بين سطور الجامعة

بين سطور الجامعة

شكون نتي بنت ولا ولد؟؟ 
هههه شنو بان ليك؟ انا بنتيلي بنت على دري!!
السلام عليكم انا سميتي (صارة) كان فعمري 18 عام منين خديت لباك ديالي بصعوبة حيت لجيهاوي كانت عندي فيه 4،03 وكافحت مزيان باش ناخد الباك واخا خديتو ب 10،78 كنت فرحانة بيه ولكن مكانش عندي بيه شي افاق صافي قرروا دارنا ندير لفاك كنا ميسورين فحالتنا المادية ولكن تازمنا بزاف ومابقاش لفلوس كعدنا فالاول ولكن لحد الان مزال عايشين كيف كنا حامدين الله وشاكرنو . انا المتوسطة فالدار اما صفاتي حتا تقراو لقصة ونتوما غادي تعرفوني كدايرة اما شكلا واخدة حقي من الزين بكل تواضع نخليكم مع القصة والاحداث بدات من مشيت كنقرا فلافاك فمدينة اخرى من غير مدينتي بحكم مافيهاش لافاك وسكنت فالحي الجامعي الغرفة 22 المجموعة 3 مع صحبتي (ليلى) واحد البنت من تاونات كانت ضريفة مسكينة وجوج دصحابتنا ساكنين فغرفة وحدا اخرى، حنا كنا ربعة ديال صحابات انا وهدى ليلى وهند كنا عاطيينها غي لضحك وتقشاب والخوف كنا كنخافو من الطلبة القاعديين وكنخافو من ولاد واحد الحومة ديال لكاريان كانت حدا الحرم الجامعي بحكم فيها شماكرية بزاف.
واحد نهار كنا خارجين حنا بربعة بنا كيف العادة فالعشية كندورو فالحرم الجامعي ومع الخرجة كان كالس واحظ الدري وصاحبو كيهدرو ومنين دزنا من حداهم سمعنا كلمة حمارة وحنا بالخفة للي فينا درنا عندو وكلسنا كنعايروه تا وقف وحنا نسكتو حيت كان طويل وبيض وعاااامر بالعضلات وقالنا غاتحركو من هنا ولا ميعجبكم حال وحنا هربنا خفنا منو وخا هكاك بقى تبعنا وكيكمكم وحنا كنويلو وندبو ونا نزعم وندور لعندو وخنزرت فيه وشوية تمسكنت وقلت ليه والله اخويا مكنا داوين معاك راك نتا االلي حكرتينا و.... وداز وخلانا مدهاش فينا مشينا كلسنا فواحد صور كايقولولو صور المعكازين

2)وهو جا لعدنا وجلس حديا وبدا كيهدر وكيطلب منا سماحة حيت كان معصب حيت شي وحدة كانت خداتلو مليون كعربون ديال شي حاجة مهم هو بقا كيهدر معانا سميتو مروان فعمرو 28 سنة وتعرف علينا صافي مشا بحالو وحنا دخلنا بحالنا لحي والغد ليه جات عدنا ختي لكبيرة لحي فيقاتنا انا وليلى وسخراتنا وحنا محملينش راسنا خرجنا بلا منغسلو وجهنا مشينا لسويقة فطريقنا تلاقينا مروان وصاحبو منعم دزنا من حداهم ومعرفوناش حيت كنا حالتنا هههه شوية درنا بقينا كنشوف فيهم وحنا لقيناهم في حالة صدمة كايقولو واش هادو هما لبنات اللي كنا معاهم لبارح وحنا مارضيناش تقدينا دغيا ومشينا جرية لحي لبسنا وقادينا حالتنا وخرجنا كنقلبو عليهم زعما شفونا هحنا زوينات هههه والو ملقيناهمش مهم داز هاد نهار واحد نهار تلاقيناهم فالكلية وسلمنا عليهم وتعارفنا كثر وعرفناهم ولاد الحومة اللي حدا الحي مهم بقينا عاطيينها لضحك وتقشاب ولينا كنتلاقاو بزاف بحككم جيران هههه وليت كنحس بمروان كيشوف فيا شفات فشي شكل والمغزى بان كنتهرب منو ملي كنشوفو زاغ دازت 15 يوم وهو يقولي راه كنبغيك ونا اكيد متيقتوش ونا نقوليه انا بعدا لا وماغديش نربط معاك حتى شي علاقة كون هاني وباش نقص عليك داك الهيت اللي غادي تخطبو علية وبحكم انا كنت كنحلم ديما بزواج تقليدي مهم سيد تصدم زدت وخليتو.
لغد ليه تلاقينا فالكلية كلشي كيضحك وانا نافخا هو يجي لعندي قالي نبداو اصدقاء بقيت كنطنز عليه وهو مدار والو هاكا بقينا غي كيهدر كنطنز عليه ولانستهزء منو وكلشي عرف بلي عينو فيا واحد نهار كانت عندي مشكلة فروسي ديالي حيت كنت درنا ترونسفير لالانجليزية وهو وقف معانا بزاف حتا قادينا المشكل وخا هكاك بقيت نافخا مهم لغد ليه كنا غادي نمشيو لمدينتنا وهو جا لعدنا وجاب طونبيل صاحبو باش ياخدنا لمحطة .

3) وننا اكيد مبغيتش وبقاو لبنات كيحزرو فيا بسيف باش بغيت ركبنا ودانا لتماك فاش وصلنا لبنات بقاو كيتعطاو نوامر معاه الا انا مهم مشينا دوزنا لعيد لكبير جلسنا شي 20 يوم تماك وهاد لمودا مسكين كان ديما كيسيفط ليا لميساجات ويصوني ونا مكنجاوبش حيت معجبنيش لحال جاب نمرتي من عند ليلى مهم رجعنا لافاك وتلاقينا دراري حيت كانت علاقة زوينة بين مروان ومنعم وزدنا تعرفنا على خالد بقينا اصدقاء وكلشي كيتغامزو علية اه نسيت مقلتش ليكم مروان كان سقط فلباك ومشى كيخدم فلبني وكيخدم فالشركات لمدة 4 سنين و2010 دار باك حر وخداه ورجع كيقرا فلافاك وهكاك حتى منعم.. مهم بقينا على هاد الحالة انا ومروان رجعنا اصدقاء ومتقبلتش يكون شي حاجة كثر وخا هكاك مستسلمش ومكنش مسوقالو دوزتها عليه مهم دازت شي شهرين هاكا وحنا مكنقراو موالو غير الضحك والنشاط جات لوقيتا لي نمشيو نحيبو لبورس مشينا لقينا واحد المخلوق نتعرفو واش دري ولا بنت وجعنا راسنا واكيد كان معانا سي مروان بقينا كنضحكو خدينا فلوسنا وخرجنا ولقينا داك لمخلوق تراهنا على 200 درهم لواحد ونسولو صافي قبلو ومشيت لجيهتو بكل ثقة واش نتا بنت ولا نتي ولد وهي تقولي بنت وكضحك وهنا غادي تبدا حياتنا تقلب وتبدل انا وصحاباتي الاربع..

