مارياج بلوونش

#الجزء_الأول_A
الليلة ليلة عرسي، زاااهي بزااااف كلشي فيه على حقو و طريقو؛ عرس اسطوري بكل ما كاتحمل هاد الكلمة من معنى؛.. من القاعة للأكل الأوركسترا ودقايقية، أما النكافة خلااااص احسن نكافة فيك يا بلادي، حبابي كولهم حاضرين؛.. الااا انا غايبة

انا بسمة ف عمري 26 عام، كانكره شي حاجة سميتها الزواج بحكم اختي لي كبر مني الله يرحمها تكرفصاااات فزواجها، و السبب ديال موتها هو راجلها، كرهت الزوااج ولي يجي منو، و قررت مانتزوجش نهائيا ولكن شكوووون خلااك!؟

فجأة لقيت راسي حاصلة هاد الحصلة، و جالسة بارزة حدا عريس كلمة بوچوووص قليلة فحقو، اش غانقوليكم راه من حوور الجنة، الطولة و التجريدة، الزين و العقلية؛ جون و حتى اللعاقة كاينة و بزااااف، كاريزما السيد تقولو خارج من شي مسلسل؛.. و لكن....؟!!!

بلاتي بلاتي غانبدا ليكم السيناريو من الأول،
اه السيناريو حيت هدشي لي كانعيشو مجرد تمثيلية دايراها انا و يحيى.. ( يحيى هو راجلي المزعوووم )..

كنت انا و ماما عند جارتنا لالة فضيلة، جا ولدها من فرنسا و مشينا نقولولها على سلامتو أو بالأحرى ماما لي بزاات عليا نمشي معاها.. و تما فين كاتبدا قصتي مع هاد التزويجة..

لالة فضيلة: اختي سعاد بنتك زويينة تبارك الله علاش باقى لدابا ماتزوجاتش؟!..
انا: علاااش ا خالتي فضيلة علاش؟؟ علاش كاترشي الملح على الجرح؟؟ (( غير فخاطري قلتها، انا مانطقتش خشيت راسي فتليفوني، طالقة ودنية معاهم و دايرا راسي اووور زوون))

ماما قلبهااا طايب، غير على سبة... كي نغزاتها لالة فضيلة مابقاتش باغا تسكت..

ماما : اش غانقوليك محمقاني ماخلا من جا خطب فيها، غير شكوووون و شكووون وهي تقووول وااش بغااات تزوج،.. ( و بدات تبكي)
لالة فضيلة: وعلاش اختي مالها؟؟
انا ( فخاطري بطبيعة الحال) : مازال كاتسولوو علاااش و مالي؟؟ بحال إلا ماكفاتهمش اختي رانيا الله يرحمها غصبوها ف شبابها و زوجوها لواحد عديم الرحمة جميع أنواع العنف جربو فيها، كانت مسكينة صابرة ماتحكي ماتشكي حتى دا مول الأمانة اماانتو.. 

ماما: ماعرفتها مسحورة و لا متقفة، ماتحمل حس الزواج ماتقبلو، والله ما عرفت اش ندير ليها؟ واش نفوسخها ولا اش ندير؟؟
لالة فضيلة: هادو هوما ولاد اليوم، ماعرفت مالهم مع الزواج حتى ولدي يحيى 29 عام فعمرو وماباغي يتزوج غايصطيني هاد الولد؛..
حتى كايدخل يحيى و يجاوبها..
يحيى: بغيت غير نعرف أ ميمتي اش مشا ليك إلا أنا باقي بلا زواج راني باقي صغيير الله يهديك..

يحيى سمع الحوار كامل ديال ماما و ماماه،..
لالة فضيلة: ها أنت اختي سعاد كاتسمعي بودنيك ماشي غير انت حتى انا هذا غايهبلني غايدي عمري..
وبداوو يتباكاو لينا بجوجات؛ حتى لقيت راسي انا و يحيى كانسكتو فيهم على سعدنا و وعدنا.. و الصراحة بقاات فيا ماما، بغات تهنا عليا و تشوفني بداري وراجلي و ولادي خصوصا وصلت 26 عام ولات خايفة نبقى بايرة و هدرات الناس ماكترحمش.. 
المجتمع اللي ماتيرحمش سوا المزوجة ولا المطلقة ولا العزبة..
نااري وشحال تبكااو البكا ديال المچروووحات؛ قطعو ليا فقلبي؛..
و حتى يحيى تأثر بزااف، بقات فيه ميمتو بزاف..

و هو يقول: صافي أ ماما انا قررت نتزوج و ب هاد البنت لي قدامي..


#الجزء_الأول_B :

من البريمير و انا ف فرنسا، داني بابا صغير، عشت تمام طفولتي بعيد على ماما، حيت بابا مابغاش يدي ماما و خوتاتي البنات لفرنسا.. علاش؟؟ ماعرفتش انا براسي لحد الان ماعارفش، يمكن حيت مابغاش يخلي جدة بوحدها.. ربي لي كايعلم حيت بابا دابا 5 سنين باش مات..
من بعد ما توفى انا لي تكلفت بمشاريعنا تما.. و هاد العام قررت ندخل لبلاد و نحول كولشي استثماراتنا فالمغرب..
من نهار جيت المغرب وحطيت رجلي فالدار و ماما فاضحاني على الزوااج..
تال داك نهار لي جات عندنا خالتي سعاد وبنتها، جيرانا فالدرب القديم قبل مانتحولو لهاد الفيلا لي عايشين فيها دابا؛..
ماما و خالتي سعاد همهم واحد،.. ماما بغاتني نتزوج و نستقر، و خالتي سعاد بغات تزوج بنتها و تهنا من جيهتها..
على مافهمت بنتها رافضة نهائيا الزواج بحالي،.. و لكن لي عندو ميمات بحال هادو لي عندنا مايرتاحو حتى يتعشاو بينا، فقررت نتغدا بيهم أنا قبل ما ينويو..

انا: صافي ا ماما انا قررت نتزوج و بهاد البنت لي قدامي..

كلامي نزل عليهم كي الصاعقة، تصدموو كاملين كولشي تزيزن بقاو كايشوفووو فيا بثلاثة..
شوية و هي تفيق ماما من تأثير الصدمة..
ماما: الله يربي الله الحمد لله اللي غانشوف وليدي بارز..

و جا اليوم تحقق حلم ميمتي و ها أنا الليلة بارز،.. 
و لكن الحقيقة حاجة أخرى.. 
هذاك النهار طلبت من ماما و خالتي سعاد نهدر مع بسمة بوحديتنا، و انا مواعدهم بلي غانخليها توافق عليا...
و فعلا جلسنا بوحدنا..
بسمة: شوووف انا مابغااش نتزوج بلا ماتبرزط راسك معايا..
انا: شتيني انا غير باغي نتزوج، راه غير باغي ندير الخاطر ل ماما...
بسمة: انت دير الخاطر لمك و انا ماالي!!
انا: حتى انت ديري الخاطر لأمك..
بسمة: شوف الله يرحم ليك الوالدين باراك من طنز العكري ولعب دراري صغار انا مابغاش نتزوج بيك...
انا: يحصل ليك الشرف تتزوج بيا و نشوف فيك و انت اصلا مافيك مايتشاف..
الدهشااات، صدمتها، يمكن قللت منها ولكن ماتيهمنيش المهم نلقى حل ل ماما...

بسمة: ( الصمت)..

انا: شوفي سمعيني حتى الآخر و قرري؛.. انا مازال باغي نعيش حياتي، مازال الاستقرار وديك روينة ماعلاباليش بيها، داكشي باش مابغيتش نتزوج و نظلم شي بنت الناس معايا، و انا مانظمنش راسي نشد معاها الطريق، ندوز شهر نطلقها، مشكيلتي عشاق ملال؛.. و الا ماتزوجتش ماما ماغتخلينيش مرتاح غاتبقى مبرزطاني، و حتى انت مابغاش تزوجي، غانتزوج انا وياك غير على الوراق صاافي، و غادي نديك معايا لكازا، تما فين غاندير الشركة ديالي و استثماراتي لي ناوي فالمغرب، انت عندك الاختيار إلا بغيتي تخدمي خدمي، المهم سوا خدمتي ولا لا غاندير ليك مصروفك الشهري.. و عيشي حتى انت حياتك كيما باغا انا ماندخل فيك و انت ماتدخلي فيا.. تفاهمنا..
بسمة بقااات سااكتة شحاال و كادوور هدرتي فراسها..
انا: اشنو قلتي؟؟
بشمة: خاصني وقت نفكر..
انا: ماكاينش وقت بزااف.. فكري مزيان حيت إلا رفضتيني ماماك ماغتصبرش عليك بزااف و غاتزوجك.. اللهم نديرو مارياج بلوونش انا وياك و بجوجنا نتهناو من النچيير و البكا ديال مواتنا و فنفس الوقت نفرحوهم.. راه فمصلاحتنا بجووج 

بسمة: اوكي موافقة بشرط مابغيت لا عرس لا والو، ماشي معقول نكونو دايرين تمثيلية و يخسرو عليا دارنا الفلوس على زواج غير فالوراق..
انا: غانديرو عرس و عرس كبير نفرحوهم بيه.. و بالنسبة لتكالييف كلهم عليا.. و ماكرهتش الشهر جاي نطرقوو المسمار...

