ ﺍﻟﻠﻲ ﻛﺎﻥ ﺩﺧﻼﺕ ﻟﻠﺪﺍﺭ ﻭﺟﺎﺕ ﻫﺎﺯﺍﻫﺎ، ﺧﻄﻔﺘﻬﺎ ﻟﻴﻬﺎ ﻣﻦ ﻳﺪﻫﺎ ﻗﺒﻞ ﻣﺎﺗﻤﺪﻫﺎ ﻟﻴﺎ، ﺣﻠﻴﺖ ﺍﻟﺠﻮﺍ ﺍﻟﻠﻲ ﻛﺎﻧﺖ ﻓﻴﻪ ﻭﻫﺰﻳﺖ ﺍﻟﻮﺭﻗﺔ ﺍﻟﻠﻲ ﻭﺳﻂ ﻣﻨﻮ ﻭﻟﻘﻴﺖ ﺃﻥ ﺍﻟﺘﺤﻠﻴﻠﺔ ﻣﺰﻳﺎﻧﺔ، ﻭﺍﺧﺎ ﻻﺣﻈﺖ ﺃﻧﻬﺎ ﻣﺎﻓﻴﻬﺎﺵ ﺍﻹﺳﻢ ﺩﻳﺎﻝ ﺻﺎﺣﺐ ﺍﻟﺘﺤﻠﻴﻠﺔ . ﺳﻮﻟﺘﻬﺎ ﻋﻠﻰ ﺍﻟﺴﺒﺐ ﻗﺎﻟﺖ ﻟﻴﺎ ﺃﻧﻬﺎ ﺩﺍﺭﺗﻬﺎ ﻓﻲ ﺳﺒﻴﻄﺎﺭ ﻋﻤﻮﻣﻲ ﻭﺃﻥ ﺍﻟﻔﺤﺺ ﺗﺎﻳﻜﻮﻥ ﺳﺮﻱ ﺑﻼ ﺍﺳﻢ . ﻭﻣﺎﺗﺼﻮﺭﻭﺵ ﺷﺤﺎﻝ ﻓﺮﺣﺖ ﺫﻳﻚ ﺍﻟﺴﺎﻋﺔ، ﻭﻟﻜﻦ ﺍﻟﻔﺮﺣﺔ ﻟﻸﺳﻒ ﻣﺎﻃﻮﻻﺗﺶ ﺑﺰﺍﻑ .
ﺫﻳﻚ ﺍﻟﻠﻴﻠﺔ ﻋﺎﻭﺗﺎﻧﻲ ﺟﺎﺗﻨﻲ ﺍﻟﺤﻜﺔ ﻓﻲ ﺍﻟﻠﻴﻞ ﻭﻣﺎﺧﻼﺗﻨﻴﺶ ﻧﻨﻌﺲ ﻣﺰﻳﺎﻥ، ﻭﻓﻲ ﺍﻟﺼﺒﺎﺡ ﺭﺟﻌﺎﺕ ﻟﻴﺎ ﺍﻟﺴﺨﺎﻧﺔ . ﻟﺒﺴﺖ ﺣﻮﺍﻳﺠﻲ ﻭﻗﺮﺭﺕ ﻧﻤﺸﻲ ﻋﻨﺪ ﻋﻴﺎﺩﺓ ﺩﻛﺘﻮﺭ ﻓﻲ ﺍﻟﻄﺐ ﺍﻟﻌﺎﻡ ﺍﻟﻠﻲ ﻛﺎﻳﻦ ﺣﺪﺍﻧﺎ، ﻭﺍﻟﻠﻲ ﻋﺎﻭﺩﺕ ﻟﻴﻪ ﺍﻟﻘﺼﺔ ﻛﻮﻟﺸﻲ، ﺧﺮﺝ ﻟﻴﺎ ﺷﻲ ﺩﻭﺍﺀ ﺑﺎﺵ ﻧﻬﺒﻂ ﺍﻟﺤﺮﺍﺭﺓ ﻭﺷﻲ ﺗﺤﺎﻟﻴﻞ ﺑﺎﺵ ﻧﺪﻳﺮﻫﻮﻡ .
ﺳﻮﻟﺘﻮ : ﺩﻳﺎﻻﺵ ﻫﺎﺫ ﺍﻟﺘﺤﺎﻟﻴﻞ ﺃﺩﻛﺘﻮﺭ؟
ﺟﺎﻭﺑﻨﻲ : ﻫﺎﺫﻭ ﺗﺤﺎﻟﻴﻞ ﺧﺎﺻﻚ ﺩﻳﺮﻫﻮﻡ ﺩﻳﺎﻝ ﺍﻟﺴﻴﺪﺍ، ﻭﺍﻟﻨﻮﺍﺭ .
ﺍﻟﺴﻴﺪﺍ ! ؟ ﻧﺎﺭﻱ ﺷﺤﺎﻝ ﻣﺮﻋﺒﺔ ﻫﺎﺫ ﺍﻟﺴﻤﻴﺔ ﺍﻟﺴﻴﺪﺍ .
ﻣﺸﻴﺖ ﺍﻟﺼﻴﺪﻟﻴﺔ ﺷﺮﻳﺖ ﺍﻟﺪﻭﺍﺀ ﻭﺷﺮﺑﺘﻮ ﻭﺣﺴﻴﺖ ﺑﺮﺍﺳﻲ ﻻﺑﺎﺱ، ﻭﺟﻠﺴﺖ ﻓﻲ ﺍﻟﺪﺍﺭ ﺑﻘﻴﺖ ﻛﺎﻧﻔﻜﺮ ﻓﺬﻭﻙ ﺍﻟﺘﺤﺎﻟﻴﻞ ﻭﺍﺵ ﻧﺪﻳﺮﻫﻮﻡ ﻭﻻ ﻻ . ﻣﺎﺩﺍﻡ ﺃﻥ ﻧﺴﺮﻳﻦ ﻣﺎﻓﻴﻬﺎ ﻭﺍﻟﻮ ﻭﺷﻔﺖ ﺍﻟﺘﺤﻠﻴﻠﺔ ﺩﻳﺎﻟﻬﺎ ﺑﻌﻴﻨﻲ ﻋﻼﺵ ﻏﺎﺩﻱ ﻧﺒﺮﺯﺕ ﺭﺍﺳﻲ، ﻭﻟﻜﻦ ﺃﺵ ﺿﻤﻨﻲ ﺃﻥ ﺫﻳﻚ ﺍﻟﻨﺘﻴﺠﺔ ﺩﻳﺎﻟﻬﺎ ﺑﻌﺪﺍ ﻭﻫﻲ ﻣﺎﻓﻴﻬﺎﺵ ﺍﻟﺴﻤﻴﺔ . ﺑﻘﻴﺖ ﻛﺎﻧﻔﻜﺮ ﻭﻧﺴﻮﻝ ﺭﺍﺳﻲ ﺣﺘﻰ ﺳﻮﻧﺎ ﺍﻟﺒﻮﺭﻃﺎﺑﻞ . ﺍﻟﺪﺭﺍﺭﻱ ﺻﺤﺎﺑﻲ ﻏﺎﺩﻳﻦ ﺍﻟﺒﺤﺮ ﻭﻋﻴﻄﻮ ﻋﻠﻴﺎ ﺑﻐﺎﻭﻧﻲ ﻧﻤﺸﻲ ﻣﻌﺎﻫﻮﻡ، ﻭﻭﺍﺧﺎ ﺃﻧﺎ ﻣﺎﺷﻲ " ﺃﻭﻥ ﻓﻮﺭﻡ " ﻭﻟﻜﻦ ﺑﻐﻴﺖ ﻧﻤﺸﻲ ﻭﻧﺸﻐﻞ ﺭﺍﺳﻲ ﺑﺸﻲ ﺣﺎﺟﺔ ﻣﺎﻧﺒﻘﺎﺵ ﻧﻔﻜﺮ ﻓﻬﺎﺫ ﺍﻟﻤﻮﺿﻮﻉ ﺍﻟﻠﻲ ﻏﺎﺩﻱ ﻳﺤﻤﻘﻨﻲ .