(4)قالتلينا تانتوما كتقراو فلافاك قلنا ليها اه مهم بقاو ليلى وهند و هدى ماشيين لقدام مع هديك المخلوقة وانا ومروان لور حيت مابغانيش نمشي معاهم مهم وصلنا حدا الحي وكنتسنا غي امتا يمشي مروان حيت قتلني لفضول غير مشى ودرت راسي دخلت لحي وليت رجعت لعند لبنات ونا نقول لديك لبنت واش نتي لزبيانة بقات حالة فمها فية وهي تقولي هند شنو هاد لزبيانة ونا نقولها سحقية يعني لبنت كتبغي غي لبنات وهي تقولي اه لزبيانة ونا نقولها وماماك عارفة بحكم حنا ترابينا مكنديروش شي حاجة بلا خبار امهاتنا يعني سؤال بريء بقات كضحك وهي تقولي ماما ماشي شغلها فحياتي مهم بقات لهدرة بيناتنا وتعاطينا نمرة بغينا نعرفو كيفاش عايشا هاد العالم وسميتها نور الملقبة بتشيكو حالتها كانت قصيرة وعامرة شوية وسمرا ودايرة تشويكة بحال دراري ولابسة لباس هيب هوب ووجهها باهت صفر. هي مشات فحالها وحنا دخلها كنحاورو فهادشي للي شفناه دازت الايام وهي واحد نهار صوناتلي قالتلي واش نتلقاو بقينا كنفكرو وقلنا ليها اوكي اكيد كذبنا على اصدقاءنا وخرجنا تلاقيناها كانت جايبا معاها واحد البنت غزالة ولكن نفس ستيل بقينا كندورو وهي تقولنا نمشيو لواحد لقهوة مشينا ومنين دخلنا فهمنا لقيتها ديال شيشة بقيت كنشوف مبادئ ديالي كنتخلى عليهم مهم معجبنيش لحال فمرة حطو لينا الماكلة وجات تشيكو جلسات حدايا تتغزل بففف كتعيف ونا نقولها نجيك من التالي انا كيعجبوني رجال وبقاو كيضحكو وهوما يطلعو بنات بحالنا ماشي مرجلين والمفاجئة حتا هوما لزبيانات من نوع اخر بقاو كيعاودو مغامرات ديالهم ونا غي كنسول باغا نعرف كلشي شوية جابو شيشات وكلشي بقا كيشيش ونا كرغب لبنات باش ميشيشوش ولكن مسمعنيش ولكن انا تصدمت فهيند للي كانت اخوانية غي صلا ولعبادة كرهتها هديك الساعة مهم مشا لحال ... 

5)شدينا تاكسي ومشينا الحي لقينا مروان حدا باب لحي كيتسنانا لبنات دخلو حيت كانو دايخين حيت اول مرة كيشيشو ونا بقيت مع مروان عاوتليه كلشي وهو بقى كينصحني بحال شي خويا مهم الغد ليه كنت جالسا فبيتي حتا دخلو لبنات ومعاهم تشيكو وديك لبنت ديال لبارح للي مسميا رسها ميسي انا معجبنيش لحال ولكن حشمت منهم مهم درنا لغدا والعشى فليل تكروازات ليلى مع ميسي و هدى مع تشيكو وانا بوحدي منين فقنا صباح لقيت ليلى مطبعة من عنقها مديت مجبت مههم لبنات بقاو كيرغبونا نمشيو معاهم لتيران نتفرجو انا رفضت ولكن رغيب ولمزاوكة تا بغيت ولكن ماشية وما شي بخاطري مشينا دخلنا بصعوبة حيت لمخازنية ولبولس متيقوش ميسي وتشيكو بنات مهم تفرجنا فلماتش فجو خايب غي تخسار الهدرة فالمدرجات ونا كنت خايفة تقلب عصى حيت كانت لعبا الرجاء و الماص مهم جاب الله كمل الماتش ومشينا فحالنا ولكن شرطت على تشيكو متمشيش معانا وصافي علاقتنا تسالا وجريت لبنات بسيف يدخلو مهم مروان نهار كامل كيصوني وكنقكع عليه فصباح جينا خارجين وهو يجرني مروان من كتفي ونا معجبنيش لحال وهو بقى كيغوت كيقولي اش ظاك لشي ماتش ولا لشي زبل ونا نقولو نتا اصلا مشغلكش فينا وغوت عليه مزيان وزدت وخليتو وهما لبنات بقاو كيقلولو بعد منها هي ممزياناش و.. شوف وحدا اخرى بلا بيها هادشي اكيد تالتالي عاد عرفتو مهم دازو ايام وكنتجمعو ولكن مروان مبقاش كيهدر معايا بزاف ولكن شوفاتو كيكلوني وهي تقولي ليلى صارة بغيت نقوليك شي حاجة وقلتلها شنو قلتلي هاظيك ليلا دوك طبايع دارتهملي ميسي ونا نتصدم وقالتلي وناوعجبني لحال 
انا: ميمكنش راه غي جابليك الله نتي ماشي لزبيانة 
ليلى: مهم انا نطلب منك طلب انا غادي نعاود نعيط لبنات يوليو يجيو باش نتاكد من مشاعري
أنا:بقيت كنفكر قلتلها اوكي انا خفت على...

6) صاحبتي ضيع وكان علية نوافق يجيو عدنا هدوك لمسخات مهم جاو عدنا هداك نهار ولكن مامشاوش لبيتي مشاو عند هند وهدى وحتا ليلى مشات معاهم ونا بقيت فبيتي وهو يصونيلي مروان باش نخرج لعندو خرجت عندو وطلب سماحة مني حيت غوت علية وقالي ياك حنى غي اصدقاء قتليه اه قالي تبقاي تعاودلي كلشي وافقت حيت كيعجبني نعاودلو كلشي بقا كيقولي هادوك لبنات غادي يديرولكم غي شبوهات ونتي راكي بعقلك مهم هدرتو عجباتني ولكن للي كيوقع عند لبنات كان خطير كانو عاطينها شراب ولكماية وحتى السلسيون زيد عليها الميوعة داكشي مشمئز يعني ليلى ولات رسمي لزبيانة هي و هدى وهند اصلا كانت كتبغي شي ريفي ولكن درة وشيشة فشيشكل هادشي انا دابزت مع لبنات حيت وقع هادشي ولكن كتر دابزت مع هند حيت عايرتها بداك لفولار للي كانت دايرة وتقاطعنا معاها فمرة حيت خرجات لهدرة على لبنات ونسبات ليهم كلشي فلحي كنا ربعة بقينا غي ثلاتة انا بقيت كنرغب فلبنات يرجعو لطريق ولكن هاد طريق خايبة ايلا مشيتي فيها صعيبة ترجع منها حيت فاش لبنت كتبغي شي بنت كتعذب من كل لجوانب لدرجة ليلى شرطات يديها بلموس ورجعت كلها دمايات وبقينا معاها تا هدنات وعيت على باباها قلت ليه اجي خود ليلى تجلس فدار شي يامات عاد جيبها وهو نيت جا داها وهادشي كامل درتو بمساندة مروان ومنعم وخالد كانت بيناتنا علاقة قوية بزاف وزوينة ولكن مروان مستسلمش كل مرة كيبغي يقنعني بالحب ديالو وحتى صحابو كيحببوني فيه. مهم دازت الايام وحنا هاكا وبقينا غير انا وهدى مدة شهر وهي تجي ليلى وفرحنا بيها حيت مبقاتش كتبكي بزاف وتسخف وقررنا نديرو خرجة واكيد مع دراري مشينا لمدينة لقديمة تسارينا وبدلنا الجو ولكن رجعنا معطلين والحي كيتسد مع 23:00 ويلا رجعنا غادي يشدونا الطلبة القاعديين ميخليوناش نطلعو

7) واكتريا منين يشوفو معانا ولاد الحومة الي أصلا بيناتهم عداوة قررنا نمشيو لواحد لبيت ديال لقزدير كانو كاريينو دراري مهم دخلونا دراري وسدو علينا وهوما مشاو يجيبو لبنا لعشا وتقاوت ودانونات.. شوية كنسمعو لباب كيخبطو فيه وكيهرسوه علينا وحنا روحنا غادي تخرج شوية فرعو علينا لباب واحد جوج شماكرية وهازين سيوفا وفنفس الوقت ليلى كتصوني على مروان ودوك شماكرية بقاو كيخسرو الهدرة وكيشوفو فليلى وهدى وهوما دارو لجيهتي وهو يقول واحد فيهم عليك كنقلب الله ياربي اش هاد نحس وهو يجرني لعندو وحاط سيف فكرشي قالي نوضي معايا وانا كنبكي وكرغب فيه وجا مخرجني وجاب الله جا مروان ومنعم فكوني غي باللتي هي احسن حيت هوما ولاد حوما وحدة وهاد شماكري كن متبعنا وشدوه دراري عطاوهم لعصى وانا جا عندي مروان كيغوت علية حيت نضت معاه وانا نجمع معاه بطرشة وبقيت كنعايرو وهما بقاو لبنات كيخرجوه وفهموه بلي هو اللي نوضني بسيف وجا كيطلب سماحة مني ونا منخلاه ومصدومة من داكشي اللي وقع وهو تعصب دضرب يدو مع لحيط حتى تجرح وخرج ومشا جاب هداك شماكري اللي ولا كلو دمايات وكيكلب مني سماحة وخرجو مروان وجا كيرغبني هو ومنعم مهم سمحتلو ودازت هاديك اليلة منعسناش فيها وصباح خرجنا مشينا لبيتنا نعسنا ومن تماك بقات علاقتي مع مروان كتكبر ...