بسمة باين عليها التردد ف وجها،..
قبل ماتجاوبني دخلات ماما و ماماها كايزغرتوو..
ماما: اش قالت عروستي موافقة..

بسمة ولات وحدة أخرى، حدرات راسها ودارت فيها حشمانة.. 
بسمة: اللي درتوها ا خالتي هي اللي كاينة.. 

دارت لعندي و شافت فيا شوفة فشكل هازة واحد من حواجبها ، شوفة مخلطة ماقدرتش وقتها نفسرها، فيها تحدي و ثقة بالنفس ..

هي فعلا بشوفتها دهشراتني من لدااخل ديالي لكن وقتها ماتسوقتش، ماكنتش عارف اش كايتسناني.. 


#الجزء_الثاني_A

انا ماهمنيش يحيى لا زينو لا فلوسو لا كراكتيرو؛ قلبي مغلوق ب 99 قفل و سوارتهم تدفنوو مع اختي رانيا نهار لي ماتت.. 
أختي رانيا كانت الامان، كانت الحب، كانت كل حاجة زوينة فحياتي، كانت حنينة عليا بزاف ويمكن أكثر من ماما، هدشي علاش موتها اثر فيا و فشخصيتي و حتى ف طريقة تفكيري، وليت ماشي نكره غير الزواج وليت نكره الرجال و لي يجي منهم، و المخير فيهم مايحركش فيا شعرة وحدة..

فاش قالي يحيى مافيك مايتشاف، مارضيتش و بحكم كرهي لرجال بسبب الطريقة لي ماتت بيها اختي، و يحيى حااس براسوو بزااف بحال المجرم لي كانت مزوجة بيه المرحومة.. قررت ندم يحيى و نوافق على زواجي المزيف منو لعدة أسباب:
نتهناا من نچيير ماما...
نسد فاام الناس لي كايقولو بارت،..
ندير عراسية دايزها الكلام، نحيد ديك الرغبة لي كانت كاتجيني مرة مرة باش حتى انا نتزوج و ندير عرس نفرح برااسي،.. 
و الاهم من هدشي كولو ننتاقم من يحيى لأنو قلل مني،..
و لأنو كايشبه بزااف فغروروو لدااك المجرم.. قررت ندير المستحيل باش نخليه يمووت على التراب لي كانمشي عليه و من بعد نطلب الطلاق باش نخليه كايتحرق من بعدي..

فاش دخلت ماما و خالتي فضيلة، قلت ليهم بلي لي داروها هي لي كاينة؛.. هزيت راسي شفت ف يحيى شوفة اختاصرت فيها كولشي..

من بعد تم الاتفاق على العرس الشهر جاي، حيت يحيى قال لماماه مزروب خاصو يمشي لكازا يقابل مشاريعو تماك وخاصو يديني معاه؛..
وليت كانخرج انا ويحيى قدامهم باش نبينو ليهم بلي حنا متافقين ومتفاهمين باش يرتاحو من جيهتنا.. 
و حنا فالحقيقة كنا كانتفاهمو على عيشتنا كي غاتكون تما، سيد يحيى طلب مني نوليو اصدقاء، باش تسهال علينا القضية، بحكم غانعيشو بجوج تحت سقف واحد، و انا بكل رحووبة صدر وافقت، لأنو سهل عليا القضية و بزااااف؛.. 

هادي هي القصة و مافيها، و دابا هاني لابسة لاغوب بلونش كانودع انا و يحيى عائلتنا، هوما كايصحابليهم غانمشيو لتركيا ندوزو شهر العسل و من بعد ندوزو لدارنا فكازا، ولكن الحقيقة غادين نيشان للدار فكازا..

ماما كاتعنق فيا وتبكي؛.. قهراتني هاد سيدة ملي كنت معها كاتقيل تبكي فاضحاني تزوجي ماتزوجي و ملي حققت ليها رغبتها كاتبكي.. كولشي يعبرو عليه بالدموع كي الفرج كي القرح..

انا واحد خالتي فضيلة كاتوصي فيا وتعاود؛ تهلاو فبعضياتكم، بداي تفيقي بكري توجديلو الفطور، راه موالف يفطر بكري و فطور على حقو وطريقو..
رحمييييني افضيلة و انت لي سمعك يقول ماعمرك تفرقتي معاه والا ماوكلتيه بايظيك ماياكل، السيد ملي كان برهوش وهو بعيد عليك، حتى حنانتو فيك ماخداها..
تفووو شحال كايزيدوو فيه 

من بعد صعووبة اخيرا تفكينا منهم ومشينا لمطار.. مشيت ب لا غوب بلونش؛ و الناس كايشوفو فينا بمختلف النظرات ها لي عجبناهم، ها لي الفقصة قاتلاهم هالي كايبارك لينا..
واحد الشارفة هي وراجلها تحلفو عليهم چوور.. وهما غير من المغرب الشقيق؛.. وقفات علينا وقالت
الشارفة: شحال غزاالين تبارك الله وماوتين بعضكم، فكرتوني فنهار عرسي، حتى حنا كنا بحالكم الحب لي جامعنا باين فعينينا.. 
يحيى دار صواب وقاليها: شكرا بارك الله فيك ا لالة..

اما انا خلاااص سالات معايا هاد الشارفة قالت ليك الحب لي جامعكم، 
خخخخ ماتغركش هاد لاغوب بلونش راه غيير ماريااج بلوونش 
بطبيعة الحال فخاطري، ماكلفتش راسي نجاوبها، ابتسامة صفرة كانت كافية 



#الجزء_الثاني_B: 

تافقت مع بسمة على كولشي؛ وهي متفهمة من زهري تلاقيت بيها، و إلا كانت غاتبقى عليا ماما حتى نصدق غارق فشي تزويجة و انا ماقااد على صدااع الراس،. .
فين كنتي؟ علاش تعطلتي؟؟ فين مشيتي؟ معامن كنتي؟؟
الحياة الزوجية بالنسبة ليا بحال شي حبس، و انا ولفت الحرية، خرج مع هادي اليوم؛ و هاديك غدا، كايعجبني نبدل،.. 
ماعمري طولت فشي علاقة مع شي وحدة، الوحيدة لي طولت معاها كانت شهر؛.. و من بعد كركبتها.. اما لوخرات سيمانة مانكملهااش معاهم.. 

داز العرس زاهي، مثلنا الدوور مزيان انا و بسمة؛ صدقات هبيلة حتى هي أكثر مني باغا غير تفك من نچيير ماماها..
وصلنا لدار وريت لبسمة بيتها، ومشيت لبيتي طحت كااااو؛.. مافقت تال غد ليه؛ كنت عياااان بزاااف.. 
فقت دوشت وخرجت نقااد شغلي، دوزت الشهر الأول ماكنلقاش الوقت باش نحك حتى راسي، كانفيق على النبوري و كانرجع فنصاصات الليل؛..
عادي حيت مازال اموري مامستقرااش فالمغرب؛ فهاد الشهر الخدمة كانت كثيرة بززاف، الإجراءات و المقابلات مع الناس لي غايخدمو معايا،..
انا فالخدمة عسكري، ماكاينش اللعب، كاتستاهل غاتخدم معايا ماتستاهلش ماضيعني مانضيعك..
من بعد ماقاديت كولشي، الحمد لله ربي يسر ليا؛.. و الامور ف الشركة غادة مزيانة.. 

بسمة مالقيتش معاها المشكل متفاهمين، بحال إلا صداقتنا عمرها 20 عام؛.. فوقتما حتاجت شي حاجة كاتعيطلي نصيفطها ليها مامقصرش من جيهتها..
و حتى هي مامقصرااش، وقتما جيت كانلقاها جامعة الدار كاتشعل بالنقاوة، موجدالي الماكلة؛.. و حتى من حوايجي كانلقاهم مصبنين ومصلووحين، بيتي كانخليه مرون كانجي كانلقاه مقاد مريتب متيول..
شي مرات كانلقاها كاتفرج كاتسناني نتعشااو بجووج، و مرات نلقاها ناعسة ومخليا ليا عشايا، و فالصباح ديما فاش كانفيق كانلقى الفطوور وليت كانحس بوجودها مهم بزاااف فحياتي..

و حتى الماكلة ديال الزنقة مابقاتش كاتعجبني، طياابها بنيين بزااف لواحد درجة ماكتصورش؛ و كل مرة كانلقاها دايرة شهيوة؛ صدقات كاطيب من داكشي،.. ماعرفتش شنو وقع ليا ولكن إلا ماكليت من طيابها كانحس براسي جيعان واخا ماعرفت شنو ناكل؛.. واقيلا سحرااتني 

من بعد ما ستقراات الاوضاع فالشركة مابقاش عليا الضغط بزااف، و جاا وقت الزهوو شوية شحاال ما زهيت..
عندي صاحبي سميتو علاء تاهو عندو شركة ديالو هنا فالمغرب كان قرا معايا ف فرنسا.. و العلاقة بيناتنا ماتقطعاتش، شلا زبايل دوزت انا وياه..