ﺃﻧﺎ ﻭﺍﻟﺪﺭﺍﺭﻱ ﺻﺤﺎﺑﻲ ﻧﺸﻄﻨﺎ ﺫﻳﻚ ﺍﻟﻌﺸﻴﺔ ﻣﺰﻳﺎﻥ، ﻋﻤﻨﺎ ﻭﻟﻌﺒﻨﺎ ﻭﻣﺎﺧﻠﻴﻨﺎ ﻣﺎﺩﺭﻧﺎ . ﻣﻊ ﺟﻮﺍﻳﻪ ﺫﻳﻚ ﺍﻟﺨﻤﺴﺔ ﻗﺮﺭﻧﺎ ﺃﻧﻨﺎ ﻧﺮﺟﻌﻮ ﻓﺤﺎﻟﻨﺎ ﻭﺍﻟﺪﺭﺍﺭﻱ ﻣﺎﺧﻼﻭ ﺣﺘﻰ ﺑﻨﺖ ﻓﻲ ﺍﻟﻄﺮﻳﻖ ﺑﻼ ﻣﺎﻳﻌﺎﻛﺴﻮﻫﺎ . ﻓﺎﺵ ﻭﺻﻠﻨﺎ ﺑﻼﺻﺔ ﺩﻳﺎﻝ ﺍﻟﻄﺎﻛﺴﻴﺎﺕ ﺑﺎﺵ ﻧﺮﻛﺒﻮ، ﺑﺎﻧﺖ ﻟﻴﻨﺎ ﻭﺍﺣﺪ ﺍﻟﺸﺎﺣﻨﺔ ﻛﺒﻴﺮﺓ ﺩﻳﺎﻝ ﻭﺯﺍﺭﺓ ﺍﻟﺼﺤﺔ ﻭﺍﻗﻔﺔ ﻓﻲ ﻭﺳﻂ ﺍﻟﺴﺎﺣﺔ ﺩﻳﺎﻝ ﺍﻟﻄﺎﻛﺴﻴﺎﺕ، ﻭﺩﺍﻳﺮﻳﻦ ﻻﻓﺘﺔ ﻛﺒﻴﺮﺓ ﺑﺄﻧﻬﻢ ﻛﺎﻳﺪﻳﺮﻭ ﻓﺤﻮﺻﺎﺕ ﻣﺠﺎﻧﻴﺔ ﺩﻳﺎﻝ ﺍﻟﺴﻴﺪﺍ ﻭﺃﻥ ﺍﻟﻨﺘﻴﺠﺔ ﻛﺎﺗﻜﻮﻥ ﺑﻌﺪ 10 ﺩﻳﺎﻝ ﺍﻟﺪﻗﺎﺋﻖ . ﻧﺎﺭﻱ ﻭﺍﺵ ﻣﺎﻏﺎﺩﻳﺶ ﻧﺘﻬﻨﺎ ﺃﻧﺎ ﻣﻦ ﻫﺎﺫ ﺍﻟﻤﻮﺿﻮﻉ .
ﻧﻘﺰ ﻭﺍﺣﺪ ﺍﻟﻘﻤﻘﻮﻡ ﻣﻌﺎﻧﺎ ﻭﻫﻮ ﻳﻘﺘﺮﺡ ﺃﻧﻨﺎ ﻧﻤﺸﻴﻮ ﻧﺪﻳﺮﻭ " ﺍﻟﺪﻳﺒﺴﺘﺎﺝ " ﻣﺠﻤﻮﻋﻴﻦ، ﻛﻮﻟﺸﻲ ﻋﺠﺒﺎﺗﻮ ﺍﻟﻔﻜﺮﺓ ﺇﻻ ﺃﻧﺎ، ﺩﺭﺕ ﺍﻟﺴﺒﺔ ﺃﻥ ﺍﻟﺴﺎﻋﺔ ﻗﺮﺑﺎﺕ ﺗﻮﺻﻞ ﺍﻟﺴﺘﺔ ﻭﺍﻟﻨﺎﺱ ﻏﺎﺩﻱ ﻳﺨﺮﺟﻮ ﻣﻦ ﺍﻟﺨﺪﻣﺔ ﻭﺍﻟﻤﺪﺍﺭﺱ ﻭﻣﺎﻏﺎﺩﻳﺶ ﻧﻠﻘﺎﻭ ﺍﻟﻄﺎﻛﺴﻴﺎﺕ . ﻫﻮﻣﺎ ﺑﺪﺍﻭ ﻳﻀﺤﻜﻮ ﻭﻗﺎﻟﻮﺍ ﻟﻴﺎ " ﻳﺎ ﺇﻳﻤﺎ ﻓﻴﻚ ﺍﻟﺴﻴﺪﺍ ﻭﻻ ﻣﺨﻠﻮﻉ ﻭﺣﺪﺓ ﻣﻦ ﺍﻟﺠﻮﺝ ". ﺑﺰﺯﺕ ﻋﻠﻰ ﺭﺍﺳﻲ ﻭﺑﺪﻳﺖ ﻛﺎﻧﻀﺤﻚ ﺣﺘﻰ ﺃﻧﺎ ﻭﺍﺧﺎ ﺃﻧﺎ ﻓﻲ ﺍﻟﺪﺍﺧﻞ ﺩﻳﺎﻟﻲ ﺷﺎﺩﺍﻧﻲ ﺍﻟﻘﻔﻘﺎﻓﺔ، ﻭﻗﻠﺖ ﻟﻴﻬﻮﻡ ﺻﺎﻓﻲ ﻭﺍﺧﺎ ﺣﺘﻰ ﺃﻧﺎ ﻏﺎﺩﻱ ﻧﺪﻳﺮﻭ ﻣﻌﺎﻛﻮﻡ .
ﺩﺭﻧﺎ ﺍﻟﺼﻒ ﻗﺪﺍﻡ " ﺍﻟﻜﺎﻣﻴﻮ " ﻭﺑﻘﻴﻨﺎ ﻛﺎﻧﺘﺴﻨﺎﻭ، ﻓﺎﺵ ﺟﺎﺕ ﻧﻮﺑﺘﻲ ﻃﻠﻌﺖ ﻭﺟﻠﺴﺖ ﻓﻮﻕ ﻭﺍﺣﺪ ﺍﻟﻜﺮﺳﻲ، ﻃﻠﺒﺎﺕ ﻣﻨﻲ ﺍﻟﻔﺮﻣﻠﻴﺔ ﻧﻤﺪ ﻟﻴﻬﺎ ﺻﺒﻌﻲ، ﻋﻄﻴﺘﻮ ﻟﻴﻬﺎ ﻭﻫﻲ ﺗﻘﺮﺻﻨﻲ ﺑﻮﺍﺣﺪ ﺍﻷﻟﺔ ﺩﺍﻳﺮﺓ ﺑﺤﺎﻝ ﺍﻟﺴﺘﻴﻠﻮ ﻛﺎﺗﺠﺮ ﺍﻟﺪﻡ . ﺣﻴﺪﺍﺕ " ﺍﻟﻠﻴﺠﺎﺕ " ﻭﻫﻲ ﺗﻌﻄﻴﻨﻲ ﻭﺭﻗﺔ ﻓﻴﻬﺎ ﺭﻗﻢ ﻭﻗﺎﻟﺖ ﻟﻴﺎ ﻧﺘﺴﻨﻰ ﻋﻠﻰ ﺑﺮﺍ . ﺑﻘﻴﻨﺎ ﻭﺍﻗﻔﻴﻦ ﻛﺎﻧﺘﺴﻨﺎﻭ ﻋﻠﻰ ﺑﺮﺍ ﺃﻧﺎ ﻭﺍﻟﺪﺭﺍﺭﻱ ﺻﺤﺎﺑﻲ، ﻛﻮﻟﺸﻲ ﻧﺎﺷﻂ ﺇﻻ ﺃﻧﺎ ﻛﺎﻧﻔﻜﺮ ﻭﺷﺎﺩﺍﻧﻲ ﺍﻟﺨﻠﻌﺔ . ﺩﺍﺯﺕ ﺭﺑﻊ ﺳﺎﻋﺔ ﻭﺧﺮﺟﺎﺕ ﻋﻨﺪﻧﺎ ﺫﻳﻚ ﺍﻟﻔﺮﻣﻠﻴﺔ ﻭﻗﺎﻟﺖ ﻟﻴﻨﺎ : " ﺍﻟﻨﺘﺎﺋﺞ ﻭﺍﺟﺪﻳﻦ، ﺩﺧﻠﻮ ﻭﺍﺣﺪ ﻭﺍﺣﺪ ﺑﺎﻟﻨﻈﺎﻡ ﻋﺎﻓﺎﻛﻮﻡ ".
ﺩﺧﻞ ﻭﺍﺣﺪ ﺍﻟﺪﺭﻱ ﺻﺎﺣﺒﻲ ﻭﺧﺮﺝ ﻓﺮﺣﺎﻥ ﻭﺗﺒﻌﻮ ﺍﻟﺜﺎﻧﻲ ﻭﺍﻟﺜﺎﻟﺚ ﻭﺍﻟﺮﺍﺑﻊ ﻣﺠﻤﻮﻋﻴﻦ، ﺑﻘﻴﺖ ﻏﻴﺮ ﺃﻧﺎ ﻭﻭﺍﺣﺪ ﺍﻟﺪﺭﻱ ﺃﺧﺮ . ﺣﺴﻴﺖ ﺑﻘﻠﺒﻲ ﻛﺎﻳﻀﺮﺏ ﻭﺍﻷﺭﺽ ﻛﺎﺗﺪﻭﺭ ﻗﺪﺍﻣﻲ ﻭﻣﺎﻋﺮﻓﺖ ﻣﺎﻧﺪﻳﺮ . ﻃﻠﺒﺖ ﻣﻦ ﺫﺍﻙ ﺍﻟﺪﺭﻱ ﺃﻧﻪ ﻳﺪﺧﻞ ﻳﺸﻮﻑ ﺍﻟﻨﺘﻴﺠﺔ ﺩﻳﺎﻟﻮ ﻫﻮ ﺍﻷﻭﻝ ﻭﻣﺸﻰ . ﻗﺮﺭﺕ ﺫﻳﻚ ﺍﻟﺴﺎﻋﺔ ﺃﻧﻨﻲ ﻧﻬﺮﺏ، ﺗﻠﻔﺖ ﻟﻘﻴﺖ ﺻﺤﺎﺑﻲ ﻣﺎﺯﺍﻝ ﻣﺎﺧﺮﺟﻮ ﻣﻦ " ﺍﻟﻜﺎﻣﻴﻮ " ﻭﺑﺪﻳﺖ ﻛﺎﻧﺘﺴﻠﺖ ﻏﻴﺮ ﺑﺸﻮﻳﺔ، ﺳﺎﻋﺎ ﻭﺍﺣﺪ ﻣﻨﻬﻢ ﺷﺎﻓﻨﻲ ﻭﺑﺪﺍ ﺗﺎﻳﻐﻮﻁ : " ﺃﻓﻴﻦ ﻏﺎﺩﻱ ﺃﻫﻴﺎ؟ ". ﻏﻴﺮ ﺳﻤﻌﺘﻮ ﻭﺃﻧﺎ ﻧﺒﺪﺍ ﻧﺠﺮﻱ ﻭﻫﻮﻣﺎ ﺗﺎﺑﻌﻴﻨﻲ ﻛﺎﻣﻠﻴﻦ ﻣﻦ ﺍﻟﻠﻮﺭ ﺑﺎﻟﺠﺮﻯ ﻛﺎﻳﻀﺤﻜﻮ ﻭﻛﺎﻳﻐﻮﺗﻮ : " ﺷﺪﻭﻩ ﺷﺪﻭﻩ ﺭﺍﻩ ﻓﻴﻪ ﺍﻟﺴﻴﺪﺍ...