8)ولكن لي اكتشفت انا ليلى وهدى خسرتهم ولاو كينتميو لعالم مكنعرفوش عالم مقزز خايب والاهم حرام وهوما عارفين هادشي وضاهسين فيه ولكن انا مبغيتش نتخلى عليهم لدرجة كنمنع عليهم لخروج و التلفون حتى مرضت بالاعصاب مكيسمعونيش ولاو كيجيبهم الحي للغرفة 22 اللي هي ديالي وليت كنحس بلبنات ديال الحي كيشوفو فية شفات ديال الحقد منين كنغوت على صحاباتي ونجلس نصحهم كيضربو يديهم يعني بحال لادروك وليت بسيف علية نشوف تشيكو وكلابها معندهم نفس كنطردهم كنغوت عليهم ولكن كيقلبوها ضحك وكيتسناوني حتى نخرج عند مروان اللي كان المتنفس ديالي الوحيد ويديرو مابغاو ويمارسو الرذيلة.....
ولكن مروان كان ديما كيخرجني ويساريني وعرفت غير من عند منعم مروان كيبريكولي فصباح باش يساريني فلعشية مسكين كان كيحاول يفرحني ويشريلي لكادويات واخا بقليل كنا ديما بخير نرجو لبيتي لي كان وكر ديال الدعارة بمعنى الكلمة ولكن هاد المرة منين دخلت لقيت لبنات اللي فالغرفة اللي حداية كانو عندي هاد البنات كان معروف عليهم كيدبرو على روسهم من النوع الراقي بوكوسات بجهد ولباسات ومغرورات. أنا دخلت قلت: السلام 
كلشي:عليكم سلام 
أنا:كاينا شي حفلة ونا ممعروضاش
ليلى(كتغمز فية):هههه هادو لبنات جاو يتعرفو على تشيكو
أنا: ياكما كلشي لزبيانات ياكما لموضة ديال هاد العام تبغي لبنات؟ 
كلشي بقاو كيضحك بحال قلت نكتة الله ياربي غادي يحمقوني هاد الممسوخات وهي تنطق وحدة
ريم: أنا مستحيل نبغي شي بنت 
هههه ياريت مسكينة مقالت هاد الكلمة حيت تشيكو لا تعرف المستحيلات حتى دازت الايام ولقيت هاد البنت كتبكي على تشيكو كيدارولها ماعرفت هاديك المخلوقة فشكل للي معندوش شخصية دغيا كتغمق عليه بنت لحرام دغيا كتقنع مهم انا هادشي كامل عاودتو لمروان وهو كيسمع فية مسكين وكيصبرني ....

9) على هاد العالم الي تفرض علية اللي حاولت نصلح فيه صحاباتي وفشلت وندمت حيت سولت ديك لماسخة واش بنت ولا دري؟ مهم واح نهار كان عندي امتحان دخلي لبيتي وسديت لباب باش نفيق 6 صباح نراجع شوية ونمشي مع 8 لكن المفاجئة غادي نفيق على صوت الجنس ونشوفو قدامي وياريت بقيت ناعسة ومشفتش هداك المنظر منظر تقشعر له الابدان تشيكو مع ريم!!!!!! مصييييبة كارييثة كانو بجوج عريانات فمرة مفرشين لملاية ديال ليلى وحداهم كنيطات ديال شراب خوضر وكانت ريم لتحت وتشيكو فوق منها تفوو على منظر انا كرهت راسي حيت كنعس فهداك لبيت لمهم محسيت حتا هزيت صندالة وضربتهم بيها وقلت ليهم قو... من هنا المسخات هزو حوايجهم بزربة ومشاو للبيت الي حداية الله يعطيهم غبارة كلاب مسخات شكيت فيهم الله على الاعصاب الي ركبو فيا بقيت كنراجع شوية ولكن دماغي تبلوكا بهداك المنظر مشيت دوزت وخرجت لقيت مروان فرحان كينسناني حيت سمعت كلامو وجيت كندوز الامتحان تلاقيتو سلمت عليه وهو يقولي مالك وبقيت كنبكي حيت مسهلش هداك المنظر فصباح وهو قالي بعصبية طردي صحاباتك اللي دايرين فيك هاد الحالة مجوبتوش ومشينا خرجنا ومرجعت حتى الليل دخلت بدلت حوايجي ومشيت لتيران بقيت كنفكر وكنقول كيف نطرد ليلى الي أنا وياها صحبة 5 سنين ومها وباها موصييني عليها الله يسمحلها على هادشي اللي كدير من جيهة كتغضب ربي وكتخون ثقة ديال عائلتها وكضيع راسها وكتلوحو الهاوية ولكن من جهة اخرى انا شنو ذنبي الى هي الي اختارت هاد الطريق بالارادة ديالها راه الى بقيت متبعها حتى انا غادي نضيع صمعة ديال بقات كتنبش حيت معامن شنك معامن شبهتك...

10) حرت بزااااااف معرفتش شنو ندير خليت الامور نشوف فين ماشيا ودازت الايام قربو امتحانات ديال مروان اللي كان فالسنة الثالثة تخصص قانون كنت كنراجع معاه وكلخص معاه خرجاتنا بداو كينقصو باش يدوز مزيان ولكن كنتلاقاو من 10 دصباح حتى 4 دصباح وحنا فالحرم الجامعي علاقتنا كتقوى نهار على نهار ولكن انا معترفت بوالو رجولتي مكتسمحش ههههه مهم دازو الايام مروان كمل امتحانات دياولو وعرضني نتعشاو فشي رسطورو اول مرة نتعشاو انا وياه راس فراس مهم انا دوشت وقاديت شعري ولبست كسيوة ودرت مكياج خفيف ضريف وخرجت لعندو شدينا تاكسي ومشينا لواحد مطعم كيحمق ديال لحوت ونا نسولو واش عندك لفلوس ديال هادشي وهو بقا كيضحك قالي وغي زيدي مولاها ربي انا زدت ماشي شغلي هو الي غادي يحصل ماشي انا هههه دخلنا وجا عدنا سرباي وكان صديق الطفولة ديال مروان وعاد فهمت بلي غادي يصيب مع مروان مهم جابو لعشا كلينا دكشي غزال كليت شي حوت والله معرفا اسمو جاو حيدو لعشا وجابو واحد ديسير فواكه مشكلة واحد كيكة دشكلاط كتقيسها كيخرج شكلاط بوحدو ههههه وهو جا عندي مروان وحنى على ركبتو وقالي بغيت نقوليك شي كلام ولكن متقاطعنيش مروان: حبيبة انا كنبغيك وبغيتك من النظرة الاولى وتمنيتك لية ونتي لوحيدة الي خلاتني نجري من مراها وانا فرحان وهو عيا بركبة الي كان حاني عليها وبدلها بركبة التانية وبقيت انا كنضحك وحتى هو هههه وهو يقولي انا باغيك تكوني ديالي وغادي نعطيك الوقت الكافي ونتسناك حياتي كاملة باش توافقي تزوجيني ونا بقيت غير كنشوف فيه مصدومة كيفاش قالي اه اصارة انا بغيتك وتمنيتك وظيما كندعي الله تكوني من نصيبي وزيظون عندي ليك واحد المفاجئة انا اتقبلت فالكتابي ديال الشرطة...