اليوم من بعد الخدمة مشيت لابواط انا ويااه زهينا شوية مع شي بنات، طلعنا لاپارطومو لي داير انا وعلاء خصيصًا لهاد البلانات، دوزنا ليلة زاهية، مارجعت لدار تاال 4 صبااح..

مع كي دخلت سمعت بسمة كاتبكي، مشيت لعندها لبيتها لقيتها صفراا حالتها حاالة، شادة فكرشها و كاتبكي، ماننكرش خفت عليها بزااف اول مرة نشوفها فهاد الحالة و اول مرة نخاف على شي وحدة..
انا: بسمة مالك، شنو كايضرك؟؟
بسمة كاتبكي ومزيرة على كرشها بانت ليا كا تألم بزااف،..
مازدتش معاها الهضرة هزيتها باش نديها لا كلينك..


#الجزء_الثالث_A:

من بعد مامشينا الكازا؛ يحيى ماضيعش نهار واحد ف التفاهات،.. سبق خدمتو هي الاولى، وقف على شغلوا و شركتوو وقفها على رجليه؛..

اما الدوراان و الزهوو ماكانش لاقي ليهم الوقت نهائيا، كرشو و كان كايسمح فيها..
ف انا قررت نستغل هاد النقطة غاتسولوني كيفاش؟ غانجاوبكم 
كاين مثل مشهور كايقول ""اقرب مكان لقلب الرجل معدته""  غاتقولو لي يحيى زهواني ومايتسوقش لهادشي مولف ب ريسطورات، غانقوليكم هو فعلا مولف بريسطورات وماكلت الزناقي وبنات الليل، لكن متنساوش دوز عمرو كلو بعيد على ماماه و مفتاقر لوجود امرأة فالدار تطيب ليه، وتنقيلو وسخوو هههه

اللي كان مخوفو فالزواج هو داك قوة الأسئلة فين مشيتي معامن كنتي هدشي كايخنقو،..

انا ماغنسولو ماغنقرب ليه؛.. غانلعب ليه على هاد النقطة، نخلييه يولف وجودي فالدار، خاصو يحس وجودي فالدار مهم بزااف،.. وغانسهر على راحتو تولي الدار تسوا بسمة إلا ماكنتش بسمة مايلقاش الراحة.. باختصار نكون بسمة حياتو و بلسم جرااحو 

و نقطة اخرى، احسن حاجة ف هاد الدنيا تلقى شي أحد مهتم بيك، كايقدر الإنسان مايلاحظش داك الإهتمام فالأول بحكم كايولفو، كاويلي بالنسبة ليه عادة مايحدهالووش الطبيب، و لكن غير داك الاهتمام ماكايبقاش أو مجرد ينقص كايبغي داك الشخص يجهل و كايولي هو تابعك باغي يرضيك بشتا الطرق غير ترجع معاه كيما كنتي و يرجع اهتمامك بيه..

هدشي لي قررت نددير مع يحيى، غانغرقوو باهتمااامي الكبير، تحت ستارة الصداقة لي اتفقنا عليها و من بعد نقطع عليه الما و الضو
هدشي كامل باش يتعلم يقلل مني ويقولي مافيك مايتشاف، غاندموو مزييان..

على حساب ماعاود ليا واحد المرة القلب معندوش. لكن الحقيقة ماكيعطيش الفرصة لحتى شي وحدة تقرب ليه بزاف جهدوا شي يامات ياخد غرضو منها ويرميها، البنات بالنسبة ليه غير أجساد، أما كا انسان وروح مامسوقش.. 
و هدشي تاهو غانلعب عليه، انا بالنسبة ل يحيى بعيدة كل البعد على شهواتو الحيوانية، لكن قلبوو اقسم بالله حتى نخليه ينبض غير على قبلي.. و غانخليه يتشاهاني بطريقة مختلفة ماشي باش يرضي غريزتو و إنما باش يعيش معايا نشوة الحب 

و فعلا هدشي لي درت، زيادة على هدشي كنت ديما كانحلم بالاستقرار تكون عندي داري بوحدي، نتهلا فداري نخليها كاتشعل، و عندي هواية ديال الطبخ فأنا فهاد المدة ضربت عصفورين بحجر، حققت لنفسي الرغبة ديالي و حتى هوايتي و نفس الوقت انتقامي لي كنت مستمتعة بيه بلا قيااس..

كنت كل نهار نجرب وصفات ديال مأكولات مرة المغربية مرة العالمية ،.. الحاجة لي صدقات كانخليها حتى يجي يحيى و نحطهالو فالعشا، و لي ماصدقاتش كنت كانتبرع بيها لطاروو د زبل 
و بالطبيعة الحال سي يحيى هو الراعي الرسمي، اي حاجة كنت كانحتاجها كانصيفطهالو فمساج و كانت كاتوصلني حتى لدار مع شيفور د الشركة...

كل مرة كان كايجي يحيى لدار بليل كنت كانلاحظ فعينيه إعجابو بماكلتي و حتى الفرحة، و كان الارتيااح كايبان واضح فوجهوو..
شكون بحالو كان عايش عيشة زوافرية تاحاجة مامقادة، و اليوم كولشي ولا مقاد وزوين..

اليوم ماعرفتش يحيى علاش تعطل جهدوو 1 دليل چاااع إلا تعطل، مولف يدخل بكري، و انا جاتني لي غيچل كاتمحني وحتى الدوا لي كاندير ليها مابقاش، حاولت ننعس باش مانحسش بآلام لكن والو الحريق غادي وكايتجهد عليا، صبرت حتى عيت و انا نصوني ليه واالوو ماكايجاوبش،.. الحريق بزااف كانتقطع بحال إلا غانولد ولييت كانبكي شادة كرشي مزيرة عليها و كانبكي، ماقاداش حتى نخرج خطوة وحدة ماقاداش نزيدها لقدااام؛.. 
ديك الليلة دزت من العذاب، ماجا يحيى حتى صافي وليت نشهد..
سمعت الباب تحل بغيت نعيطلو،.. سميتو مابغاتش تنطق ليا مع الحريق عاطياها غير لبكا..
جا لعندي شافني و تخلع بان على وجهو خوفو عليا، سولني مالك ماقديتش نجاوبو؛ هزني بحال شي بنت صغيرة باش يديني لاكلينيك..
لقا لاسونسور عامر، مع انا عنقتوو بجهد و خشيت فيه راسي فصدرو و ايدي غرزتهم فيه مزيرة عليه.. يمكن حس بيا كانتقطع؛ هبط بيا مسكين فالدروج و حنا ف سانكيام ايطاجو،.. 
أول مرة يكون قريب ليا لهاد درجة؛ حسيت دقات قلبو، نفسو كيفاش كايتنفس بصعوبة واش من درووج؟ واش خايف عليا؟ معرفتش،..
المهم كانت أول مرة نحس بإحساس زووين اتجاهو اول مرة مانحسش براسي باغا ننتاقم بشدة؛ شنووو ا بسمة السحر انقلب على الساحر؟؟


#الجزء_الثالث_B:

فاش شفتها فديك الحالة كاتبكي، ماشعرتش براسي امتى هزيتها، و جريت بيها،ولى كايبان ليا غير لا كلينيك؛..
لقيت لاسونسور عامر، ماصبرتش،.. هبطت بيها فالدروج، انا لي كانعچز نهبط فيهم، وكنت حريص ناخد داري ف موبل فيها لاسونسور؛.. 
وليت هابط من السانكيام ايطاج على قبل وحدة جمعتني بيها مسرحية، ماعرفتش علاش هاد الخوف كولو عليها؟؟ المهم هو نزرب نديها باش يديرو شي حاجة تخفف عليها؛..
و انا هابط فالدروج حسيت بيها كاترعد و شادة فيا بجهد، بحال شي دري صغير خايف..
ماعرفتش راسي كيدرت حتى وصلت بديك زربة، دخلتها ليرجونص و تسنيت حتى تخرج عندي الطبيبة تقولي مالها..
فالوقت اللي كانت الطبيبة كاتفحصها، هزيت ايدي نمسح على وجهي حتى كانشم ريحة طايراتلي العقل،..
اه هي نفس الريحة لي شميتها فيها و انا هازها،.. الله على ريحة فيها شحال كاتحمق عمري شميتها عند شي وحدة،.. بديت كانرجع السيناريو ديال راسي هازها وكانجري بيها بلا عقل، وكيفاش كانت قريبة ليا لاصقة فصدري معنقاني ومزيرة عليا؛.. حسيتها قريبة ليا ماشي غير بالجسد و إنما روحها حسيتها مني..
خرجات الطبيبة..
انا: مالها شنو عندها..
الطبيبة: غير العادة الشهرية، كاتجيها بالحريق بزاف.. دچيت ليها برا دابا شوية تولي لباس..
انا ( معجب) : العادة الشهرية كادير هاد الحالة كولها؟؟
الطبيبة: على حسب كل وحدة، كاين لي ماكيجيهاش الحريق، كاينة كايجيها ألم خفيف؛ وكاااين لي كاتمحنها بحالها تماما..
انا: اه شكرا بزاف.. نقدر ندخل عندها..
الطبيبة: اه 
دخلت عندها لقيتها نعسات،.. ملامح وجها بانوو كايحمقووو وهي ناعسة، كنت كانشوف فيها بحال إلا اول مرة نشووفها، بانت زوينة بلاا قيااس،..
ناعسة وماحساش بهاد العالم، ناعسة بعد الألم والحريق، اخيرا لقات الراحة..
كانت أول مرة نشوفها ناعسة، مشيت شديت فايديها حسيت احساس فشكل مابغيتش نطلقهم، حتى ايدياتها كايحمقوو ناااعمين، رطبين، صبيعاتها زوينين، دايرة ليهم مانيكير و الخاتم لي لابسة جا كايحمق فايديها..
و انا شاد ف ايدها وبديت كانتبسم غير الراسي بحال شي هبيل، وكانقول دابا هاد الصبيعات هما لي كايوجدو ديك الماكلة، دابا عاد فهمت علاش كاتجي بنينة،..
شعرها هبلني هابط رطيطب و مبلوكي من لتحت، كان كايبان زونين بزاف، ماشعرتش تالقيت راسي كانلعب ليها يشعرها و شوية كانبوس فايديها.. 