ﺍﻟﺤﻠﻘﺔ 10
ﺑﻘﻴﺖ ﻛﺎﻧﺠﺮﻱ ﺑﻼ ﻋﻘﻞ ﺣﺘﻰ ﻋﻴﻴﺖ ﻣﻦ ﺍﻟﺠﺮﻯ، ﻭﻗﻔﺖ ﺑﺎﺵ ﻧﺴﺘﺮﺟﻊ ﺍﻷﻧﻔﺎﺱ ﺩﻳﺎﻟﻲ، ﺑﺎﻥ ﻟﻴﺎ ﻭﺍﺣﺪ ﻣﻮﻝ ﺍﻟﺤﺎﻧﻮﺕ ﻣﺸﻴﺖ ﺷﺮﻳﺖ ﻗﺮﻋﺔ ﺩﻳﺎﻝ ﺍﻟﻤﺎﺀ ﺷﺮﺑﺘﻬﺎ ﻛﺎﻣﻠﺔ ﻓﺪﻗﺔ ﻭﺣﺪﺓ، ﻭﺷﺪﻳﺖ ﻃﺎﻛﺴﻲ ﻭﺭﺟﻌﺖ ﻟﻠﺪﺍﺭ . ﺩﺧﻠﺖ ﻣﺸﻴﺖ ﻣﺒﺎﺷﺮﺓ ﺗﻜﻮﻧﻴﻜﺘﻴﺖ ﻛﺎﻧﻘﻠﺐ ﻓﻲ ﺍﻷﻧﺘﺮﻧﻴﺖ ﻋﺎﻭﺗﺎﻧﻲ ﻋﻠﻰ ﻣﺮﺽ ﺍﻟﺴﻴﺪﺍ، ﻭﻗﺮﻳﺖ ﺃﻥ ﺍﻟﻔﺤﺺ ﺩﻳﺎﻟﻮ ﺧﺎﺻﻮ ﻳﻜﻮﻥ ﻣﻦ ﺑﻌﺪ 3 ﺷﻬﻮﺭ ﺑﺎﺵ ﺗﻜﻮﻥ ﺍﻟﻨﺘﻴﺠﺔ ﻣﺆﻛﺪﺓ %100.
ﺩﺍﺯﻭ ﺷﻲ ﻳﺎﻣﺎﺕ ﻣﺸﻴﺖ ﻋﻨﺪ ﻃﺒﻴﺐ ﺃﺧﺮ ﺍﺧﺘﺼﺎﺻﻲ، ﻭﺣﺘﻰ ﻫﻮ ﻋﻄﺎﻧﻲ ﻧﻔﺲ ﺍﻟﺘﺤﺎﻟﻴﻞ ﺍﻟﻠﻲ ﻋﻄﺎﻫﺎ ﻟﻴﺎ ﺍﻟﻄﺒﻴﺐ ﺍﻷﻭﻝ، ﻏﻴﺮ ﻫﻮ ﻗﺎﻟﻴﺎ ﻧﺪﻳﺮﻫﻮﻡ ﻣﻦ ﺑﻌﺪ 3 ﺃﺷﻬﺮ، ﻭﻟﻜﻦ ﺃﻧﺎ ﻣﺴﺘﺤﻴﻞ ﻧﺼﺒﺮ 3 ﺃﺷﻬﺮ ﻛﺎﻣﻠﺔ ﺑﺎﺵ ﻧﻌﺮﻑ، ﻏﺎﺩﻱ ﻧﺘﺴﻄﺎ ﻭﻻ ﻧﺤﻤﺎﻕ .
ﻋﻴﻄﺖ ﻋﻠﻰ ﻧﺴﺮﻳﻦ ﻭﻃﻠﺒﺘﻬﺎ ﺑﺤﺎﻝ ﺷﻲ ﺩﺭﻱ ﺻﻐﻴﺮ ﺃﻧﻬﺎ ﺗﻤﺸﻲ ﺗﺪﻳﺮ ﺍﻟﺘﺤﺎﻟﻴﻞ ﻓﻲ ﺍﻟﻤﺨﺘﺒﺮ، ﻓﺎﻷﻭﻝ ﺭﻓﻀﺖ ﻭﻟﻜﻦ ﺑﻘﻴﺖ ﻛﺎﻧﻄﻠﺐ ﻓﻴﻬﺎ ﺣﺘﻰ ﻭﺍﻓﻘﺎﺕ، ﻣﺸﻴﺖ ﻣﻌﺎﻫﺎ ﺍﻟﻤﺨﺘﺒﺮ، ﺩﺍﺭﺕ ﺍﻟﺘﺤﻠﻴﻠﺔ ﺍﻟﻠﻲ ﺧﻠﺼﺖ ﻋﻠﻴﻬﺎ 250 ﺩﺭﻫﻢ ﻭﻛﺎﻧﺖ ﻣﺰﻳﺎﻧﺔ، ﻓﺮﺣﺖ ﺑﺰﺍﻑ ﺫﺍﻙ ﺍﻟﻨﻬﺎﺭ . ﻭﻟﻜﻦ ﻓﺎﺵ ﺩﺍﺯﻭ ﺷﻲ ﻳﺎﻣﺎﺕ ﻣﻦ ﺑﻌﺪ ﺑﺪﺍ ﻛﺎﻳﺪﺧﻠﻨﻲ ﺍﻟﺸﻚ ﻋﺎﻭﺗﺎﻧﻲ ﻭﺑﺪﻳﺖ ﻛﺎﻧﻘﻮﻝ ﻣﻊ ﺭﺍﺳﻲ : ﺃﺵ ﺿﻤﻨﻲ ﺃﻧﻬﺎ ﻣﺎﺗﺼﺎﺑﺘﺶ ﺑﺎﻟﺴﻴﺪﺍ ﻓﺬﻳﻚ ﺍﻟﻔﺘﺮﺓ ﺩﻳﺎﻝ 3 ﺃﺷﻬﺮ ﻗﺒﻞ ﻣﺎﻳﻮﻗﻊ ﺫﺍﻛﺸﻲ ﺑﻴﻨﺎﺗﻨﺎ . ﻭﻗﺮﺭﺕ ﺃﻧﻨﻲ ﻧﻤﺸﻲ ﻧﺪﻳﺮ ﺍﻟﺘﺤﻠﻴﻠﺔ ﺣﺘﻰ ﺃﻧﺎ ﻭﻧﺸﻮﻑ ﺍﻟﻨﺘﻴﺠﺔ ﻭﺍﺧﺎ ﻣﺎﺯﺍﻝ ﻣﺎﻛﻤﻼﺗﺶ ﺍﻟﻤﺪﺓ ﺍﻟﻠﻲ ﻗﺎﻝ ﻟﻴﺎ ﻋﻠﻴﻬﺎ ﺍﻟﻄﺒﻴﺐ، ﻋﻠﻰ ﺍﻷﻗﻞ ﺑﺎﺵ ﻧﺮﺗﺎﺡ ﺷﻮﻳﺔ ﻧﻔﺴﻴﺎ . ﻭﺫﺍﻛﺸﻲ ﺍﻟﻠﻲ ﻛﺎﻥ، ﻣﺸﻴﺖ ﻟﻨﻔﺲ ﺍﻟﻤﺨﺘﺒﺮ ﺍﻟﻠﻲ ﺩﻳﺖ ﻟﻴﻪ ﻧﺴﺮﻳﻦ ﻭﺩﺭﺕ ﺍﻟﺘﺤﻠﻴﻠﺔ ﻓﻲ ﺍﻟﺼﺒﺎﺡ ﻭﻃﻠﺒﻮ ﻣﻨﻲ ﻧﺠﻲ ﻧﺘﺴﻠﻢ ﺍﻟﻨﺘﻴﺠﺔ ﻓﻲ ﺍﻟﻌﺸﻴﺔ ﻣﻊ ﺍﻟﺴﺎﻋﺔ ﺍﻟﺨﺎﻣﺴﺔ .