11)فرحت بزااف وعجبني لحال ومعرفت شنو نقول ولكن لمهم هو الفرحة الكبيرة حيت غادي يستقر ويكون عندو مستقبل وجبد سنسلة ديال النقرة فيها حرفM ودارهالي ونا عاجبني لحال حيت مكيهمش تكون ذهب ولا ديامون لمهم هو عرفتو خدم باش شراهالي و تعب على هاد الخرجة ومنين كتكون علاقة مبنية على الاحترام والتفاهم والثقة الماديات مكتعني والو مهم كملنا السهرة وحنا فرحانين وانا عجبني الحال حيت شفت مروان بحال شي دري صغير صافي نضنا وخرجنا شدينا تاكسي ورجعني الحي وهو مشا لدار انا دخلت البيت فرحانا ولقيت ورقة مكتوب فيها 
ليلى: حبيبة صارة بلا متقلبي علينا راحنا مشينا اسفي وعافاك متجوبيش على بابا الى صونا عليك حيت قلت ليه راكي مشيتي معانا حتا نتيا حتا نجي ونعاود ليك.
مسوقتش لهاد الرسالة حيت مبقاش عاجبني هادشي اللي كادير فيه ليلى وهدى وعندمن ماشيين اكيد مشاو عند شي لزبيانات حيت هاد الايام كانو عاطيينها غير الشات معاهم تفو كرهت حياتهم بقيت كنفكر فكلام مروان خاصني ندير حد لهادشي حيت فاش كندوز من حدا شي بنات كيبقاو يقولو هاهية للي كتجمع زو... عندها فبيتها وميمكنش نرد على كلشي وماشي كلشي غادي يفهم شنو كيوقع عندي كندير راسي مسمعت والو وكنزيد ولا كنخرج عند منعم وخالد ومروان اللي بدورهم كيقولولي نبعد عل البنات معرفت مندير
لمهم جاو لبنات طايرين بالفرحة وكايعاودو على داكشي وانا غير كنسمعلهم مبغبتش نجبد الموضوع عليهم وعاوتلهم شنو لجديد ديالنا أنا ومروان وفرحولي
مهم خرجت لعند مروان ودراري لعشية كاملة هوما مبقاوش كيبغيو يخرجو معايا لعندهم ومنين جيت راجعة باش نجمع حوايجي حيت صافي العام تسالا الغد ليه غادي نرجع لمدينتي قربت حدا لباب وانا نسمع ليلى: اصلا هي كتغير منا حيت حنا كيتبعونا لبنات وهي جايا فرحانا بولد الكاريان...

12) دبا ينفعها غادي غير يدوز بيهاا وقيتة وصافي 
هدى: وهي غي كتبغي تنصحنا وصافي اصاحبتي
ليلى: تنصح راسها ماشي شغلها فينا هي ماشي بانا ولا منا وزايدو ن هي كتغييييييير حيت حنا ولاو عدنا لفلوس فينما شافتنا كتبقى غير تغوت علينا... أنا بقيت كنضحك حيت هاد الهدرة كيقولوها غير الحمق وعجبني لحال حيت لخصات علية شنو بغيت ندير مهم دخلت وهي جات لعندي ليلى: توحشتك احبوبتي مغاديش نسخى بيك ولفت العيشة معاك 
أنا: انا بعدا غادي نتهنى منكم اجي بعدا كيف غادي ديري لصحابتك
ليلى: الا اصحبتي صافي مبقيتش متبعا هداك العالم هديك كانت غير نزوة وصافي
انا: مزيان(اكيد ممتيقاش) يالله نجمعو حوايجنا كملنا ومع هوما مرفحات خرجو جابو بيتزات وداكشي كلينا نعسنا صباح جينا مخرجين حوايجنا وانا لقى مروان جاي يسلم علية وقفت معاه وبقا كيبكي تصدمت حيت اول مرة نشوف شي دري يبكي علية وانا كنصبرو كنقولو غي 3 شهور ونجي مهم هاكا بقينا حتى جا اب ليلى خدانا هاديك 200 كيلومتر كلها كنفكر فمروان وعاجبني لحال مهم بقينا بالتليفون انا وياه العطلة كاملة وهو واحد نهار بقا معصب حيت مزال مردو عليه بالشفوي وتعصب بزاف وتبدل وانا ديما مقلقة حيت تبدل وشي مرات كنتغاوتو فتيلفون بقينا هكاك. أما لبنات ليلى مبقيتش كنجوبها وهي تفهم راسها واحد نهار جات لعندي هدى (هدى بنت زوينة وضريفة ولكن شخصيتها ضعيفة بزاف الريح اللي جات كتديها تعرفت عليها غير من طريق ليلى يعني مكانش صحبتي بزاف) دخلتها لدار وعطيتها صوابها وهي بقات كتبكي
أنا: مالكي كتبكي(أنا ماشي من داك نوع اللي فيه تعناق والبوسان كنحن على الناس وكيبقاو فية ولكن ديما كندير مساحة معنديش مع تعناق)
هدى: (كتبكي بهستيرية) أنا كنحس براسي ضايعة بزاف
أنا: (كندير راسي مفاهمة والو)بحالاش...

13) هدى: طريق اللي ماشيا فيها خايبا بزاف كتخنقني شحال خايبا تمشي فشي طريق معندها امال وتعلقي فحب بنت انا عارفة هادشي كيجيك غير تخربيق ولكن والله حت خايبة وقاسحة طريق كتديك لدمار والضياع كتخسري صحتك وعلاقتك ومع الل
أنا: ومنين عارفة هادشي لين زايدة لاش بغا توصلي وفين كنتي مدرمة نتي وليلى
هدى: والله معرفت كنا غير زايدين وصافي مهم أنا داك نهار فاش كنا كنهدرو عليك كنا عارفينك كتصنتي قالتلي ليلى نسممعولك كلشي باش تبعدي منا.
أنا: نتوقع منها كلشي وبقيت كنضحك
هدى: بغيتك تكوني صاحبتي ونقراو لعام جاي انا وياك 
أنا: بشرط وراكي عارفاه انا ولا هداك لعالم راه غير نعرفك رجعتيلو غادي نسالي معاك 
مهم بقينا عاطيينها لضحك وكل نهار نهار كتجي لعني وبقات علاقتنا كتقوى وعاودت هادشي لمروان وبغى حيت كلشي كان عارف هدى غير مجرجرة وصافي
جا الوقت وشينا الجامعة وكنت دايراها مفاجئة لمروان ودراري ستفنا حوايجنا وقادينا امورنا والعشية هدر معايا مروان غضبان قلتلو مالك قالي كولشي جاي الا نتي اللي مزال مجيتي قلتلو صافي السيمانا لجاية نجي انشاءالله فرح وقالي غادي يكون هداك احسن نهار فحياتي قلتليه بشرط قالي شنو هو حبيبة (هو كان ديما كريقولهالي ولكن انا كنحشم نقولها) قلتلو سير حدا لحي راه ختي تماك طلع ليها من المحلبة الحرشة بالجبن راه حشمات تقولوليك وراك عارف شماكرية مصالحش تجيبو هي(كانت العلاقة بين ختي مريم اللي مزال كانت كتقرى على ممرضة كانت علاقة زوينة ومتفاهمين علية مزيان هههه هي اللي كتخدلو حقو مني حيت انا شريرة شوية ومنين كتغوت علية على حسابو كنحشم منها) مهم هو طالع وجا حدى باب الحي يتسنى ختي وانا نخرج لعندو وهو بقى مصدوم وجا لعندي حاسة بيه باغي يعنقني ولكن مزال معندوش الجرءة بقى ساعة وهو كيضحك حتى لودنيه...

14) بقينا مجمعين حتى قلتلهم انا وهدى عيينا بغينا ندخلو صافي دخلنا بقينا انا ومروان فتيلفون 
.. من بعد شهرين جاء الفرج وعيطو على مروان لالشفوي مشى دوزو مزيان وفاش جا احتفلنا كاملين وحنا فرحانين و نفس الوقت بقى فينا منعم اللي مزال معيطولو (منعم صاحب مروان الانتيم كتر من الخوت كلشي كيديره بجوج) فرح حتى هو لمروان ودازو ايام وعيطو على مروان باش يلتحق بالاكديمية وخاصو يجمع المسائيل ديالو وانا اللي كنت كندير معاه كلشي كنجمع معاه لوراق والحوايج وداني واحد نهار لدارهم وعرفني عليهم وحتى هوما كبرو بيا بزاف وعجبني لحال وجا الوقت اللي غادي يمشي فيه مروان ويخليني أنا ولفتو بزاف وهاد لافاك بلا بيه فشيشكل مهم توادعنا بالبكا وعنقني تعنيقة خفيفة وقااي انا كنت كنعصب فالصيف معاك غي حيت الى متقبلتش مغديش يكون عندي مستقبل باش نتزوجك وانا بقيت كنبكي وحتى هو و منعم وخالد وهدى جا الوقت باش يمشي توادعنا حيت مغديش نشوفو شهر وحتى التلفون غادي يحايدوهلو...