اويلي شنو كادير ا يحيى؟؟ حتى لهاد درجة..
جمعت الوقفة وخرجت على برا،.. لانصدق فشي حاجة اخرى،.. 
اصلا مابقيتش مستوعب راسي، ماعمري كنت هاكا،.. غير الله يخرج بلاني مع بسمة على خير.. 

سولت الطبيبة واش تقدر تخرج..
الطبيبة: تقدر تمشي دابا،..
انا: ولكن راها ناعسة واش دوا لي عطيتيها كاينعس؟..
الطبيبة: لا غير كايحيد الحريق، هي غاتكون عيانة، غير حيد الحريق و هي تغفى، تقدر تفيقها تديها..
انا بقات فيا مابغيتش نفيقها، و قلت ليها 
انا: لا غير خليها ناعسة..
الطبيبة: غايتحسب عليك الخلاص بياتها..
انا: ماشي مشكل المهم راحتها..

بقيت جالس على برا تا طلع الصباح، و حتى فاقت على راحتها، مافاقت حتى 11h ؛..
بسمة: ماحسيتش براسي امتى نعست..
انا: المهم نعستي مزيان؟؟
بسمة: اه تقول رحمة ربي نزلت عليا..
انا: واخا تسناي نمشي نخلص، و ندوز عند الطبيبة تكتب ليك شي دوا مزيانة تولي تاخديه.

بسمة نزلات راسها، حشمات.. و قلت ليها..
انا: بسمة ماعندك علاش تحشمي، هدشي راه عادي..
مشيت عند طبيبة كتباتلي واحد الكينة، خلصت لاكلينيك، فطريقنا لدار مانسيتش الكينة تاهي شريتها ليها.. 
وصلنا لدار، و قلت ليها 
انا: بسمة وجدي راسك نخرجو، من نهار جيتي عمرك خرجتي، انا اليوم عارض عليك نتغداو على برا 😉
غمزتها ومشيت ندوش.. هههه زربت عليها ماخليتلهاش فرصة باش تجاوبني، هي تفاجأااات أما أنا ماعرفت اش وقع ليا فرحاااان حيت غانخرج معاها... 


#الجزء_الرابع_A :

يحيى مسكين ماقصرش من جهدو طار بيا لاكلينيك، وهما دارو خدمتهم، كي دچوو ليا ليبرا بدا يخف الألم، و انا داني نعاس ماحسيت تال الصباح،..
شفت الساعة فايدي لقيتها 11h، خرجت و انا نلقى يحيى جالس حدا باب الشومبر.. 
شنو زعمة مانعسش الليل كولو بقا يتسناني؟؟
مشيت لعندو سولني واش رتاحيت قلتلو اه مشا خلص و داز لعند الطبيبة باش تكتبلي شي دوا..
انا حشمت منوو بزاااف.. وهو عكس ماتوقعت ماتصرفش معايا خايب بالعكس كان مئييدب بزززاف..
لدرجة تفاجأت ماشي هو هذا يحيى لي حچرني نهاار الأول وقالي على زينك ومافيك مايتشاف..
المهم مشينا طريق كاملة مادويناااش ساكتيين بجوج بينا..
كي وصلنا لدار صدمني قالي وجدي راسك نخرجو تتغداو على برا ومشى لبيتو بالزربة ماخلاني حتى نجاوب..
اويلي ستغفرت الله العظيم و اش انا كانحلم ولا بصح، دابا هذا علاش كايتصرف معايا هاكا؟ ياكما بنتلوو فبلان ليلة يدير فيا مابغا ويقلب والله لا كانت ليه..
اجي لهنا واش نسيتي راسك اصلا انت كنت كاتصرفي على أساس طيحيه فيك، واقيلا نجحات الخطة..
ههههه مايصحابليش انت ساهل لهاد الدرجة، إلا كان بصح وليت نعجبو ومهتم بيا دابا عاد غايبدا اللعب ديال بصح .. جابلي الله فاش نتلاهى..

مشيت لبيتي دوشت، حطيت كريم باش تبقى ريحتي جسمي زوينة، نشفت شعري قاديتو بوكلي جا كايحمق درت مكياج خفيف وزويين، لبست كسيوة نواغ قصيرة مزيرة مع انا مفصلة بغيت باش يبانو تفاصيل جسمي و نغرييه، ههه
لبست ليبة موس صبيبيط طالو ف لغوووج،..
آخر لمسات حطيت سليسلة سامبل و حلقات طوال باش يبينوو رقبتي طويلة.. درت بارفان ديالي ( هذا سري خاص بيا مزيج 3 العطور )..
هزيت مونطو ف ايدي و خرجت لصالون ايكسبري درتها تال قدامو عاد نلبس المونطو..كي خرجت لقيتو واجد كايتسناني حل فيا فموو دهشرتو..
وماكنزيدش فيه جيت غزييولة؛.. 
طلع فيا و هبط و باين على عينيه الإعجاب..
يحيى: فين كنتي خازنة هاد الزين كولووو؟؟
انا: ماخازنة والو، انت لي ماكتشوفش 
يحيى: عندك الحق، الوقت كولو قدامي ومارديتش البال..
انا: سير لعند طبيب العينين شوف منين الديفو..
يحيى: هههه ماكاين لاش دبا وليت كانشوف 10/10  مشينا!!
انا: ياله..

لبست المونطو هزيت بوشيط ديالي، لقيتو حل بابا دار و قالي تفضلي هههه الصواب زعمة؛..
سد الباب سبقتو لاسونسور، جا و عينو مفيكسيها عليا ماحيدهاش هبطنا لطومبيل حل ليا الباب..
يحيى: تفضلي مادام يحيى العلاوي..
شداتني الضحكة حبستها بزز.. اويلي واش هذا نسا بلي انا باقا مادموزيل، وبلي انا مدامتو غير فالوراق.. ماعلقتش على هاد الكلمة؛ اصلا بغيتو يصدق راسو.. 
و حنا فالطريق وسط زحام كازا، جبدني بالهدرة موالفين نمشيو ساكتين؛..
يحيى: شنو البرفام كاديري؟ واعر بزاف ماعمري شميت بحالو..
انا: بارفام ديالي سوكري كانقادو الراسي..
يحيى (متفاجئ) : وايلي على كاتقاديه!!
انا: اه كانقادو..
يحيى: كي كاديري ليه؟؟
انا: سوكري داكشي..
يحيى: يااك عليا انا..
انا ضحكت و مجاوبتوش؛..
بقا كايجبد معايا الهضرة من موضوع للموضوع.. المهم اذهلتوو ديال بصح فينما هدرنا كانوريه شطارتي فاهمة فكولشي فاش ما جاني سياسة، اقتصاد، كورة؛.. كوولشي..
وصلنا ريسطو تغدينا؛.. فاش كملنا قلتلوا
انا: يحيى انا غادة لطواليط..
مشيت قاديت المايكاب ديالي؛.. و أنا راجعة خرج فيا واحد بووووووچوووص بزااف ولكن الصراحة يتبووچص حتى يعيا مايبانش قدام يحيى حيت كايهبل بالزين..
البوچوص: جوموسكيز مادموزيل..
انا: سي پا چغااف موسيو..
بان ليا خونا عجبتو انا غادة و هو تابعني؛ فاش قربت لطابلة فين جالسين درت عندو قلتلو..
انا: شي حاجة!
البوچوص: صراحة بغيت نقولك خليلي تون نيم وخفتك تقلقي..
مازال السيد كايهدر حتى وقف يحيى وسطنا؛..
يحيى ( حمر فيه عينيه) : سير طلب النمرة لشي وحدة ديال راسها، سي ما فام..
شدني من ايدي وجرني هز المونطو ديالي وقالي لبسيه؛ باش نمشيو.. لبستو وعاود جرني خرجنا على برا ماهدرتو ماهدرني وصلنا لطومبيل و قالي

يحيى: شفتك عاجبك الحال يوقف عليك، انا مامعمرش ليك العين ولا شنو؟؟
بغيت نفقصو و انا نقولو
انا: يحيى الا نسيتي نفكرك، انا وياك بيناتنا مارياج بلوونش ني پلي ..
يحيى: مانسيتش اااا مادمووزيل، ولكن انت ماتنسايش انا اليوم مكبر بيك و عارض عليك ماشي جيست هذاك..