ﺭﺟﻌﺖ ﻋﻨﺪﻫﻢ ﻓﻲ ﺍﻟﻌﺸﻴﺔ، ﻛﺎﻥ ﺍﻟﻤﺨﺘﺒﺮ ﻓﻴﻪ ﺍﻟﺰﺣﺎﻡ ﻭﺍﻟﻨﺎﺱ ﻭﺍﻗﻔﻴﻦ، ﻫﺎ ﺍﻟﻠﻲ ﺩﺍﻳﺮ ﺗﺤﻠﻴﻠﺔ ﺩﻳﺎﻝ ﺍﻟﻜﺒﺪﺓ، ﻫﺎ ﺍﻟﻠﻲ ﺩﺍﻳﺮﻫﺎ ﻋﻠﻰ ﻓﻘﺮ ﺍﻟﺪﻡ، ﻛﺎﻳﻌﻄﻴﻮ ﺍﻟﻨﺎﺱ ﺍﻟﺘﻮﺍﺻﻴﻞ ، ﻭﺍﻟﺒﻨﺖ ﺍﻟﻠﻲ ﺧﺪﺍﻣﺔ ﺗﻤﺎ ﻛﺎﺗﻘﻠﺐ ﻟﻴﻬﻮﻡ ﻋﻠﻰ ﺍﻟﺘﺤﻠﻴﻠﺔ ﺩﻳﺎﻟﻬﻮﻡ ﻭﺳﻂ ﺍﻟﻮﺭﺍﻕ ﺍﻟﻠﻲ ﻛﺎﻧﻮﺍ ﻓﻲ ﺍﻟﻤﻜﺘﺐ ﺩﻳﺎﻟﻬﺎ ﻭﻛﺎﺗﻌﻄﻴﻬﺎ ﻟﻴﻬﻮﻡ، ﻭﻟﻜﻦ ﺃﻧﺎ ﻓﺎﺵ ﺟﺎﺗﻨﻲ ﺍﻟﻨﻮﺑﺔ ﻭﻣﻦ ﺑﻌﺪ ﻣﺎﻋﻄﻴﺖ ﻟﻴﻬﺎ ﺍﻟﺘﻮﺻﻴﻞ، ﺑﻘﺎﺕ ﻛﺎﺗﺸﻮﻑ ﻓﻴﺎ ﺷﺤﺎﻝ، ﻭﻫﺰﺍﺕ ﺍﻟﺘﻠﻴﻔﻮﻥ ﻭﻣﺎﻋﺮﻓﺖ ﻟﻤﻦ ﻋﻴﻄﺎﺕ ﺳﻮﻻﺗﻬﻮﻡ ﻋﻠﻰ ﺭﻗﻢ ﺍﻟﺘﻮﺻﻴﻞ ﺩﻳﺎﻟﻲ، ﺣﻄﺎﺕ ﺍﻟﺘﻠﻴﻔﻮﻥ ﻭﻃﻠﺒﺎﺕ ﻣﻨﻲ ﺑﺎﺵ ﻧﺘﺴﻨﻰ . ﺗﻔﻜﺮﺕ ﺃﻧﻨﻲ ﻗﺮﻳﺖ ﻓﻲ ﺍﻷﻧﺘﺮﻧﻴﺖ ﺃﻥ ﺍﻟﻨﺘﻴﺠﺔ ﻓﺎﺵ ﻛﺎﺗﻜﻮﻥ ﺧﺎﻳﺒﺔ ﻛﺎﻳﺴﻠﻤﻬﺎ ﺍﻟﻄﺒﻴﺐ ﺍﻟﻠﻲ ﺗﺎﻳﻜﻮﻥ ﻓﻲ ﺍﻟﻤﺨﺘﺒﺮ ﻣﺎﺷﻲ ﻫﺎﺫﻳﻚ ﺍﻟﻠﻲ ﻛﺎﺗﻜﻮﻥ ﻓﻲ ﺍﻹﺳﺘﻘﺒﺎﻝ . ﺣﺴﻴﺖ ﺑﺮﺟﻠﻲ ﺧﻮﺍﻭ ﻣﺎﻗﺪﺭﺗﺶ ﺑﺎﻗﻲ ﻧﻮﻗﻒ، ﻋﻼﺵ ﺃﻧﺎ ﺑﻮﺣﺪﻱ ﻣﻦ ﺑﻴﻦ ﻫﺎﺫﻭ ﻛﺎﻣﻠﻴﻦ ﺍﻟﻠﻲ ﻃﻠﺒﺖ ﻣﻨﻲ ﻧﺘﺴﻨﻰ، ﻭﺍﺵ ﻋﻠﻰ ﻫﻔﻮﺓ ﻭﺣﺪﺓ ﻣﻨﻲ ﻏﺎﺩﻱ ﻧﻮﺩﻱ ﻋﻠﻴﻬﺎ ﺍﻟﺜﻤﻦ .
ﺩﺍﺯﺕ ﺗﻘﺮﻳﺒﺎ 5 ﺩﻳﺎﻝ ﺍﻟﺪﻗﺎﻳﻖ ﻭﻫﻲ ﺗﺒﺎﻥ ﻟﻴﺎ ﺟﺎﻳﺎ ﻭﻫﺎﺯﺓ ﻓﻴﺪﻳﻬﺎ ﻭﺭﻗﺔ، ﺣﺴﻴﺖ ﺑﻘﻠﺒﻲ ﻛﺎﻳﻀﺮﺏ ﺑﺤﺎﻻ ﺑﻐﻰ ﻳﺨﺮﺝ ﻣﻦ ﺑﻼﺻﺘﻮ، ﻓﻜﺮﺕ ﺃﻧﻨﻲ ﻧﻬﺮﺏ ﻛﻴﻤﺎ ﻫﺮﺑﺖ ﺫﻳﻚ ﺍﻟﻤﺮﺓ ﻓﺎﺵ ﻛﻨﺖ ﻣﻊ ﺍﻟﺪﺭﺍﺭﻱ ﺻﺤﺎﺑﻲ، ﻭﻟﻜﻦ ﺷﺤﺎﻝ ﻗﺪﻧﻲ ﻧﺒﻘﻰ ﻫﺮﺑﺎﻥ . ﺑﻘﻴﺖ ﻛﺎﻧﺸﻮﻑ ﻓﻴﻬﺎ ﻭﻧﺘﺴﻨﺎﻫﺎ ﺗﻘﻮﻝ ﺷﻲ ﺣﺎﺟﺔ، ﺑﻐﻴﺖ ﻧﺴﻮﻟﻬﺎ ﺣﺴﻴﺖ ﺑﻔﻤﻲ ﻧﺎﺷﻒ ﻭﻣﺎﺑﻐﺎﺵ ﻳﺘﺤﻞ، ﻏﻴﺮ ﺟﻠﺴﺎﺕ ﻓﻮﻕ ﺍﻟﻜﺮﺳﻲ ﻭﻫﻲ ﺗﻘﻮﻝ ﻟﻴﺎ : " ﺳﻤﺢ ﻟﻴﻨﺎ ﻋﻄﻠﻨﺎﻙ، ﺭﺍﻩ ﻛﺎﻧﻮﺍ ﻣﺎﺯﺍﻝ ﻣﺎﺟﺎﺑﻮﺵ ﻟﻴﻨﺎ ﺍﻟﺘﺤﺎﻟﻴﻞ ". ﻓﺎﺵ ﻗﺎﻟﺖ ﺫﻳﻚ " ﺳﻤﺢ ﻟﻴﻨﺎ " ﺣﺴﻴﺖ ﺑﺄﻥ ﺍﻟﻮﻗﺖ ﺗﻮﻗﻒ ﻣﺎﺑﻘﻴﺘﺶ ﻛﺎﻧﺤﺲ ﺑﺎﻟﻨﺎﺱ ﺍﻟﻠﻲ ﻛﺎﻧﻮﺍ ﺣﺪﺍﻳﺎ، ﺳﻮﻟﺘﻬﺎ ﻭﺃﻧﺎ ﻛﺎﻧﺘﺴﻨﻰ ﺍﻟﺼﺪﻣﺔ : " ﻭﺍﺵ ﺍﻟﺘﺤﻠﻴﻠﺔ ﻣﺰﻳﺎﻧﺔ؟ " ، ﺟﺎﻭﺑﺘﻨﻲ ﻗﺎﻟﺖ ﻟﻴﺎ " ﺁﻩ ﻣﺰﻳﺎﻧﺔ ". ﻋﻄﻴﺖ ﻟﻴﻬﺎ 300 ﺩﺭﻫﻢ ﻭﻫﺰﻳﺖ ﺍﻟﺠﻮﺍ ﻓﺘﺤﺘﻮ ﻭﺗﻤﻴﺖ ﺧﺎﺭﺝ، ﺑﺎﻧﺖ ﻟﻴﺎ ﻛﻠﻤﺔ "NEGATIF" ﻣﻜﺘﻮﺑﺔ ﻛﺒﻴﺮﺓ ﻭﺣﺴﻴﺖ ﺑﺮﺍﺳﻲ ﺑﺤﺎﻻ ﺗﻮﻟﺪﺕ ﻣﻦ ﺟﺪﻳﺪ، ﺳﻤﻌﺘﻬﺎ ﻛﺎﺗﻌﻴﻂ ﻋﻠﻴﺎ ﻣﻦ ﺍﻟﻠﻮﺭ ﺑﺎﺵ ﺗﺮﺩ ﻋﻠﻴﺎ 50 ﺩﺭﻫﻢ، ﻫﺰﻳﺖ ﻟﻴﻬﺎ ﻳﺪﻱ ﺯﻋﻤﺎ ﻏﻴﺮ ﺧﻠﻴﻬﺎ ﻋﻨﺪﻙ ﻭﺍﺧﺎ ﻣﺎﻛﺎﻧﺶ ﻣﻌﺎﻳﺎ ﺣﺘﻰ ﺍﻟﻔﻠﻮﺱ ﺑﺎﺵ ﻧﺸﺪ ﻃﺎﻛﺴﻲ ﻭﻻ ﻃﻮﺑﻴﺲ ﻧﺮﺟﻊ ﺍﻟﺪﺍﺭ، ﺑﻘﻴﺖ ﻏﺎﺩﻱ ﻭﻛﺎﻧﺸﻮﻑ ﻓﺬﻳﻚ ﺍﻟﻮﺭﻗﺔ ﻭﻧﺤﻄﻬﺎ ﻓﺎﻟﺠﻮﺍ ﻭﻧﻌﺎﻭﺩ ﻧﺨﺮﺟﻬﺎ ﻋﺎﻭﺗﺎﻧﻲ ﻭﻧﺸﻮﻑ ﻓﻴﻬﺎ، ﺭﺟﻌﺖ ﻟﻠﺪﺍﺭ ﺑﺎﻟﺮﺟﻞ ﻭﻧﻌﺴﺖ ﺫﻳﻚ ﺍﻟﻠﻴﻠﺔ ﻣﺰﻳﺎﻥ ﺑﻼ ﺣﻜﺔ ﺑﻼ ﻛﻮﺍﺑﻴﺲ .....