15) داز هداك شهر بحال لعام داز تقيل بففف توحشتو بزاف بغيت نجبدو من جنابي ههه بقى معايا منعم وعلاقتنا قوات بزاف كيجي كيعاودلي كلشي وحتى أنا.. بقات يوماين ويجي مروان كنت فرحانة بزااف وجات الوقيتة اللي غادي يجي فيها تفقنا باش نمشي نتلاقاو فمحطة القطار واخيييرا غادي نشوف مروان توحشتو بزاف مهم قاديت راسي مزيان وهو يصوني تلفوني وكان خالي قالي نتلاقاو حدة باب لحي حيت ماما مصيفطالي صخرة معاه خرجت لعندو عطاني الصخرة وقالي نمشيو لقهوة اللي فالمحطة قلتلو راه كنوجد غدا عندي امتحان مصلحليش انا غير كذبت عليه حيت الى مشيت مغيصلاحليش نتلقى مروان وهو يصوني مروان وقالي راه قربت ندخل اجي للمحطة قلتلو راه مصلحش حيت خالي راه تماك وهو يقولي انا نجي لعندك حدا الحي دقيقة مكملاتش وهي بدات شتا مجهدة الله ياربي هاد نهار مبغاش يكتابلي نشوق مروان وهو قالي انا نجي مخلتوش حيت شتا مجهدة ونا شعري غادي يضيعلي هههه ماشي حيت خفت على المرض مهم قلت ليه حتى تسالا شتا واجي سير لدار ارتاح شوية وشوف داركم داكشي نيت اللي دار ولكن شتا مخاصمة معايا وهدات حتى 9 دليل وهو يصوني علية وانا نخرج لعندو بقيت كنقلب علية وهو جا لعندي ملور وهزني ونا كنغوت ومنين حطني درت عندو خلعني ضعاف بزاااف تبدل سطاج باينة كان قاصح وهو يعنقني بجهد وأنا ممنعتوش توحشتو الخايب بقينا كنضحكو وفرحانين هدرنا شوية ودخلت حيت مشا لحال وماخصني صداع مع الطلبة واكترية دبا حطو علية مزيان حيت هوما مكيحملوش لبوليس الغد ليه تلاقينا وبقينا نهار كامل بجوج كنتسراو وهوما يصونيو دارهم ويقلولو جيب صارة معاك باش متخرجش ههههه...

16) داكشي اللي درنا نيت مشيت معاه لدار كلينا وضحكنا وجابني لحي والغد ليه كان الاحد يعني مروان غادي يمشي معو5 ديال لعشية يرجع الاكديمية مهم دوزنا هداك نص نهار بجوج وجا الوقت باش يمشي مشيت معاه انا و هدى لاكار ودعناه بالحزن ولكن شوية ترخفات مرة مرة يهدر معايا فالتلفون بقينا هكاك حتى دازت الوقيتة اللي شد فيها مروان رابيل وفرحنا عادي اصلا لفلوس عمرهم كانو شي حاجة فعلاقتنا وانا شحال من مرة عطيتو باش يتحرك وهانية ولكن عائلة مروان ولاو فشيشكل معايا يمكن خافو نديلو فلوسو هههه مزال معرفوني مزيان مهم خدالي لبيسة وشي تقدية خفيفة أنا جاتني عادي مهم كاين اللي مجاتوش عادي مهم بقى مروان بين نارين وانا كنحاول نخفف عليه وحنا كنتسناو غير امتا يسالي سطاج باش يجي يخطبني دازو الايام بقينا كنتشاوفو فاش كيجي مروان وانا اكتشفت بلي هدى مزال لزبيانة ولكن الي معجبنيش هو كتلقى مع ليلى وكيمشيو صافي انا مخصنيش من هادشي قلبت عليها حتى هيا وخليها تعيش كبغات داز الوقت وليت بوحدي بلا صحابات ولكن الى كانو غي بحال هاد صحابات بناقص منهم...

17)داز هاد العام الدراسي مشيت لدارنا ومروان مع سطاج ولا كيقصاح شوية وبقيت كنسلك شوية بشوية معاه غير دايرالو خاطرو ولكن منين كطلعلي لقردة كنودها معاه ونا سلاح ديالي هو غادي نتفارق معاك هههه.. سلاح اي بنت هو هاد الجملة ويلا مسلكتش كليجأ لدموع ولكن مكنتش عارفة غادي نبكي الدم..
دازت هاديك 3 شهور والحمد الله كلقا ختي وصاحبتي وعشيرتي وبنت خالتي وفاء ( وفاء بنت خالتي ساكنة فاسبانيا كتجي غير من الصيف لصيف فاش كانت فالمغرب مكناش كنتفارقو فمرة ولكن منين مشات حسيت بفراغ ولكن النت هو الخلاص داكشي علاش مجبدتهاش فالقصة)
كمل الصيف ررجعت الكلية السنة التالتة بلا صحابات ماعليش ماعليش بحرة نحايد علية التهمة مهم هداك نهار الخميس فاش جيت دخلت لهداك لبيت محملتش نجلس فيه كاو ذكريات خايبين اتصلت بمنعم خرجت لعندو وعاوتلو على الببت وطرح علية فكرة نسكن مع واحد البنت كيعرفها مزيان وانا كانت عندي عليها فكرة من قبل ولكن مكنتش عدنا شي علااااااقة...

18) صافي رحبت بالفكرة اللي قالي منعم عيط على سلمى وتفاهمنا نسكن معاها صافي داكشي اللي كاين سكنت معاها والغد ليه جا مروان وخرجت تلاقيتو كنت فرحانة بزاف وحتى هو ومشيت تلاقيتو فلاكار مع 3 ديال لعشية وهاد لمرة بقينا تماك منين قلت ليه يالله نمشيو قالي لا غادي نمشيو مكناس نتقهواو ونرجعو رحبت بالفكرة وكان دايرلي مفاجئة حجزنا فالواحد الفندق زوين كل واحد والبيت ديالو كنت باغا لقاو غير بيت واحد ونكونو فنفس لبيت ولكن دوماج هههه أنا اصلا كنتيق فيه وميمكنش نديرو شي حاجة خايبة غير هو مشبعتش منو مهم خرجنا شرالي حويجات وكان جايبلي تلفون هدية عيد ميلادي للي داز عليه شهرين مهم دازو هادوك ليوماين واعرين ونهار لحد تودعنا اكيد بالبكا وطلب مني نعطيه واحد الشال كنت كنديرو باش زعما يبقى يشم ريحتي انا عارفة غير بغا يدير فيها هندي وهو جبد واحد لبودي كنت ديما كنقوليه كيجيك زوين و عطاني رجعت للحي وهو مشا بحالو رجعت فرحانة ومشيت لبيت لقيت سلمى وجلسنا كنتعاودو وريتلها لبودي وعاوتلها كلشي صدقات ضريفة وعاوداتلي على قصتها المحزنة...

19) سلمى زوينة كتحمق كانت خدات لقب ملكة جمال التفاح شعرها كحل طويل ومرطبس بزاف بيوضة عامرة لاطاي عندها خايبة شوية خارجاليها لكريشة حيت كتشرب ااااااه كتشرب سبحان الله زهري غير معاهم هههه الخطير مزال تقراوه لمهم هي كانت تفقات مع بنت خالتها اللي كاينة فالسعودية تخدمها معاها فشي حمام مغربي حالينو تماك مهم هي مشات ولكن بنت خالتها باعتها لشي سعوديين تماك وهي غير حطات رجلها تماك وهوما يوقفو عليها شي دراري وداوها وهي كتحاول تقاومهم ولكن غلبوها حيت خدروها وداوها لشي قصر كبيير ومنين فاقت لقات راسها تماك بقات تبكي وتندب ولكن هي كانت مطورة مهم جات عندها شي وحدة عطاتها تلبس شي حاجة عريانة لبساتها وقادات راسها وخرجات مهم شطحات وقصرات مزيان ومشات مع واحد لقصر ديالو ونعس معاها ولكن هي كانت عارفة راسها صفحة وقنعاتو يديرلها عملية وتكون ديالو وديرلو اللي بغات وهي اصلا عندها لسانها حلو مهم الغد ليه طلباتو يقصرو فشي بواط والغد ليه يديرو العملية وهو قبل مشاو لكباريه بقات تشرب فيه وتشطح فيه ودير راسها كتشرب هكاك بقات حتا قالت ليه نمشي المرحاض مهم هاديك هي السلتة بقات كتجري حتى خرجات فشي دراري فداك الليل وهي تخاف وبقات كتبكي حيت قالت هادي هي التالية ليها...