((ماحملتوووش كيفاش مكبر بيا عندك الزهر لي تواضعت و خرجت معاك و لكن والله حتى نخرجها منك على هاد الكلمة حتى هي؛ غير بلااتي ))

انا: عرضتي عليا اوكي ميغسي اسي ولكن ماشي تمنعني نهدر مع ناس، قلنا غانكونو ديزامي، و ماشي هاكا كايتصرفو ليزامي..
يحيى: كان بإمكاني حتى انا نتزلل على شي وحدة، ناخد نمرة ولكن لا احتارمت وجودك معايا..
انا: بغيت نرجع لدار..
يحيى: طلعي..

طلعت ورجع مكسيري معصب، لدرجة خفت يصدق قالبنا.. الزحام و غادي ب 160 كايضوبل فطومبيلات بطريقة هيستيرية..
انا ماعرفتش مالو.. شنو زعمة غايكووون غاار؟؟ 

بدا غادي و كايزيد فالسرعة، و الصراحة خفت بزااف لدرجة وليت نبكي؛..
انا: يحيى عافاك بشوية ماشي بلاصة هاد السوچاان..
غمضت عيني، لقيتو وقف؛..
حليتهم درت عندو لقيتوو كايشوووف فياا مزچي فيا الشوفة و كايضحك..


#الجزء_الرابع_B:

مشيت دوشت، لبست الحطة من أجمل ماعندي، معرفتش اش وقعليا حسيت بلي خاصني نكون بكامل اناقتي،.. لا لا هدشي بزااف.. دارت ليا الصچعة شي حاجة فديك الماكلة مافيهااااش،.. اووو بزااف ولات تبان ليا غي هي .. 

خرجت نتسناها فالصالون، هزيت تليفوني نلعب بيه على ماتجي؛.. حتى هووبا خرجات 
واااو مانفيييييك، جات زوينة بزاااااااف،.. 
الجنية صدق دوقها زوين، فين كانت خازنة هدشي كامل!! 
او لا طايها خلااص واعرة مفصلة سبحان لي خلقها..
من الاخر هبلااااااتني ديال بصح،..
وليت نحل ليها ف باب الدار و الطومببيل، شوية زباليت قلت ليها مادام بسمة العلاوي؛.. 
بحال إلا تيقت راسي مزوجها ديال بصح..
مابغيتش نفكر علاش؟ و لا كيفاش؟ كانتصرف هاكا، المهم انا فرحان فهاد اللحظات وماباغيش النخسر فرحتي..
وحنا فالطريق حاولت نجبدها بالهدرة المهم مانبقاوش ساكتين، هدرت فأي موضوع خطر فبالي، غير جيب لساني وقول، لكن لي فاجأني أن بسمة ما شاء الله ثقافة عالية، فاهمة فكووولشي، الإنسان معاها مستحيل يمل و لا يحس القنطة.. 

وصلنا لريسطو خليتها هي تطلب الغدا خديت بحالها،.. و حنا كاناكلو كانهدرو داز الوقت طيارة، ملي بغينا نخرجو قالتي بغات تمشي لطواليط، مشات و عيطت لسيرفور خلصت، تسنيتها تجي،..
فاش كانت راجعة خرج فيها واحد، كنت غانوض ليه تملكت نفسي بزز، شوية سيد تابعاها حتى وقفات معاه، ماشعرتش براسي حتى لقيت راسي وسط منهم و ضرت فداك خاينة لي طلب نمرتها، وقلتلو هادي مراتي؛..
جريتها وخرجتها ماوقفت تال حدا طومبيل تعصبت عليها، وهي جوابها كان منطقي انا وياها جييست ديزامي ولي بيناتنا غير مارياااج بلونش، بغات ترجع لدار حليت طومبيل قلتلها ركبي..
انا عفطت على لكسيراتوور مابقيتش حسيت سرحت مع نفسي..

 : علااااش انت اصلا تصرف هكاك توقف معاه ولا ماتوقفش، حياتها هديك انت اش مشى ليك، نسيتي اتفاقك معاها، انت لي قلتي ليها هي حرة فحياتها ماغديش تدخل فيها، شنو زعمة تزعطتي فيها؟؟

: انا براسي مافهمش اش وقعلي فاش شفت هذاك كايتلوط بيها...

: زعمة من نيتك ماعرفتيش اش جرالك؟؟؟ راك غرتي اسيدي مولاي 

: غرت 

: اه غرتي، تنكر؟؟

: علاش غانغير عليها؟

: حيت تزعطتي فيها بين ليلة ونهار، نسيتي راسك البارح جالس تشم فايديك ريحتها بقات لاصقة فيهم، و فاش تحنيتي على ايديها كاتبوس فيهم و تلعب بشعرها..ليل كولو مانعستيش باش هي ترتاح.. مابغيتيش تفيقها و مارجعتيش تال الدار ترتاح؛ عاس على شومبر بحال الا غايخطفوها.. غير خرجتيها مشيتي تجري لفارماصي، وصلتي لدار بلاصت ماترتاح عرضتي عليها لغدا؛.. و باقي لدابا بلا نعاس اشنو كايتسمى هدشي كولو؟؟

: رجولة، عادي البنت مسؤولة مني، إلا ماديتهاش انا لكلينك شكون يديها، ديما كاطيب وتصبن حوايجي، مع العلم هدشي ماداخلش ف الاتفاق يعني هادي أقل حاجة نديرها..

: بغيتي تقول موقف عادي لا أكثر..

: اه

: حتى غيرتك عليها قبيلة عادي ياك؟؟

: طلق مني الله يرحم باك

فاش فقت من الحوار مع نفسي، لقيت راسي غادي مكسيري بزاف وسط المدينة و الزحام، أما بسمة مغمضة عينيها وكاتبكي؛.. تخلعاات بزااف..
وقفت طومبيل و درت نشوف فيها؛.. ناري وجهها كي ولا صفر، مغمضة عينيها وشادة فجنابها ههههه بديت نضحك، حلات عينيها لقاتني شابع ضحك..
بسمة كااعية  : مالك كاضحك!!
انا: كانضحك عليك 


الجزء_الخامس_A :

تعصبت بزااااف ملي شفتووو كايضحك..
انا  :علاااش كاتضحك؟؟
يحيى: كانضحك علييك..
انا: شناهووو!!
صافي زااد كمل عليا، فقصني ديال بصح انا الدمووع فعيني و مخلووعة حالتي حاالة؛ وهو كايفرنس..

مسحت دموعي، هزيت الپوشيط خبطتوو بيها الكماارة؛..
يحيى: واش هبلتي؟؟؟
انا: باش تعلم تضحك عليا،..
هزيت الپوشيط ديالي وهبطت بحالاتي،.. زعمة مقلقة منووو؛.. 
تبعني و بدا يعيط لي