الحلقة ﺍﻷخيييييرة
ﺍﻟﺘﺤﻠﻴﻠﺔ ﺍﻟﻠﻲ ﺩﺭﺕ ﻣﺰﻳﺎﻧﺔ ﻭﻟﻜﻦ ﺧﺎﺻﻨﻲ ﻧﻌﺎﻭﺩﻫﺎ ﺑﻌﺪ ﺷﻬﺮ ﻭﻧﺼﻒ ﺑﺎﺵ ﺗﻜﻮﻥ ﻧﻬﺎﺋﻴﺔ ﻭﻣﺆﻛﺪﺓ، ﻭﻓﻲ ﻧﻔﺲ ﺍﻟﻮﻗﺖ ﻣﺎﺑﻘﻴﺘﺶ ﻛﺎﻧﺸﻐﻞ ﺭﺍﺳﻲ ﺑﺬﺍﻙ ﺍﻟﻤﻮﺿﻮﻉ . ﻧﺴﺮﻳﻦ ﻣﺎﺑﻘﺎﺗﺶ ﺳﺎﻛﻨﺔ ﻣﻊ ﺧﺎﻟﺘﻬﺎ ﻣﺸﺎﺕ ﺭﺟﻌﺎﺕ ﺗﺴﻜﻦ ﻣﻊ ﺍﻟﺒﻨﺎﺕ ﺻﺤﺎﺑﺎﺗﻬﺎ، ﻭﺃﻧﺎ ﻭﻟﻴﺖ ﻛﺎﻧﻌﺲ ﻣﺰﻳﺎﻥ ﻭﻣﺎﺑﻘﺎﺗﺶ ﺍﻟﺤﻜﺔ ﻛﺎﺗﻔﻴﻘﻨﻲ ﻓﻲ ﺍﻟﻠﻴﻞ . ﻛﻞ ﺷﻲﺀ ﻛﺎﻥ ﻃﺒﻴﻌﻲ ﻭﻏﺎﺩﻱ ﻣﺰﻳﺎﻥ ﺣﺘﺎﻝ ﺫﺍﻙ ﺍﻟﻨﻬﺎﺭ ﺍﻟﻠﻲ ﻛﻨﺖ ﺟﺎﻟﺲ ﻓﻴﻪ ﻣﻊ ﺍﻟﺪﺭﺍﺭﻱ ﺻﺤﺎﺑﻲ ﻭﺳﻤﻌﺖ ﻣﻨﻬﻢ ﺷﻲ ﻫﻀﺮﺓ ﺧﻠﻌﺎﺗﻨﻲ .
ﻭﺍﺣﺪ ﺍﻟﺪﺭﻱ ﻛﺎﻥ ﺟﺎﻟﺲ ﻣﻌﺎﻧﺎ ﻓﻲ ﺍﻟﻘﻬﻮﺓ ﺑﺪﻯ ﻛﺎﻳﻌﺎﻭﺩ ﻟﻴﻨﺎ ﻋﻠﻰ ﻭﺍﺣﺪ ﺍﻟﺪﺭﻱ ﺻﺎﺣﺒﻮ ﻛﺎﻳﻌﺮﻑ ﺷﻲ ﺑﻨﺖ ﻓﻴﻬﺎ ﺍﻟﺴﻴﺪﺍ ﻭﺭﻏﻢ ﺫﻟﻚ ﻛﺎﺗﺨﺮﺝ ﻣﻊ ﺍﻟﺪﺭﺍﺭﻱ ﻭﻛﺎﺗﺒﺎﺕ ﻣﻌﺎﻫﻮﻡ، ﺳﻮﻟﺘﻮ ﺃﻧﺎ ﻭﺑﺎﺵ ﻋﺮﻑ ﺻﺎﺣﺒﻚ ﺃﻥ ﻓﻴﻬﺎ ﺍﻟﺴﻴﺪﺍ، ﻗﺎﻟﻴﺎ ﺑﺄﻥ ﺻﺎﺣﺒﻮ ﻓﺮﻣﻠﻲ ﺧﺪﺍﻡ ﻓﻲ ﻗﺴﻢ ﺍﻷﻣﺮﺍﺽ ﺍﻟﻤﻌﺪﻳﺔ ﺑﻤﺴﺘﺸﻔﻰ ﺍﻟﺤﺴﻦ ﺍﻟﺜﺎﻧﻲ، ﻭﺃﻧﻬﺎ ﻛﺎﺗﺠﻲ ﻛﻞ 3 ﺃﺷﻬﺮ ﺑﺎﺵ ﺗﺎﺧﺬ ﺍﻟﺪﻭﺍﺀ ﺍﻟﻠﻲ ﻳﺨﻠﻲ ﺍﻟﻤﺮﺽ ﻣﺎﻳﻨﺘﺎﺷﺮﺵ ﺑﺎﻟﺰﺭﺑﺔ ﻓﻲ ﺍﻟﺠﺴﻢ ﺩﻳﺎﻟﻬﺎ . ﺳﻮﻟﺘﻮ ﻭﺍﺵ ﻛﺎﻳﻌﺮﻑ ﺳﻤﻴﺘﻬﺎ ﻭﻻ ﻓﻴﻦ ﻛﺎﺗﺴﻜﻦ، ﺑﻘﺎ ﻛﺎﻳﻔﻜﺮ ﺷﺤﺎﻝ ﻭﺟﺎﻭﺑﻨﻲ : " ﺭﺍﻩ ﺳﻮﻟﺘﻮ ﻋﻠﻰ ﺍﻟﺴﻤﻴﺔ، ﻭﻟﻜﻦ ﻣﺎﺑﻘﻴﺘﺶ ﻋﺎﻗﻞ ﺑﺎﻟﻀﺒﻂ، ﻭﺍﻗﻴﻼ ﺳﻤﻴﺘﻬﺎ ﻓﺎﺗﻴﻦ ﻭﻻ ﻣﻌﺮﻓﺖ ﻧﺮﻣﻴﻦ ﻭﻻ ﻣﺎﻋﺮﻓﺖ ﺃﺵ ﺫﻳﻚ ﺍﻟﺴﻤﻴﺔ ﻋﻨﺪﻫﺎ ".
ﻏﻴﺮ ﻗﺎﻝ ﻫﺎﺫ ﺍﻟﻬﻀﺮﺓ ﻭﺃﻧﺎ ﻧﻮﺽ ﻣﻔﺰﻭﻉ ﻣﻦ ﺑﻼﺻﺘﻲ، ﺻﺎﻓﻲ ﻫﺎﺫﻱ ﻣﺎﻏﺎﺩﻱ ﺗﻜﻮﻥ ﻏﻴﺮ ﻧﺴﺮﻳﻦ ﻣﺎﻓﻴﻬﺎﺵ، ﻣﺸﻴﺖ ﻛﺎﻧﺠﺮﻱ ﻟﻠﺪﺍﺭ ﻭﺃﻧﺎ ﻧﻌﻴﻂ ﻟﻴﻬﺎ، ﺑﻘﻰ ﺍﻟﺘﻠﻴﻔﻮﻥ ﻛﺎﻳﺼﻮﻧﻲ ﺷﺤﺎﻝ ﻣﺎﺑﻐﺎﺗﺶ ﺗﺠﺎﻭﺑﻨﻲ، ﻭﺃﻧﺎ ﻧﻌﺎﻭﺩ ﻧﻌﻴﻂ ﻭﺑﻘﻴﺖ ﺫﻳﻚ ﺍﻟﻌﺸﻴﺔ ﻛﺎﻣﻠﺔ ﻭﺃﻧﺎ ﻧﻌﻴﻂ ﻭﻭﺍﻟﻮ . ﺩﺧﻠﺖ ﻟﻠﻔﺎﻳﺴﺒﻮﻙ ﺑﺎﻧﺖ ﻟﻴﺎ " ﺃﻭﻥ ﻻﻳﻦ " ، ﺑﻐﻴﺖ ﻧﺴﺒﻬﺎ ﺑﻐﻴﺖ ﻧﻌﺎﻳﺮﻫﺎ ﻭﻟﻜﻦ ﻓﺄﺧﺮ ﺍﻟﻤﻄﺎﻑ ﺗﻤﺎﻟﻜﺖ ﺍﻷﻋﺼﺎﺏ ﺩﻳﺎﻟﻲ ﻭﺳﻮﻟﺘﻬﺎ ﻋﻼﺵ ﻣﺎﺑﻐﺎﺗﺶ ﺗﺠﺎﻭﺏ، ﻗﺎﻟﺖ ﻟﻴﺎ " ﻭﺍﺭﺍﻙ ﻣﺮﺿﺘﻴﻨﻲ ﺑﺬﺍﻙ ﺍﻟﻤﻮﺿﻮﻉ ﺩﻳﺎﻟﻚ، ﻭﺍﺵ ﻣﺎﻋﻨﺪﻙ ﺣﺘﻰ ﻫﻀﺮﺓ ﺃﺧﺮﻯ ﻣﻦ ﻏﻴﺮ ﺍﻟﺴﻴﺪﺍ ..." ﺧﻠﻴﺘﻬﺎ ﻣﺎﺯﺍﻝ ﻛﺎﺗﻜﺘﺐ ﻭﺃﻧﺎ ﻧﺴﻮﻟﻬﺎ " ﻭﺍﺵ ﻣﺘﺄﻛﺪﺓ ﻣﺎﻓﻴﻜﺶ ﺍﻟﺴﻴﺪﺍ؟ ".