20) ولكن هوما صدقو ولاد مربيين ولاد الناس هدؤوها وهي بقات كتعاودلهم شنو وقعلها وطلباتهم يعاونوها وبصح عاونوها وبلا مقابل ورجعات بحالها) مهم انا كتبقا فيا وليت كنتقرب ليها وقررنا نرجو نعيشو فبيتي 22 حيت هداك لبيت عمر بلبنات بزاف.. وحيت هي عندها بزاف ديال المغامرات هي من نوع اخر ديال العاهرات عاهرة من نوع راقي كتخرج غير مع هادوك وكتسرف على عائلتها هي هادشي اللي كتقول مهم انا اللي عاداتلي كنعاودو لمروان ولفت كنعاودلو كلشي مهم بقينا ماشيين مزيانين منين كيجي مروان كنخرج معاه انا ومنعم ومنين مكيكونش كنكون مع منعم وخالد ولكن تصرفات منعم ولات فشيشكل هو ديما كان يغازلني حتى ولات كتجيني عادية ولكن كتر داكشي بزااف حيت ولا كيهدر فمروان بالخايب وكيبينلي باللي هو احسن منو مهم داكشي ولا عندو فشكل وحتى شوفاتو تبدلو وكلامو معايا وشي مرات لمساتو كانت كتجيني غزل وليت كنتهرب منو ومبقيتش كلح على مروان باش يخرج معانا بزاف وهو حس بهادشي مهم هاكا بقينا وليت انا كنديها فقرايتي وفاش كيديني مروان لدارهم كنت كنحس بيهم محملنيش وخوتو مبقاوش كيسلمو علية فمرة ومكانبغيش نقهر مروان حيت كيحساباهم كيصرف علية واخدالو فلوسو مهم انا ممسوقاش ليهم انا كيهمني غير مروان دازت ايام وهو منعم يصيفطلي مساج كلو تخسار هدرة مفهمت والو يعني شي كلام عمرني سمعتو انا تزعزعت صراحة..

21) ماعمرني توقعت شي واحد يخاطبني هاكا وجات من عند منعم ميمكنش بغيت نحماق مجوبتوش ولا كيسيفطلي تخسار الهدرة بزاف يوميا ونا كنت عاطياها غير لبكا كنت غادي نحماق ميمكنش أنا مدرت ليه والو وكانت علاقتنا مزياتة لاش دارلي هاكا كان عزيييز علية بزاف همم انا معاوت والو لمروان وهو مبقاش ميبانلي منين مشا مروان اتصلت بخالد (خالد كان صديق محمد وكان نفس لعمر ديالو 30 عام كنت صغيرة عليهم ب8 سنين . كان كيكمي لحشيش حتا هوما بحال لخوت ولكن منعم كان كتر هو قراي بزاف وعقلو كبير وهو المرزن بيناتنا كان كيبغي هند اللزبيانة ولكن هي مكانش مسوقالو وهو عزيز علية ولكن مكانش متافق معايا منين تصاحبت مع سلمى كان ديما عندو موقف) جا لعندي وعطيتو يقرا لميساجات وتصدم حتى هو مفهم والو وبقيت فيه وقالي دبا نشوف شنو كاين قالي سيري نتي دبا وجدي لامتحاناتك ديال غظا ونا نشوف شنو كاين داكشي اللي درتمشيت دخلت بديك كراجع وهو يجيني مساج مستحملتش وفديك اللحظة صونالي مروان وانا نطرطق بلبكا..

22) وهو مسكين بقا كيرغبني نسكت ويفهم علاش كنبكي وانا عاوتلو شنو دايرلي صاحبو معرفش باش تبلا بقى كيغوت بقى فيا الصراحة حيت هو محبوس فداك سطاج بعيد على الناس وهو باقيلو 6 شهور باش يكمل عامين ديال سطاج وبقيت كنسكت من لبكى وهو قطع علية وصوناو على صاحبو وضربها بنكرة هداك لحمار ولكن انا صيفت لكونفرساسيون اللي كان كيكتبلي هداك لكلب وقالي انا متيقك ولكن متوقعتش من صديق الطفولة وخويا وعشيري يطعني من ظهري مهم بقى كيبرد فيا حيت غدا غادي ندوز امتحان فصباح صافي حاولت نعس مشيت صباح ندوز جيت خارجة تلاقيت خالد وفهمت غادي يبقى معايا فينما خرجت مشيت لبيت تلاقيت سلمى عادت ليها كلشي وحتى هي تصدمات وبقات كتواسيني دازو امتحانات ومانت عدنا واحد المناسبة ديال زيادة ولد خالي رغبت مروان باش ناخد معايا سلمى حيت واخا خلاني نسكنها معايا كان محرم علية نعتب معاها باب الحي بحكم هي معروف عليها كدبر و..

23) ونا داكشي اللي كندير مكنخرجش معاها من غير الحي، مهم بقيت كرغبو وكنقنعو بانها ماشي لخاطرها اختارت هاد طريق وحنا منظلموهاش مهم وافق هاديك هي مشينا لمدينتي فرحو بيها عائلتي وعاملوها مزيان كلينا وشربنا وشطحنا دوزنا 3 ايام وهي صبقاتني وانا بقيت شي يامات على منديفولا شوية صافي ارتاحيت شوية مشيت سافرت وصلت الحي دخلت وانا نصوني على سلمى باش تنوض خيت كنوصل بكري ناضت جات لعندي دخلت وهو يجيني مساج فيه وصلتي الق.. اوووووف صبحنا على الله هادا مالو حاضيني فين ماشيا وفين جايا وليت كنمرض من هاظوك لميساحات لدرجة كنبكي وديما التقيا حشاكم مهم وليت غير كنخرج ولا ندخل كيجيني مساج من عندو ولا حاضيني فدخلة ولخىجة ولكن مكيبانش شحال هادي نشفتو وديما كان كيهددني بالاغتصاب صافي طلعلي الدم بغيت نمشي نديكلاري حتى كنزعم وكنتفكر داك تعامل اللي كان كيدير معايا وخا هكاك مبغيتوش يتكرفس ولكن هداك لمعيور كلو كان كيبين بانه كيغير من مروان حيت ديما كيبغي منعم يوصلي هو احسن منو وكان هو اللي خلا مروان يدفع لبوليس وهو عليه فضل كبير مهم هضرة باخصة وصافي...

24) مروان كيقولي اللي درتيه انا معاك وحتى خالد وقف فجنبي صارحة خالد صدق ولد الناس وقف معايا مسكين. مهم نرجعو الحي واحد نهار دخلات سلمى كتبكي قلتلها مالكي وبقيت معاها حتى عرفت انها دابزات معا شي صاحبها وقالتلي هدري معاه وبقات كترغب فيا صافي هدرت معاه وقلتلو راه كتبغيك وكذا وكذا.. مهم درتلها خاطرها وصافي وخا معنديش مع هاد تخربيق.
واحد نهار وهي سلمى بقات كدير الشعودة فالبيت ضحكاتني قلتلها شنو كديري قالتلي كنشدو الخرقة وكنديرولها الزعزاعة وكدا وكدا... شوية وهي تقولي صارة شنو كنديرو لخرقة بقيت كنفولها كنشدو الخرقة وكنديرولها كدا وكدا... وبقينا كنضحكو وهي تقولي متخافيش ناخدليك مروان قلتلها متقدريش فقيهي صحيح (هاد البارة كتقال بزاف ماشي بضرورة كتكوني سحارة باش يبغيك شي واحد)وداكشي اللي قصت انا.. مهم لميساجات ديال داك لحمار كتارت وكيركز على كلمة عاهرة وسحارة...