يحيى: بسمة وقفي تسناي..
انا مامسوقااش ليه غادة و عاجبني الحاال يتبعني..
وصل عليا شدني من ايدي دورني لعندو و زير عليا..
يحيى: اش هاد تبرهيش كاديري؟؟..
انا: كيفاش انا برهوشة دابا؟؟ 
يحيى: اه عقلك عقل درية صغيرة..
انا: ياااك ايوا هي إلا حيدتي ايديك عليا وخليتيني عليك، راني غير درية صغيرة ماشي من مستوى ديال السي مول الشركة اش غايقولو معارفك إلا شافوك مع برهوشة ؟؟
يحيى: غايقولو سعداتو 
صدمني بل البرهوش الكبير؛..
انا: ( الصمت)
يحيى: ياله هدري ..
انا( ديك كلمة برهوشة لي قال بقات تزنزن ليا فودني.. و الله ماتبقا فيه و انا نردها ليه تم تم) : غايقولو برهوشة مع برهوش 
يحيى: دابا تلاقينا انا وياك براهش بجوج، و غانمشيو دابا نيت لبلاصة ديال البراهش..
جرني بالقوة دخلني طومبيل، طلع و سورتها باش مانقدرش ننزل مرة أخرى، و كسيرا ..
انا مدورة عليه وجهي و مابغيتش نسولو فين غادين. .
حتى وقفنا قدام سينديباد..
انا بلا مانشعر وااااو كانحمااق على لافواااار،..
شاف فيا باندهاش..
يحيي: كايعجبك؟؟
انا: اه اه بزااف، كانحس براسي بنيتة صغيرة عندها 4 سنين، فيه كانسا كولشي كانرجع انا كيما شحال هذا ماشي بحال دابا، هنا كانفرح من قلبي،..
يحيى: كيفاش مال شحال هذا ومال دابا؟؟
انا ( كانجاوبو بتلقائية بحال إلا داير ليا التنويم المغنطيسي) : كانت ماما ماتخلينيش نمشيلو، وكانت اختي رانيا الله يرحمها ديما تاتجيبني من وراها، تاتلعبني فكولشي، كانت حنينة فيا، كانت عارفاني تانحماق على لافوار، ماكانت تاتحرمني من حتى حاجة، كنت كانقولها فخاطري "ماما رانيا" حتى فاش كبرت و هي تزوجات، واخا المجرم ديال راجلها كان صعيب كانت تسلت و تجي تديني لافوار، كانت كاتقولي الفرحة لي كانشوف فعينيك وانتِ فلافوار تسوا عندي الدنيا كولها، و انا مايمكنش نعيش بلا مانشوف هاد الفرحة، من نهار ماتت ماعاودت مشيت، حيت كنت كانمشيلو غير معاها، من نهار قتلها داك المجرم حياتي تبدلات كرهت راسي بلا ختي، كرهت الرجال و كرهت الزواج، هدشي علاش مابغيتش نتزوج... 
و انا كانهدر دموعي نزلوا يجريو كي شلال،..مسح ليا يحيى بايدو دموعي، جرني لعندو،حط راسي على صدرو،.. وقال

يحيى: ربي بغاها، ربي داها، لي فهمت كنتي متعلقة بيها بزااف، و حتى هي غاتكون كانت كاتحماق عليك، داكشي علاش تفكريها بالدعاء صدقي على قبلها، وكوني فرحانة فحياتك هي هاكا غاتكون فرحانة،.. بما انها كانت كاتبغي تشوف فرحة لي فعينيك و انت فلافوار اكيد حتى دابا فالبلاصة فين هي كاينة كاتسنى تشوف نفس الفرحة ديال شحال هادي و نفس بسمة..


بسمة..
بعدني من على صدرو وباسني فراسي.. هبط حلي الباب قالي
يحيى: تفضلي يا اجمل طفلة فيك يا دنيا..
انا ضحكت بزز مني، يحيى كايتعامل معايا هاكا مامتيقاش.. 
شدني من ايدي و داني نلعب لعبت فكوولشي، الألعاب كاملين لعبنا فيهم حتى هادوك الواعرين، ماخفتش حيت هو معايا حسيت معاه بالأمان، ضحكت ولعبت و فرحت بلا قياس، فجأة رجعت انا بسمة ديال شحال هادي، حاسة براسي طايرة فالسما بالفرحة.. 
بقيت كانلعب، حتى انا قلتلو عييت، صافي باراك استسلمت.. 
داز من حدانا مول النفاخات و هو يشريهم من عندو كاملين و عطاهم لي،..
يحيى: هادو لأجمل بنوتة 
انا: يحيى هدشي بزااف عليا والله، علاش كاتصرف معايا هاكا؟؟
يحيى حط ايدو على فومي: شوووت شوووت تعلمي ماتسوليش علاش؟ ولا كيفاش؟ فاللحظات لي تكوني فرحانة فيهم، تعلمي تعيشي، تعيشي اللحظة وصافي،.. 

عجبتني النظرية ديالو، حنا السلامة ياربي نكدين من الطيراز الرفيع، ديما متشائمين و نقولو الله يخرج هاد الضحك على خير، ديما نتوقعوو مورا الضحك نهجروه،.. علااااش مانعيشووش اللحظة فوقتها؟؟ وننساو شنو غايوقع من بعد.. نهجروه ما نهجروهش ماتيهمش.. المهم جمالية اللحظة مانضيعووهاش..

يحيى: فين نمشيوو دابا؟؟
تفكرت بلي يحيى مازال من البارح مانعسش، بلا مانعيق عليه، منها نكبر فعينو حيت كانفكر فيه، ومنها نمشي نبدل حالتي قبل ماتولي خارجة اللعيبة ونصدق مشوهة (( غير البنات لي غايفهموني ))

انا: ياله نرجعو لدار، مازال من البارح مانعستي، بزااف عليك..
يحيى: واش ا لالة شكيت عليك؟؟
انا: واخا ماتشكيش، بارك هدشي لي درتي معايا من البارح لليوم والله حتى بزااف..
يحيى: مابزااف عليك والو..
انا: ياله نرجعو باش ترتاح عافاك 
يحيى: واخا ا لالة مايكون غير خاطرك،.. و لكن بالليل نخرجووو..
انا : فين نخرجو؟ ؟
يحيى : سيييربريز 
انا: واخا اسيدي،..
مشينا لطومبيل، اختاريت نفاخة وحدة باش نحتافظ بيها، و طلقت لوخرات طارو، دينا كنت كانتمنى نعيش هاد اللحظة نكون هازة بزااف ديال النفاخات و نطلقهم يطيرو فالسما؛ هههه كنت كانشوف هاد المنظر غير فالافلام وكنت كانتخيل راسي فبلاصتهم، اليوم كتب عليا سيدي ربي نعيشها..

فاش رجعنا لدار اول حاجة بدلت حوايجي و اللعيبة بيان سيييغ ؛ هزيت ماركور كتبت فالنفاخة تاريخ اليوم؛ و علقتها فوق الماريو.. 

يحيى دخل يرتاح، و انا جمعت دار، من بعد دخلت الكوزينة نوجد الچوووطي.. 
درت كيكة بشكولا، و بفرير، مسمن،.. وجدت القهوة.. 
مع كملت فااق يحيى، جا عندي الكوزينة، و قالي.....


#الجزء_الخامس_B :

كنت ديجا سمعت بقصة رانيا الله يرحمها، فاش كنت ف فرنسا، عاودات لي ماما كيفاش ماتت الله يرحمها،.. قتلها راجلها، كان كايضربها بزااف، مكرفص عليها، وهي ماعمرها قالت هدشي لدارهم كانت صابرة، حتى الواحد نهار كان كايضربها و ماتت بين ايديه.. بسمة بحكم هي الصغيرة فالدار و رانيا هي الكبيرة كانت مدلعاها بزااف فرق السن لي بيناتهم 14 عام،.. 
بسمة تأثرات بزااف من بعد موت ختها لدرجة مابقاتش كاتهدر شي 9 شهور تقريبا، تبعو ليها عند بسيكو عاد ولات شوية،..
دارهم يصاحبليهم صافي برات من جرح موت اختها، حيت دابا 6 سنين باش ماتت، ولكن على مابان ليا اليوم ماعمرها نسااات، مأثر فيها هدشي بزااف، عاد فهمت علاش بسمة مابغاش تتزوج، اصلا كان خاصني من الأول نعرف هدشي، كيفاش حتى نسيت هاد النقطة، وكيفاش ماماها مافهماتش سباب رفض بنتها الزواج هو الطريقة باش ماتت رانيا!!

حسيت بألم بسمة، بمعاناتها، صعيب تخسر أعز إنسان على قلبك، خصوصًا إلا كان حريص على راحتك و فرحتك؛.. ألم الفراق صعيب، لا وماشي اي فراق، فراق الموت قاصح بزاااف..

قررت نعوضها على داك الفراغ لي خلااتوو ليها ختها فقلبها و فحياتها.. و يمكن نعوض حتى انا راسي على الفراغ لي كانعيشو، بفضل بسمة اكتشفت اليوم بلي انا ماعايش ماوالو، الحياة لي عايشها غير تخربيق، لأول مرة نفكر ف الإستقرار و هدشي بفضلها هي..

لعبنا انا وبسمة فكوووولشي، حسيت اليوم فرحة من نووع اخر، فرحة طفوولية، واخا نعيا نوصف مانقدرش نعبر،.. الفرحة كانت فرحتين، حاس الفرحة من داخل ديالي، و فرحة أخرى فاش كانشوف لمعة عينين بسمة الطفولية،الفرحة المرسومة على وجهها كاتبان بحال شي ملااك، عاد فهمت علاش رانيا الله يرحمها قالت ليها مستعدة ندير اي حاجة باش نشوف هاد الفرحة فعينيك..
فعلا هاد اللمعة لي فعوينات بسمة تستاهل دير اي حاجة باش تشوفها..

عجبني بزااف اهتمام بسمة بيا فاش قالت لي نرجعو لدار حيت باقي ماناعسش.. فعلا بسمة اسم على مسمى كادخل البسمة على حياة الإنسان..

رجعت عيان كي وصلت نعست، فاش فقت شميت ريحة قهيوة زوينة،.. مشيت لكوزينة لقيت بسمة تبارك الله موجدة الچوطي ها الكيك ها المسمن ها البغرير.. 