ﺑﻨﺖ ﺍﻟﺤﺮﺍﻡ ﺑﻠﻮﻛﺎﺗﻨﻲ ﻓﻲ ﺍﻟﻔﺎﻳﺴﺒﻮﻙ، ﺣﺎﻭﻟﺖ ﻧﻌﻴﻂ ﻋﻠﻴﻬﺎ ﻓﻲ ﺍﻟﺘﻠﻴﻔﻮﻥ ﻟﻘﻴﺘﻬﺎ ﻃﻔﺎﺗﻮ . ﺟﺎﺗﻨﻲ ﺍﻟﺤﻜﺔ ﻋﺎﻭﺗﺎﻧﻲ ﻭﻣﺎﺧﻼﺗﻨﻴﺶ ﻧﻨﻌﺲ ﺍﻟﻠﻴﻞ ﻛﺎﻣﻞ، ﻛﻨﺖ ﻛﺎﻧﺤﺎﻭﻝ ﻧﻘﻨﻊ ﺭﺍﺳﻲ ﺃﻧﻬﺎ ﻛﺎﺗﺠﻴﻨﻲ ﻏﻴﺮ ﻓﺎﺵ ﻛﺎﻧﻜﻮﻥ ﻣﺘﻮﺛﺮ ﻭﺃﻥ ﻣﺎﻋﻨﺪﻫﺎ ﺣﺘﻰ ﻋﻼﻗﺔ ﺑﺎﻟﻤﺮﺽ ﺍﻟﻠﻲ ﺃﻧﺎ ﺧﺎﻳﻒ ﻣﻨﻮ ﻟﻜﻦ ﻣﺎﻗﺪﺭﺗﺶ ﻧﺼﺒﺮ ﻣﺎﺯﺍﻝ .
ﻓﻲ ﺍﻟﻐﺪ ﻟﻴﻪ ﻣﺸﻴﺖ ﻋﺎﻭﺗﺎﻧﻲ ﺍﻟﻤﺨﺘﺒﺮ ﻋﺎﻭﺩﺕ ﺍﻟﺘﺤﻠﻴﻠﺔ، ﻭﻭﻟﻴﺖ ﻓﻲ ﻛﻞ ﺃﺳﺒﻮﻉ ﻭﺑﻌﺾ ﺍﻟﻤﺮﺍﺕ ﻓﻜﻞ 5 ﺃﻳﺎﻡ ﻛﺎﻧﻌﺎﻭﺩﻫﺎ، ﻓﺎﺵ ﻛﺎﺗﻄﻠﻊ ﻣﺰﻳﺎﻧﺔ ﻛﺎﻧﺮﺟﻊ ﻣﺮﺗﺎﺡ ﻟﻠﺪﺍﺭ ﻭﻛﺎﺗﺒﺎﻥ ﻟﻴﺎ ﺍﻟﺤﻴﺎﺓ ﺯﻭﻳﻨﺔ، ﻭﻟﻜﻦ ﻓﺎﺵ ﻛﺎﻳﺪﻭﺯﻭ ﺷﻲ 3 ﺃﻳﺎﻡ ﻭﻻ 4 ﻛﺎﺗﺠﻴﻨﻲ ﻧﻔﺲ ﺍﻟﻬﻮﺍﺟﺲ ﻋﺎﻭﺗﺎﻧﻲ ﻭﻧﻤﺸﻲ ﻧﺠﺮﻱ ﺍﻟﻤﺨﺘﺒﺮ ﻧﻌﺎﻭﺩ ﻧﺪﻳﺮﻫﺎ، ﻟﺪﺭﺟﺔ ﺃﻧﻨﻲ ﻭﻟﻴﺖ ﻋﺎﺭﻑ ﺃﺳﻤﺎﺀ ﺟﻤﻴﻊ ﺍﻟﺒﻨﺎﺕ ﻭﺍﻟﺪﺭﺍﺭﻱ ﺍﻟﻠﻲ ﺧﺪﺍﻣﻴﻦ ﺗﻤﺎ . ﻭﻟﻴﺖ ﻛﺎﻧﺤﺲ ﺃﻥ ﻣﺸﻜﻠﺘﻲ ﺍﻟﺤﻘﻴﻘﻴﺔ ﻭﻻﺕ ﻫﻲ ﺍﻟﻮﺳﻮﺍﺱ ﻭﺍﻟﻤﺮﺽ ﺍﻟﻨﻔﺴﻲ ﻣﺎﺷﻲ ﺍﻟﻤﺮﺽ ﺍﻟﻌﻀﻮﻱ . ﻣﺸﻴﺖ ﻋﻨﺪ ﻃﺒﻴﺐ ﻧﻔﺴﻲ، ﻛﻨﺖ ﺑﺎﻏﻲ ﻧﻌﺎﻭﺩ ﻟﻴﻪ ﻛﻮﻟﺸﻲ ﻭﻳﺘﺼﻨﺖ ﻟﻴﺎ ﻷﻥ ﻫﺎﺫ ﺍﻟﻤﺸﻜﻠﺔ ﻣﺎﻧﻘﺪﺭ ﻧﻌﺎﻭﺩﻫﺎ ﻟﺤﺘﻰ ﺣﺪ ﻣﻦ ﺻﺤﺎﺑﻲ ﻭﻻ ﻋﺎﺋﻠﺘﻲ، ﺳﺎﻋﺎ ﻣﺎﺑﻘﻴﺖ ﻋﻨﺪﻭ ﺣﺘﻰ 5 ﺍﻟﺪﻗﺎﺋﻖ ﻭﺧﺮﺝ ﻟﻲ ﺷﻲ ﺃﺩﻭﻳﺔ ﺩﻳﺎﻝ ﺍﻷﻋﺼﺎﺏ ﻭﻗﺎﻟﻴﺎ ﺑﺎﻟﺴﻼﻣﺔ .
ﻓﻬﺎﺫ ﺍﻟﻤﺪﺓ ﺧﺴﺮﺕ ﺑﺰﺍﻑ ﺩﻳﺎﻝ ﺍﻟﻔﻠﻮﺱ ﺣﺘﻰ ﻣﺎﺑﻘﻰ ﻟﻴﺎ ﻣﻨﻬﺎ ﻭﺍﻟﻮ، ﻛﻨﺖ ﻣﺨﺒﻲ 5000 ﺩﺭﻫﻢ ﺑﺎﺵ ﻧﺪﻭﺯ ﺍﻟﺼﻴﻒ ﻭﻧﺴﺎﻓﺮ ﻟﻠﺸﻤﺎﻝ، ﺳﺎﻋﺎ ﻣﺸﺎﺕ ﻛﺎﻣﻠﺔ ﻓﻲ ﺍﻟﺘﺤﺎﻟﻴﻞ ﻭﺍﻷﻃﺒﺔ ﻭﺍﻷﺩﻭﻳﺔ، ﻭﻟﻜﻦ ﺩﻳﻤﺎ ﻛﺎﻧﺼﺒﺮ ﺭﺍﺳﻲ ﻭﻧﻘﻮﻝ ﺍﻟﻠﻬﻢ ﺗﺠﻲ ﺍﻟﺪﻗﺔ ﻓﺎﻟﻔﻠﻮﺱ ﻭﻻ ﺗﺠﻲ ﻓﻲ ﺍﻟﺼﺤﺔ، ﻭﺑﻘﻴﺖ ﻛﻞ ﻳﻮﻡ ﻧﺘﺴﻨﻰ ﺇﻳﻤﺘﺎ ﻳﺠﻲ ﺍﻟﺜﻼﺛﺎﺀ ﺑﺎﺵ ﻧﺪﻳﺮ ﺍﻟﻔﺤﺺ ﺍﻷﺧﻴﺮ ﺍﻟﻨﻬﺎﺋﻲ ﻭﻧﺮﺗﺎﺡ ﺑﺼﻔﺔ ﻧﻬﺎﺋﻴﺔ .