25) مروان حسيت بيه كيهدر على الخيانة بزاف والثقة ومنين كنقولو علاش هاد الهدرة كيقولي عادي حنا غير كنتناقشو شي مرات كنبقى نبكي وشي مرات كنبغي ندوز هدرتو مهم شي مرات كنكون ناعسة وكايقولي خرجي عند خالد مبقيتش كنفهم علاش حتى جا مروان وهاد المرة عطاوه 10 ايام ولكن كان دارهالي مفاجئة كان قالي غادي يجي وشوية عيطلي قالي مغديش نجي صافي مديت مجبت خرجت عند خالد نبدل شوية لجو شوية جا عندي مروتن ملور وغمضلي عنية وانا بقيت كنغوت حسابلي منعم منين شافني مخلوعة حيد يدو ودورني لعندو وعنقني عاد باش ارتاحيت شوية بقينا كنضحكو وفاجئني بالمجية ديالو انت وخالد شوية هو يقولي
مروان: دخلي احبيبة جيبيلي لبيسي ديالك هاد الليلة بغيت نقاد بيه شي حاجة ضرورية وعطيني تلفونك ندير فيه نمرتي نصوني على واحد السيد
صارة: واخا حبي (دخلت بالفرحة كنجري واول حاجة درتها هي درت غلوس وفون دو تان ودرت بارفان عاد جبت لبسي وتميت غاديا لعندهم وهوما كانو كيتخابرو وفاش شافوني ابتاسمو معايا ولكن بقاو كيهدرو وانا دخلني تنوغيش غير وصلت حداه )
مروان: صارة اش هاد نوامر كاملين فالتلفون
انا: اه راه سلمى كان مشا ليها تلفونها وكانت كتهدر بيه مرة مرة...

26) مروان: (هز حاجبو ) وتشري هي تلفونها وتهدر بيه لاش نتي تعطيهلها 
أنا: (معجبتنيش نبرة ديال صوتو)لاش كتهدر معايا هاكا ماشي كنبدل الموضوع ولكن اشمن حق باش تشك فية ( شفت خالد ضرب رجل مروان)
مروان:لا حبيبتي غير راكي عارفة غادي يبقاو كيبرزطوك وصافي وانا مكنبغيش شي حد يبرزطلي لبطوزة ديال
أنا: (ضحكت ضحكة صفرة حيت بقيت كنتاكد مروان كان كيمعني علية لهدرة ديال النفاق والخيانة ولكن أنا عمرني فكرة نخونو اصلا هو اول علاقة كانت حقيقية مفهمتش راسي بقى كيوجعني ) صافي بغيت ندخل بحالي حيت مشا الحال وطلب منييناخد تلفوني وأنا قبلت وقالي أنا نصونيلك عند سلمى
دخلت الحي وانا غير كنفكر كيفاش قلت غدا نتلاقاو ونفهم منو كلشي مشيت لقيت سلمى فالبيت وهي تقولي شفتي مروان وانا نقولها كنت عارفة غادي يجي بقات كتحمار وتخضار قالتلي لا راه كنت داخلة وشفتكم وبقيت كنعاودلها كلشي صافي نعسنا والغد ليه فلقت سلمى بكري لقيتها كتقاد وكتلبس
أنا: فين راكي تالعا فهاد صباح اصاحبتي
سلمى: عندي رونديفو مهم وراني فرحانة هاد غادي ندير شي حاجة مهمة
أنا: الله يسمعنا كلام اللي يفرحك ويحقق ليك مرادك (هههه لخايبة هي تكوني كدعي على راسك ونت فدار غفلون)
سلمى: أمين حبيبتي 
أنا: نضت جبت ليها من حوايجي وعطيتها مكياج ديالي وقاديتلها شعرها باش تكون زوينة بزاف 
مهم لبسات وخرجات ورجعت كملت نعاسي

27) فقت مع 12 نت فطرت على خاطري حيت سلمى كانت شاريالي لفطور مهم لبست وقاديت وجت مع 2 حيت كنا متافقين فهاد الوقيتة نخرج حدى الباب نتسناه شوية جات داخلة سلمى حالتها وحوايها موسخين مزلع عليهم العصير ولا معرفت شنو بقيت كنسولها بقات كتهرب قالتلي وهي كضحك قالتلي يلاتي ونتعاودو راه مروان كايساينك على برا خرجت وكنت مقررة نفهم هداك التصرف اللي دارلي لبارح انا مكرضاش تبوسخي عاد شي واحد يعاملني هاكا وخا نعرف نموت وانستحملش هاد التعامل خرجت لقيتو ضاحك قلت تانتغداو وربي كبير مشينا تغدينا و جلسنا فواحد لقهيوة زوينة وهو يقولي
مروان: تفرجت فهداك لفيلم اللي مرتو كتخونو وأنا: مالك على حالتك ونتا غير كتهدر على الخيانة ياك لباس انا معنديش مع هاد التخربيق ونفكرك اسي راك نتا اللي كنتي كتجري من مورايا وأنا كنت رافضاك وبزاف عليك تجي وتهدر معايا فهاد الموضوع 
مروان: انا احبيبتي والله مقصت هاد الهدرة صارة
أنا: الصمت وغير كنخنزر
مروان: أنا بغيت نجبد معاك واحد الهدرة ولكن نتمنى متقلقيش الى كنت كتبغيني خلينا نكملو ونهدرو غير بالعقل
أنا: مفهمت منك والو شنو كاين وأنا كنواعدك نجاوبك على اي حاجة امروان
مروان جبد التلفون ديالي الي كانت طايرة منو واحد الشقفة..

28)مروان: صارة حطي راسك فبلاصتي عافاك راني قلت ليك قبل عارفاك متخونينيش الله يخليليك ماعز عليك عطيني فرصة
أنا: اوكي فرصة ولكن أنا مزال مسمحت ليك
مروان: شكرا احبيبتي وكنوواعدك حقك نجيبو حتى لتحت رجليك
أنا: مفهمتش بزاف وقلت ليه كيفاش
مروان: ليوم كلشي يبان
صافي دازت الوقيتة أنا صراحة معرفت واش نسمحلو ولالا حسيت براسي دغيا سمحتو ولكن العقل الباطني كيرفض خاصو تبرير وخا الشك معندو حتى تبرير عندي مهم نضنا مشينا الحي ومالقيتش سلمى نعاودلها جلست شي ساعة وهو يعيطلي مروان نخرج لعندو قلت ليه اوكيو لكن راني مزالة نافخة خرجت لقيت مروان وخالد ومنعم شتهم مفهمتش سلمت على مروان وخالد ومنعم مد يديه قلت ليه مكنسلمش على المسخين بحالك وهو مروان خرج عينو فية وأنا نسكت وحتا هو سكت تفو لحشايشي لاخر محملتوش ولكن خاصني نفهم شنو معنى هاد الاجتماع الطارئ قالي مروان اجي نقولك شي حاجة وقالي تخبعي مور واحد الحيط تخبعت
شوية كنشوف سلمى جاية لجيهتهم بغيت نعيطلها تجي حدايا باش نتفرجو شنو غادي يوقع وهي تقول احسن منين مجبتوش هديك الخائنة..

29) أنا: مال التلفون؟ مكانش مهرس منين عطيتولك!!
مروان: اه غير طاحلي وصافي. صارة شوفي هاد المساجات
أنا: (بقيت كنقرا تصدمت)شكون هادو مكنعرف حتا واحد منهم، وهادا كيكذب (واحد كاتب حبيبة غدا غادي يجي هداك خينا كركبيه ومسحي لمساجات ديالي ونمرتي اوكي كنبغيك وغادي نتوحشك)انا مكنعرف حتى شي واحد من غيرك وهادا غير شي واحد باغي يطيح بيناتنا
مروان: صارة عافاك انا كنبغيك ونت كتر من حياتي طلبيلي عمري نعطيه ليك انا عارفك مغديش تخونيني ولكن منبغيش شي واحد يهدر معاك من غيري انا راني فسطاج غير على قبلك حيت باغي نعيش معاك 
صارة: بغيت تيق تيق مبغتيت الله بربح
مروان: وهو يخبط هاديك الطبلة بيدو ويقولي انا كنغلي ونت كطنزي علية انا سمعتك كتهدري فالتلفون معاه. أنا: شنو؟؟؟!!!!
مروان: حبيبة واش كتهدري مع شي واحد واخة غير بالضحك؟؟
صارة: أنا عمرني نفكر نخونك 
مروان: غير فهمي حالتي انا كنت بين 4 ديال لحيوط ونجي لقى نوامر ومسجات فتلفومك عافام وسمحيلي بغيتك تهضري مع مول هاد النمرة 
صارة:(نظرات مطولة فمروان )اوكي نهضر معاه
مروان:طابة النمرة وهو يهضر هداك السيد
مجهول: السلام عليكم
أنا:وعليكم السلام 
مجهول: شكون معايا اختي
أنا: خويا نتا اللي سيفتيلي مسج لبارح كدا كدا...
مجهول: لا ختي راه واحد الدرية هي اللي كانت سيفطات مسج من عندي لشي صحبتها
أنا: شكون اخويا هاد البنت؟
المجهول: سلمى
وهو مروان يقطع وبقى كيبكي وأنا قالبة وجهي لجيهة اخرى وبقا فيا 
أنا: دبا شنو مطلوب مني اخر؟
مروان: تسمحيلي
أنا: مستحيييييييل