انا: امممم هدشي كامل على قبلي!!
بسمة: لا على قبلي..
انا: شنو زعمة مادوقينيش ؟
بسمة: لااااءح..
انا: تعطيك خاطرك؟؟
بسمة: الصراحة لا تبقى فيا..
انا: شفقة زعمة؟؟
بسمة: اه ههههه
يحيى : واخا ا لالة مقبولة منك..
بسمة: ياله سير تجلس انا نحول هدشي لصالون..
انا: لا ايدي بايدك نعاونك 😉
هزيت معاها طبيسلات،.. اول مرة نعاونها، هههه
كلينا داكشي زوين كي العادة،.. جمعنا الطبلة بجوج وعاونتها فغسيل الماعن..
صونا عليا علاء باش نسهرو اليوم، قلتلووو لاا اليوم خارج مع بسمة، علااء مافهم والو حيت هو عارف بلي زواجي بيها غير على الوراق... 
ضروو راسوو بغا يفهم البلان، ساعة ماعنديش ليه الوقت دابا باش نشرح ليه، و انا نصدرو..

انا: يال نوضي وجدي راسك باش نخرجوو..
بسمة: فين غانمشيوو؟!
انا: راه قلت ليك سيربريز، غير هي لبسي شي حاجة سپوور ماتلبسيش غووب وشي تجاكيط على البرد..
بسمة: هي الأولى..
مشيت حتى انا لبست سپوور، و خرجت نتسنا بسمة كيما الصباح حتى خرجت سندريلا ههه 

لابسة سرواال كحل مقطع من الركبة؛ كويرة كحلة و نايكة فرجلها.. هههه وليت برچااچ و لكن والله حتى أول مرة.. مع بسمة كولشي غايكون لأول مرة..
انا: اممم تبارك الله عليك هدشي زيين..
بسمة: حتى انت جيتي زوين..
انا: عارف راسي زوين ههه 😂😂
بسمة: اللهم زيده تواضعا..
انا: هههه امييين، حطي داك الصاك من ايدك ماكاين لاش تهزيه..
بسمة: علاش؟؟
انا: شنو قلت ليك ماتبقايش تسولي بزااف..
بسمة: صافي هاهي حاطاه..
مديت ليها ايدي شدات فيا و مشينا هبطنا لجراج ديال لموبل؛.. 
كاين بلاكارات تما، كل واحد ساكن تما عندو جهة ديالو بالساروت، باش يخزن فيها تخربيق ديال طومبيل..
حليتو جبدت 2 كاسك..
بسمة: ديالمن هاد الكاسك؟
انا: ديالي انا وياك..
ياله راه الموطور..
بسمة: واااو R6 كايهبلني..
انا: عارف..
بسمة: كيفاش عارف؟؟ 
انا: عارف بلي كايعجبووك الماطر ولكن عمرك زعمتي تركبيهم..
بسمة: باش عرفتي هدشي..
انا: تفكرت الصباح اول مرة جبت موطور للمغرب، فاش كنا مازال ساكنين فنفس الدرب، جات عندي رانيا الله يرحمها قالتلي بلي اختي الصغيرة كايعجبوها الماطر ولكن كاتخاف تركبهم، عافاك تقدر تدرب بيها شي دورة.. قلت ليها مرحبا ولكن كنت تلهيت ومابقيتش ضربت بيك دورة..
بسمة عينيها دمعو : و انت كيفاش حتى تفكرتي؟، هدشي غايبكوون داز عليه بزاف شي 10 سنين هي القليلة..
انا: قبيلة فاش بديتي تهضري عليها، جات فبالي هاد اللقطة.. كنتي عزيزة عليها بلا قياس لدرجة كانت باغى تحقق ليك اي حاجة كاتمنايها..
بسمة: اااه بزااف، هدشي علاش حاسة براسي بلا بيها جثة بلا روح.. 
انا: ماتقوليش هاكا، انا شنو كاندير هنا.. كانواعدك عمري نتخلى عليك و غاندير اي حاجة باش نفرحك.. و شنو قلنا ممنوع البكا..
مسحت ليها الدموع، لبستها الكاسك..
انا: شدي فيا مزيان وماتخافييش..
بسمة: مستحيل نخاف و انا معاك..


الجزء_السادس_A:

فرحت بزااف غانركرب ف R6، مامتيقاااش،.. 
وااا مطووووور و أشمن موطور وااااعر ديال بصح، كان من بين أحلامي نضرب دورة عليه،.. 
يحيى من بعد مادار ليا الكاسك جبد ليچوون و تجاكيط نوااغ، واااعريين بجهد ديال الماااطر،.. جااا بحال شي ارتيست هبلني..
ديمارا موطور قالي طلعي وشدي مزيان، راه كانمشي مكسيري، ماتخافيش..
قلتلو اوكي اصلا معاك ماكنخافش..
ساعتين و حنا كاندورو وااو على احساس كيداير.. وغادي مكسيري، طومبيلات كاملين خليناهم ورانا،.. 
وقفنا فواحد فيروج، تلاقينا واحد خينة عندو بحال موطور يحيى، و قال ل يحيى نتسابقو، قالوا يحيى مرحبا..
يحيى: شدي مزيان دابا عاد يبدا اللعب..
انا: واخا..
عنقت يحيى بجهد، و هو يكسيري، انا عين على الطريق و عين على لي كايتسابق معانا، فاش كايفوتنا، كايطلعلي الدم و نبدا نغز يحيى زعمة سبقو..
ههههه مارضيتش يسبقنا، يحيى فهمني اش بغيت نقول، و هو يعفط خلينااه ورانا حتى مابقاااش كايبااان..😆

من بعد مشينا نتعشاااو ف واحد ريسطو واعرة،.. و هاد المرة جات واحد خيتي لعندنا لطابلة..
هي: بونسواااغ يحيى صافا؟؟
يحيى: بونسواغ.. 
هي: شكون هادي؟؟
يحيى: المدام..
هي: كيفاش؟ 
يحيى: نترجم ليك، مراتي..
هي: علاش انت مزوج؟ مايمكنش..
يحيى: واش نوريك لاكط باش تيقي، المهم لقيتيني انا ومدامتي كانهدرو فواحد سيجي مهم و قاطعتينا.. 
هي تزيرااات مارضاتش بدات تحمار و تصفار وتخضار؛ قلبات الدورة ومشات بحالها..

انا صدمني يحيى فاش قالها مراتي، و ف نفس الوقت عجبني الحال ماعرفتش علاش!
: اشنو ابسمة باغا تنتاقمي ماشي طيحي فيه؟؟
: اللسان مافيه عظم، يمكن داك نهار مقصدش، شووف تصرفاتو معايا شحال زوينين..
: مايغركش هدشي، راه الرجال ولاد الحرام، كايتمسكنو حتى يتمكنوو، كلهم كايكونو زوينين و ظريفين و شهوة منهم فالأول، غير كايعرفوك طحتي و تمكنوو منك، كايبداا يتبووردو..
: اووف منك

سولتو..
انا: شكون هاديك؟؟
يحيى: وحدة من بنات الليل.. بلا ماتصدعي راسك بيها.. (و غمزني)
أح غميزااتو طياحييين بل المسخوووط لاخوور.. المهم قلبت الموضوع جيت مابغيتش نحكر عليه، باراك غير الفرطة لي دار ليها؛..

وحنا كانكملوو العشا، تقابل معايا واحد بقا كايشووف فيا مانزلش عينيه، انا هبطت عيني مابغيتش نشوف فيه، إحتراما ل يحيى حشومة، من بعد كلشي دارو اليوم، ماجاتش..


حشومة، من بعد كلشي دارو اليوم، ماجاتش.. 
شوية هزيتها بالصدفة و هو يغمزني، انا درت ردة فعل بوجهي بلا مانحس.. 
تلفت يحيى، حصلو كايغمز فيا، و هو ينوووض ليه فرشخوو، بداو الناس يفكو، شوية جا مول ريسطو دَّخل صدق كايعرف يحيى؛..
سامي ( مول ريسطو) : موسيو يحيى، ماموالفاش ليك..
يحيى: موسيو سامي، ماشي الغلط ديالي، واش انا جالس مع مراتي و واحد جالس يتلوط بيها،.. 
سامي: سمحلينا ماغايتعاودش هادشي.. و هاد السيد ممنوع يدخل لعندنا مرة أخرى..
جاو سيكيرتي خرجووه، وحنا اعتادر منا موسيو سامي، مشينا نكملو عشانا..

انا: يحيى كون غير ماضربتيهش، رونتي لسيد ريسطو..
يحيى: ونقلبها چاع راني من أهم الناس لي كايجيو عندو لهنا.. وزايدون ماظلمتوش، باش هاد المرة إلا بغا يتلوط يعرف على من يتلوط.. واش انا كووولي مابنتش ليه، جالسة حدايا وكايتزلل عليك هالبسالة.. 
انا: قول المسألة مسألة رجولة لا أكثر..
يحيى: بيان سيغ..
انا تزيرت ماعجبنيش الحال، يصحابلي غار عليا،

: أشمن غار عليك، راه حاسبك فحال اللوخرات، راك غير بنتي ليه فالبلان..
: عندك الحق..