ﻓﺎﺵ ﺟﺎ ﺍﻟﺜﻼﺛﺎﺀ ﺗﻘﺎﺩﺍﺕ ﻟﻴﺎ ﻛﺎﻉ ﺍﻟﻔﻠﻮﺱ ﺍﻟﻠﻲ ﻛﺎﻧﺖ ﻋﻨﺪﻱ، ﻣﺸﻴﺖ ﻟﻮﺍﺣﺪ ﺍﻟﺠﻤﻌﻴﺔ ﺩﻳﺎﻝ ﻣﺤﺎﺭﺑﺔ ﺍﻟﺴﻴﺪﺍ ﻭﺍﻟﻠﻲ ﻛﺎﺩﻳﺮ ﻓﺤﻮﺻﺎﺕ ﻣﺠﺎﻧﻴﺔ ﻛﻞ ﻳﻮﻡ ﺛﻼﺛﺎﺀ ﻭﺟﻤﻌﺔ ﻭﻛﺎﺗﻌﻄﻲ ﺩﺭﻭﺱ ﻟﻠﻮﻗﺎﻳﺔ ﻣﻦ ﺍﻟﺴﻴﺪﺍ ﻟﻠﻨﺴﺎﺀ ﻣﻤﺘﻬﻨﺎﺕ ﺍﻟﺪﻋﺎﺭﺓ . ﻓﺬﺍﻙ ﺍﻟﻨﻬﺎﺭ ﺷﻔﺖ ﺷﻲ ﻣﻮﺍﻗﻒ ﺍﻟﻠﻲ ﻏﻴﺮﻭ ﻟﻴﺎ ﺣﻴﺎﺗﻲ ﻛﺎﻣﻠﺔ، ﺷﻔﺖ ﻋﻴﺎﻻﺕ ﻛﺒﺎﺭﺍﺕ ﻓﻲ ﺍﻟﺴﻦ ﻭﺷﺎﺑﺎﺕ ﻓﻲ ﻋﻤﺮ ﺍﻟﺰﻫﻮﺭ ﻣﺮﺍﺿﺎﺕ ﺑﺎﻟﺴﻴﺪﺍ ﻛﺎﻳﺠﻴﻮ ﻟﻠﺠﻤﻌﻴﺔ ﻛﺎﻳﺎﺧﺬﻭ ﺍﻟﺪﻭﺍﺀ، ﺷﻔﺖ ﺃﻧﻬﻢ ﻭﺍﺧﺎ ﻣﺼﺎﺑﺎﺕ ﺑﺎﻟﺴﻴﺪﺍ ﻣﺎﺯﺍﻝ ﻛﺎﻳﺠﻴﻮﻫﻮﻡ ﺍﻟﺘﻠﻴﻔﻮﻧﺎﺕ ﻣﻦ ﻋﻨﺪ ﺍﻟﺰﺑﺎﺋﻦ ﻭﻛﺎﻳﺪﻳﺮﻭ ﻣﻌﺎﻫﻮﻡ ﺍﻟﻮﻗﺖ ﻓﺎﺵ ﻳﺘﻼﻗﺎﻭ . ﻭﻟﻜﻦ ﺷﻔﺖ ﻣﻮﻗﻒ ﺃﺧﺮ ﻭﻗﻊ ﻓﺬﺍﻙ ﺍﻟﻨﻬﺎﺭ ﻭﺍﻟﻠﻲ ﻓﺎﺵ ﻛﺎﻳﺠﻴﻨﻲ ﺩﺍﺑﺎ ﻓﺒﺎﻟﻲ ﻛﺎﻧﺘﻔﻜﺮﻭ ﺑﺄﺩﻕ ﺍﻟﺘﻔﺎﺻﻴﻞ ﺑﺤﺎﻻ ﻳﺎﻻﻩ ﻭﻗﻊ ﻟﻴﺎ ﻏﻴﺮ ﺍﻟﺒﺎﺭﺡ .
ﻓﺎﺵ ﺧﺪﺍﺕ ﻟﻴﺎ ﻭﺍﺣﺪ ﺍﻟﻔﺮﻣﻠﻴﺔ ﻣﺘﻄﻮﻋﺔ ﺍﻟﺪﻡ، ﻋﻄﺎﺗﻨﻲ ﺭﻗﻢ ﻭﺟﻠﺴﺖ ﻓﺼﺎﻟﺔ ﺍﻹﻧﺘﻈﺎﺭ ﻣﻊ ﺷﻲ ﺩﺭﺍﺭﻱ ﻭﺷﻲ ﺑﻨﺎﺕ ﻗﺪﻱ ﻓﻲ ﺍﻟﺴﻦ ﻛﺎﻧﺘﺴﻨﺎﻭ ﺍﻟﻄﺒﻴﺐ ﺍﻟﻠﻲ ﺑﺪﻭﺭﻭ ﻣﺘﻄﻮﻉ ﻓﻲ ﺍﻟﺠﻤﻌﻴﺔ ﺑﺎﺵ ﻳﺠﻲ ﻭﻳﻌﻄﻴﻨﺎ ﺍﻟﻨﺘﺎﺋﺞ، ﻭﻣﺎﺯﺍﻝ ﻛﺎﻧﻌﻘﻞ ﺃﻥ ﺍﻟﺮﻗﻢ ﺍﻟﻠﻲ ﻛﺎﻥ ﻋﻨﺪﻱ ﻫﻮ 11. ﻓﺎﺵ ﺟﺎ ﺍﻟﻄﺒﻴﺐ ﺑﺪﺍﻭ ﻛﺎﻳﺪﺧﻠﻮ ﻋﻨﺪﻭ ﺣﺴﺐ ﺗﺮﺗﻴﺐ ﺍﻷﺭﻗﺎﻡ، ﻭﺍﻟﻠﻲ ﺩﺧﻞ ﻋﻨﺪﻭ ﻛﻴﺒﻘﺎ ﻏﻴﺮ ﺩﻗﻴﻘﺔ ﻭﻻ ﺟﻮﺝ ﻭﻛﺎﻳﺨﺮﺝ، ﺷﻮﻳﺔ ﺟﺎﺕ ﺍﻟﻨﻮﺑﺔ ﻓﻮﺍﺣﺪ ﺍﻟﻤﺮﺃﺓ ﺣﺎﻣﻠﺔ ﻭﺩﺧﻠﺖ ﻋﻨﺪ ﺍﻟﻄﺒﻴﺐ ﺍﻟﻤﻜﺘﺐ ﺩﻳﺎﻟﻮ، ﻭﺗﻌﻄﻼﺕ ﻋﻨﺪﻭ ﺑﺰﺍﻑ، ﻭﺃﻧﺎ ﺑﺪﺍ ﻛﺎﻳﺼﻴﺒﻨﻲ ﺍﻟﺘﻮﺛﺮ ﻭﺍﻟﺨﻮﻑ . ﺩﺍﺯﺕ ﺗﻘﺮﻳﺒﺎ ﺭﺑﻊ ﺳﺎﻋﺔ ﻭﺃﻧﺎ ﻧﺴﻤﻊ ﺍﻟﺒﺎﺏ ﺗﺤﻞ، ﺗﻠﻔﺖ ﺷﻔﺖ ﺫﻳﻚ ﺍﻟﻤﺮﺃﺓ ﺧﺎﺭﺟﺔ ﻭﻋﻴﻨﻴﻬﺎ ﺣﻤﺮﻳﻦ ﺑﺤﺎﻻ ﻛﺎﻧﺖ ﻛﺎﺗﺒﻜﻲ، ﺳﺪﺍﺕ ﺍﻟﺒﺎﺏ ﻭﺗﻤﺸﺎﺕ 3 ﺍﻟﺨﻄﻮﺍﺕ ﻭﻫﻲ ﺗﻄﻴﺢ ﺳﺨﻔﺎﻧﺔ ﻭﺑﺪﺍﺕ ﻛﺎﺗﻐﻮﻁ : " ﺃﻣﻴﻤﺘﻲ ﺧﺮﺟﺖ ﻋﻠﻰ ﺭﺍﺳﻲ ﻭﻋﻠﻰ ﻫﺬﺍ ﺍﻟﻠﻲ ﻓﻜﺮﺷﻲ ". ﻛﻮﻟﺸﻲ ﺑﺪﺍ ﻛﺎﻳﺸﻮﻑ ﻓﺎﻷﺧﺮ، ﻭﺷﻲ ﺑﻨﺎﺕ ﻛﺎﻧﻮﺍ ﺟﺎﻟﺴﻴﻦ ﻣﻌﺎﻧﺎ ﺑﺪﺍﻭ ﻛﺎﻳﺒﻜﻴﻮ، ﻭﺣﺘﻰ ﺃﻧﺎ ﺑﺮﺍﺳﻲ ﺣﺴﻴﺖ ﺑﺎﻟﺒﻜﻴﺔ ﺫﻳﻚ ﺍﻟﺴﺎﻋﺔ ﻭﻟﻜﻦ ﺣﺒﺴﺘﻬﺎ ﻓﻴﺎ . ﺧﺮﺝ ﺍﻟﻄﺒﻴﺐ ﻛﺎﻳﺠﺮﻱ ﻭﻋﺎﻭﻧﻮﻩ ﺷﻲ ﺑﻨﺎﺕ ﻫﺰﻭﻫﺎ ﻭﺩﺍﻭﻫﺎ ﻭﻭﺍﺣﺪ ﺍﻟﺒﻴﺖ ﺃﺧﺮ ﻭﺭﺟﻊ ﻫﻮ ﻟﻠﻤﻜﺘﺐ ﺩﻳﺎﻟﻮ .