30)مهم بقى يرغب فية وأنا اصلا كنبغيه مسمحاه وخا غادي يبقى فيه الحال والعلاقات هوما هادو بنادم مكيكونش كامل ضروري من الهفوات مهم مشينا الحي وهو يقولي انا موجد ليك مفاجئة وقالي تخباي مورة هاد الحيط داكشي نيت اللي درت شوية كيبالي منعم وسلمى جايين عند مروان وخالد كيفرنسو وكيقولولو مزيان منين تهنيتي من هاديك الخائنة
ااااااااااه ااانا هي الخائنة وشكون من غيري وكان غير بدلت سميتي ب سميت الخائنة ولكن شنو دخلها هي فحريرتي؟؟ اللي بداوه اللزبيانات يكملوه العاهرات هانية مهم نرجعولهم 
مروان: يالله اسيادي فيناهو الدليل
سلمى: انا راه كنحلف ليك بالله الى مصاحبة مع غيرك وكتخرج معايا تقصر شحال من مرة
مروان: ولكن نتي قلتيلي عنك تصاور وفيديويات 
سلمى: ياك ديك لمرات طلقت ليك الخط سمعتيها غير نتا مفهمتيش شنو كان كيتقال بيناتهم
ياك طلقت ليك ديك لمرات فاش كانت كتهضر على سحور ومنين قالت هي فقيهها صحيح
وانا نخرج عندها قلتلها شنو كتخربقي واش نتي مريضة درت عندهم قلت ليهم اش هادشي وهو قالي 
مروان: هادي الالة شحال من مرة منعتك عليها ونت بديتي علية بمحاضرة ديال الانسانية ودابا ياالله سمعي على قلبك هادي الالة نهار وماطال كتعيطلي كتقولي راكي كتخرجي معاها تقصري واحد نهار قالتلي هاد نهار غادي تخرج وودابا غادي تعيطلها غادي تقولك راها كتصبن حيت هي اللي قالتلي هاكا غادي نقول لمروان وبالفعل صونيت عليك قلت ليك لخالد يقوبيك خرجي لعندي وقلتيلو راكي مشغولة مهم كانت كدير بزاف هاد الحركات أنا: بالفعل كان كيعيط علية خالد فشي وقيتات مكيصلاحليش نخرج وبالصح قلت عندي فقيه صحيح ولكن عادي
واح د نهار عطاتني نهدر مع صاحبها باش يتصالحو 
هي بقات غير كتلون شوية منعم بقى كيضربها قدامنا ودراري كيفكوها وانا غير حالا فمي فهاد المسرحية...

31) انا شفت هاد المنضر بقيت غير كنضحك وهوما كيشوفو فيا وانا نقول :ونتا ا منعم علاش كضربها هي
منعم: حيت هي اللي كتوصلي الهضرة عليك وقلباتلي دماغي وافكاري عليك
أنا: ولكن انتا قلت لمروان حيت انا مبقيتش كنجاوبك فتيلفون داكشي علاش وشنو علاقة هادشي بداك تخصار الهضرة وبسحارة
منعم: حيت سلمى قالتلي نتوما فاش سافرتو لسبوع مشيتو لعند شي فقيه وتقفتي مروان بهاداك تريكو الي عطاك فمكناس
انا: (مصدومة)مايمكنش درت عند سلمى قلتلها أنا مشيت كندير هادشي قالت
سلمى :لا انا فمرة مقتلوش هاد الهضرة هو اللي ديما كيقول نتي كتبغيه هو وغي مروان جا فطريكم وهو اللي كان خاصو يتقبل فلبوليس وحلف حتى يحمق مروان وديما كان كيصيفطلو مسجات وحتا انا قالي الا بغيتي نبقى معاك قلبي لمروان راسو ضد صارة ونتزوجك بقاو هكاك عطيني نعطيك
وجا عندي مروان: صباح راه تلاقيت سلمى على اساس تجيبلي الدليل راكي كتخرجي ضبري ومشينا لقهوة وبقات غير كدخل وتخرج فالهدرة وانا نغوت عليها فيناهوما تصاور... 

32) وهي تقولي شوف راه مشينا لبلادها وسحراتليك فتريكو اللي عطيتيها فمكناس وتقفاتك ويلا بغيتي تأكد يالله معايا لدار ونبين ليك يعني نعس معايا وماحسيت براسي حتى قلبت عليها الطبلة وطردتها وانا نتفكر فاش تلاقيتها وكانت موسخة وفهمت باللي أنا الي قاديتها وخرجتها زوينة لعند مروان ضرني راسي مابقيت فاهمة والو كلشي كان كيختابرني اوووووف علاش علا ش وبقيت كنغوت وكنفركل بحال شي مجنونة ومروان بقى كيعنقني وكنقول كلكم ولاد لحرام بعدو مني بعدو منيحتى حليت عيني كنت فسبيطار ومروان عنيه منفخة باينة بكا شوية خالد جا لعندي وبقا كيهدر معايا وكيفهمني كلشي وكيقولي خاصني نعذر مروان.... خرج هو وجا لعندي مروان بقى كيبكي وكيقولي سمحيلي علا كلشي وانا غير ساكتة حيت كانو دايريلي الاكسجين هكاك بقينا كنهضرو وهو يقولي عندي ليك مفاجىة شهر الجاي غادي نصيفط دارنا يجيو يخطبوك وعلى منستقر نديرو العرسصافي فرحت عير شوية حيت كنت مزالة ماثرة ولحد الان وزت مرضت بالاعصاب وقلة نعاس مبقيتش كنتيق فالناس بزاف خصوصا صحابات...

33) #الاخير

مهم مروان ودراري قلبو على منعم وعرفت بللي منعم كان كيمشي لدار مروان ويعمرهم علية باش يكرهوني حتا هوما وحتى دراري قالهم شي حوايج خايبين علية ولكن انا مستسلمتش بقيت شادا فمروان حيت تحداوني وهادشي خلاني نيبس راسي ونعاندهم مزيان دازو بزااف دلحوايج كنت ليهم بالمرصاد وحتى هو دازو عليه بزاف ديال المشاكل ولكن واجهنا كلشي...
من بعد مكلشي بان وتوضح جاو دارهم خطبوني وكانت معاملتهم زوينة بحال حتى حاجة موقعات وفشهر 8 درت العقد ودرنا العرس فشهر 10 وهاديك العرسيا شطحنا انا وياه فيها مزيان وفرحنا وبينا لاي واحد كان كيقول علية ماغديش نتزوجو وكان حاضر هاحنا تزوجنا وتفركعو موتو بالسم ههههه (ومنساش سلمى بقيت كنقلب على ماضيها وعرفت معامن كانت عندها عداوة والسيدة كان سابق ليها كتبيع لحشيش ولات مورقة فالحي مبقاتش كتبان تماك واكيد انا ماشي ملاك صونيت على مها وعاودت ليها كولشي، ليلى ولات بحال الجثة مكتبراش من المرض من هادي لهادي بقات فية بزاااف كما كان الحال دوزنا عشرة زوينة الله يشافيها مسكينة وهدى راها تشمكرات مع واحد المجموعة ديال لبنات جداد وهند تزوجات) من بعد العرس وشهر العسل جينا لمدينة فاش هو مستقل وانا جبت الكادوات كاملين وبدينا كنعمرو دويرتنا شوية بشوية وباقا كنقولو نتفارقو منين كندابز معاه ولكن الحمدالله كنعتابر مروان احسن هدية من عند الله يا ربي قويني باش نخدمو حياتي كاملا والله يسهل علا اي واحد فاش تمنى فحياتو...... #قصة_حقيقة 
#النهــــــــــــــاية