ﻣﺎﻗﺪﺭﺗﺶ ﻧﺒﻘﻰ ﻧﺘﺴﻨﻰ ﻣﺎﺯﺍﻝ ﻭﺍﺧﺎ ﻣﺎﻭﺻﻼﺗﻨﻴﺶ ﺍﻟﻨﻮﺑﺔ، ﻧﺎﺿﺖ ﻭﺍﺣﺪ ﺍﻟﺒﻨﺖ ﺑﻐﺎﺕ ﺗﺪﺧﻞ ﺗﺸﻮﻑ ﺍﻟﻨﺘﻴﺠﺔ ﺩﻳﺎﻟﻬﺎ ﻭﺃﻧﺎ ﻧﺪﻓﻌﻬﺎ، ﻋﺮﻓﺖ ﺃﻧﻪ ﺗﺼﺮﻑ ﻏﻴﺮ ﻻﺋﻖ ﻭﻟﻜﻦ ﻣﺎﺷﻌﺮﺗﺶ ﺑﺮﺍﺳﻲ ﺫﻳﻚ ﺍﻟﺴﺎﻋﺔ، ﺩﺧﻠﺖ ﻋﻨﺪ ﺍﻟﻄﺒﻴﺐ ﻋﻄﻴﺘﻮ ﺭﻗﻤﻲ ﻭﻋﻄﺎﻧﻲ ﻭﺭﻗﺘﻲ ﻭﻛﺎﻧﺖ ﺍﻟﺘﺤﻠﻴﻠﺔ ﻣﺰﻳﺎﻧﺔ، ﺧﺮﺟﺖ ﻭﻟﻜﻦ ﺑﻘﻴﺖ ﻣﺘﺄﺛﺮ ﺑﺬﺍﻛﺸﻲ ﺍﻟﻠﻲ ﻭﻗﻊ ﻟﺬﻳﻚ ﺍﻟﻤﺮﺃﺓ ﻣﺴﻜﻴﻨﺔ، ﻭﺃﻥ ﺫﺍﻙ ﺍﻟﻤﻮﻗﻒ ﻛﺎﻥ ﺣﺘﻰ ﺃﻧﺎ ﻳﻤﻜﻦ ﻛﺎﻥ ﻳﻮﻗﻊ ﻟﻴﺎ . ﺑﺎﻥ ﻟﻴﺎ ﻭﺍﺣﺪ ﺍﻟﻜﺮﺳﻲ ﺩﻳﺎﻝ ﻭﺍﺣﺪ ﺍﻟﺤﺪﻳﻘﺔ ﻗﺮﻳﺒﺔ ﻭﺟﻠﺴﺖ ﻓﻴﻪ ﻭﺑﻘﻴﺖ ﻛﺎﻧﺒﻜﻲ، ﺣﺴﻴﺖ ﺑﺤﺎﻻ ﺫﺍﻙ ﺍﻟﺒﻜﺎﺀ ﺍﻟﻠﻲ ﻣﺎﺑﻜﻴﺘﻮﺵ ﺷﺤﺎﻝ ﻣﻦ ﻋﺎﻡ ﻫﺎﺫﺍ ﺧﺮﺝ ﻛﻮﻟﻮ ﺍﻟﻴﻮﻡ .
ﺩﺍﺯﺕ ﺩﺍﺑﺎ ﻋﺎﻣﻴﻦ ﻋﻠﻰ ﻫﺎﺫ ﺍﻟﻘﺼﺔ، ﻧﺴﺮﻳﻦ ﺗﺰﻭﺟﺎﺕ ﻭﻃﻠﻘﺎﺕ ﻭﺭﺟﻌﺖ ﺗﺴﻜﻦ ﻣﻌﺎ ﺧﺎﻟﺘﻬﺎ، ﻭﻟﻴﻨﺎ ﻛﺎﻧﺘﻠﻘﺎﻭ ﻣﺮﺓ ﻣﺮﺓ ﺻﺪﻓﺔ ﻓﺎﻟﺪﺭﻭﺝ ﺣﺘﻰ ﺍﻟﺴﻼﻡ ﻣﺎﺑﻘﻴﻨﺎ ﻧﻘﻮﻟﻮﻫﺎ . ﺷﺪﻳﺖ ﺍﻹﺟﺎﺯﺓ ﺩﻳﺎﻟﻲ ﻭﺩﺍﺑﺎ ﺃﻧﺎ ﻣﻮﻇﻒ ﻓﻲ ﺍﻟﻘﻄﺎﻉ ﺍﻟﻌﺎﻡ . ﺑﺰﺍﻑ ﺩﻳﺎﻝ ﺍﻟﺒﻨﺎﺕ ﺍﻟﻠﻲ ﻛﺎﻧﻮﺍ ﻛﺎﻳﺮﻓﻀﻮ ﺣﺘﻰ ﻳﺨﺮﺟﻮﺍ ﻣﻌﺎﻳﺎ ﻓﺎﺵ ﻛﻨﺖ ﻛﺎﻧﻘﺮﺍ ﺑﺪﻳﺖ ﻛﺎﻧﺤﺲ ﺑﻴﻬﻮﻡ ﺩﺍﺑﺎ ﻛﺎﻳﺘﻠﺼﻘﻮ، ﻣﺎﺑﻘﻴﺖ ﻛﺎﻧﺪﻳﻬﺎ ﻓﺤﺘﻰ ﻭﺣﺪﺓ ﻭﺍﺧﺎ ﺗﺎﻳﻘﻮﻟﻮﺍ ﻋﻠﻴﺎ ﻣﻌﻘﺪ، ﻭﻟﻜﻦ ﻣﻌﺬﻭﺭﻳﻦ ﻣﺎﺩﺍﺯﺵ ﻋﻠﻴﻬﻮﻡ ﺣﺘﻰ ﺭﺑﻊ ﺫﺍﻛﺸﻲ ﺍﻟﻠﻲ ﺩﺍﺯ ﻋﻠﻴﺎ .
ﻫﺎﺫﻱ ﻫﻲ ﺗﺠﺮﺑﺘﻲ ﻭﺍﻟﻠﻲ ﻋﻠﻤﺎﺗﻨﻲ ﺑﺰﺍﻑ ﺩﻳﺎﻝ ﺍﻟﺤﻮﺍﻳﺞ، ﻋﻠﻤﺎﺗﻨﻲ ﺃﻥ ﺍﻟﺪﻧﻴﺎ ﻏﺪﺍﺭﺓ ﺗﻘﺪﺭ ﺗﻘﻠﺐ ﻋﻠﻴﻚ ﻓﺄﻱ ﻭﻗﺖ، ﺃﻥ ﺍﻟﻨﺎﺱ ﺍﻟﻠﻲ ﻛﺎﻧﻮﺍ ﻋﺰﺍﺯ ﻓﺤﻴﺎﺗﻚ ﻳﻘﺪﺭ ﻳﺠﻲ ﺷﻲ ﻧﻬﺎﺭ ﻳﻐﻴﺒﻮﺍ ﻣﻨﻬﺎ ﺑﺤﺎﻻ ﻋﻤﺮﻫﻮﻡ ﻣﺎﻛﺎﻧﻮﺍ، ﺃﻥ ﺍﻟﺪﻧﻴﺎ ﻋﻨﺪ ﺑﺰﺍﻑ ﺩﻳﺎﻝ ﺍﻟﻨﺎﺱ ﻣﺒﻨﻴﺔ ﻋﻠﻰ ﺍﻟﻤﻈﺎﻫﺮ ﺍﻟﺨﺪﺍﻋﺔ ﻭﻋﻠﻰ ﺍﻟﻜﻤﺎﻟﻴﺎﺕ، ﺗﻌﻠﻤﺖ ﺃﻥ ﺭﺍﺣﺔ ﺍﻟﺒﺎﻝ ﻫﻲ ﺃﻫﻢ ﻣﻦ ﺟﻤﻴﻊ ﺍﻟﻤﺎﺩﻳﺎﺕ، ﻭﺍﻷﻫﻢ ﻣﻦ ﻫﺬﺍ ﻛﻠﻮ ﻋﺮﻓﺖ ﺃﻥ ﺍﻟﻠﻪ ﻋﻤﺮﻭ ﻣﺎﻛﺎﻳﺘﺨﻠﻰ ﻋﻠﻰ ﺍﻟﻌﺒﺎﺩ ﺩﻳﺎﻟﻮ ﻭﻛﺎﻳﻌﻄﻴﻬﻮﻡ ﺩﺍﺋﻤﺎ ﻓﺮﺻﺔ ﺑﺎﺵ ﻳﺼﺤﺤﻮﺍ ﺍﻷﺧﻄﺎﺀ ﺩﻳﺎﻟﻬﻮﻡ ﻭﻳﺘﻮﺑﻮﺍ ﻭﻳﺮﺟﻌﻮﺍ ﻟﻴﻪ
ﺍلنهااااااااااااااية
كيف جاااااتكم القصة؟