و انا نتقندش عليه ولا كايهدر راسو وماتنجاوبوش،..
يحيى: مالكي، عاد كنتي بخاطرك!!
انا: والو جاني نعاس، نقدروو نمشيو..
يحيى: واخا..
صافي خلص و خرجنا.. كي وصلنا عطيت ل يحيى كاسك باش يردو لبلاصتو..
انا: عافاك عطيني ساروت باش نطلع،..
يحيى: بلاتي ها حنا طالعين بجووج،..
انا: غير عطيه ليا..
مازادش معايا الهدرة، عطاني سوارت، طلعت خليت الباب مردود باش يلقاه محلول، علقت الساروت فالباب د دار من للداخل.. ومشيت لبيتي بدلت حوايجي و وبدلت لعيبة حتى هي، و نعست..
فقت فالصباح تال 12 د نهار، نظت لقيت يحيى خارج، مخلي لي مساج بلي غايتغدا برا، مانتسناهش،.. 
شتيني غير مسنياك.. 
درت شي تخربيقة ناكلها و رجعت لبيتي، شعلت تلفازة نتفرج، مابان ليا والو؛..
نضت لبست حوايجي، هزيت ساروتي طفيت تليفون وخليتو فبيتي وخرجت.. بطبيعة الحال راه كازا هادي؛ حتى إلا بغاو يچريسيوني مايلقاو والووو، و باش إلا رجع يحيى مايلقى كيفاش يوصل ليا..
بقييت غادة من درب ل درب، زنقة زنقة؛ دار دار، اش خلاها القدافي 😂
دايرة فيها ضايعة و شاردة التفكير، و انا ف الحقيقة مامسوقاش، فاش ماكنلقى مايدار كاتبان ليا فالدروبة و التجلويق كنلقى راحتي 😂. . 
النهاار كولو و انا كاندوور حتى تودرت ماعرفت راسي فين وصلت وصلات 22h؛ صافي عييت؛ تهلكت رجليا طابووو.. شديت طاكسي ورجعت (( حافظه لادريس ماتخافوش عليا))..
كي حطني طاكسي، جا عندي الكونسييج كايجري؛..

الكونسييج: فين كنتي ا لالة، سي يحيى قالب عليك الدنيا، ماخلى فين قلب عليك حتى من السبيطارات و الكوميساريات مشا ليهم، كازا كولها قلبها..
انا: وايلي هدشي كامل!!

خليتو وطلعت لدار، دخلت لبيتي، بدلت عليا.. حالتي ولااات حاالة خصوصًا لي علابالكم (( البنات فهمتوني ياك 😂 )).. تخشيت ف فراشي باش ننعس، وماحملتش راسي، حسيت براسي موسخة،..
جمعت الوقفة دخلت ندوش، عندي الدوش ف بيتي،..
طلقت الما،.. بقيت شي ساعة فالدوش و الما مطلوووق؛.. دوشت على راحت راحتي؛.. كي كملت سديت الما، سمعت يحيى كايغوت على برا..
كايربرب، كاعي نييت، لويت فوطة عليا، وخرجت،.. مع كي خرجت دخل هو البيتي نيشان،.. انا بديك الغوطة ياله مدرقة ليا العورة، شبه عارية؛.. 
انا حشمت،..
اما هو چاااع دااك الغوااات كااامل تبخر،.. دخل كايغووت شافني صقل، زچاااا فيا عينيه مزيااااان، بداا كايتمنظر فيا و هو يبداا يتمتمم..

يحيى: فففين ككككنننتي تااال ددددااابا؟؟


#الجزء_السادس_B: 

ماعرفتش مال بسمة، كانت بخاطرها، حتى تسيفاات عليا، معرفتش فاش غلطت باش تصرف معايا هكذا؛.. 
قلت يمكن تفكرات ختها حيت اليوم دوينا عليها بزااف، هدشي علاش، و قلت نخليها على راحتها غدا ان شاء الله تصبح الييز..
فاش فقت، كانت بسمة مازال ناعسة و حتى الفطوور ماوجداتوش على غير عادتها،.. 
شنو زعمة نبقى انا اليوم بلا فطور ؟؟
ياله هانية نصبر انا، نخليها على راحتها.. خرجت فطرت على برا ودزت للخدمة،.. كان عندي إجتماع فالوقيتة ديال الغدا صيفطت ميساج لبسمة، باش ماتبقاش تسناني..
لكن حتى الآخر لحظة و تلغى داك الاجتماع، قلت نرجع لدار نتغدا معاها؛.. رجعت مع 14h مالقيتهاش.. كانعيط ليها تليفونها طافي، تخلعت، دخلت لبيتها لقيت تليفون مخلياه تما؛.. جلست تسنيتها قلت كوراها مشات غير الحانوت،.. 
دازت ساعة والو حتى أخبار عليها، دازو ساعتين.. صافي انا نقلق،.. خرجت سولت عليها الكونسييج؛..
قالي خرجات مع جوايه 12h ولا 13h؛.. 
دابا 16h تعطلات بزااااف هي ماكتعرفش كازا مزيان غاتكون تلفاات.. 
قلت لكونسييج إلا جات يصوني ليا، خليتلو نمرتي و خديت نمرتو،.. مشيت نقلب عليها فشوارع و درووبة،.. شوية شوية تانصوني لكونسييج نسولو كايقولي مازال ماجات كانزيد نجهل،.. وليت قالق كثر خفت عليها تكون وقعت ليها شي حاجة.. صونيت لعلاء كلفتو يسول عليها فالسبيطارات و الكوميسارات،.. و انا ماخليت حتى قنت فكازا..
ظلام الحال وباقي ماكاين عليها حتى خبار..
كنت غانهبل،..
تال 22:30h و انا باقي نقلب حتى صونا ليا الكونسيييج قالي راها جات.. كنت ديك ساعة برااا كازاا، ماعرفت اش قالي عقلي!!..
دار فيها شي أحد شي مصيبة و لاحها، چااع المصايب جاو فباالي، رجعت لدار كاااعي عليها بل بيااان؛..
وصلت كانغووت من الباب، هي حسها مقطووع، كانسمع غير صوت الرشاشة؛ جاي من حمام بيتها،.. 
ماصبرتش انا الكشاكش خارجة ليا، دخلت لعندها لبيتها لقيتها ياله خرجت من دوش..

الله ياربي اش هدشي، شدتني اللقوة،..
وليت نتمتم الهدرة مابقاتش باغا تخرج؛.. بسمة كملاااات ليا على مابقا، جات مثييرة لواحد درجة كبيييييرة..
انا: فففففففين ككككككنتي تتتال ددداببا؟ 
بسمة: واش وقت الهدرة هذا خرج برااا..
انا مشيت ليها قربتها ليا..
انا: فين كنتي تااال دابا؟؟
بسمة: ماشي شغلك؟ خرج برااا تانلبس حوايجي ونهدرو..
انا: و الا ماخرجتش؟؟
بسمة: ماتلوم غير راسك..
انا: بغيت نلوم راسي غير وريني اش فجهدك..

انا ملي قربت ليها مابقيتش سخيت نبعد.. شعرها وهو فازچ كايبان كايهبل.. وجها باقي حمر من سخونية الدوش.. بلا مكياج و كتهبل.. كيفاش مارديتش البال


كيفاش مارديتش البال فالاول؟؟ هاد الزين كامل ماشفتوش؟؟ مايمكنش؟؟
و انا سارح كانفكر و كانشوف ليها فعينيها، شوية ماحسيتش براسي حتى جريتها عندي و بستها ماكنفيق غير على تصرفيقة و هي كاتغوت..
بسمة: خرج براااااا، براااا،...
خرجت و هي سدات الباب بالساروت..

: اش درتي انت راه حشووومة البنت زعمة تايقة فيك ؟؟
: راهااا مراااتك قدام الشرع و القانون و الناس كاملين، و لي درتيه عادي و من حقك...
: قدام الناس اه، ولكن حنا دايرين بيناتنا بلي ماريااج بلونش، هذا اتفاقنا.. 
: المهم مراااتك..
ندمت على التصرف لي درت؛..
خرجات بسمة شاعلة..
بسمة: اش كايصحابلييك راسك انت؟؟؟ باشمن حق تبوسني؟؟؟
انا: واقيلا نسيتي راكي مراتي. .
بسمة: رااااه انت لي نسيتي راسك انا وياك مزوجين على الورااااق و هذا اتفاقنا من نهار الأول..
انا: فين كنتي؟؟..
بسمة: ماشغلكش..
انا: بلاااا ماتعصبيني، ماخليت حتى بلاصة ماقلبت عليك فيهاا..
بسمة: واش قلت ليك قلب عليا؟؟؟ ياااااه هااا دخوول الصحة..
انا: راكي شعلتي ربي ديال بصح، دوي بلا مانعصبيني، فين كنتي و معامن؟؟؟
بسمة: باشمن حق كاتسول؟؟
انا: واش ماكتفهميش انت شناهي خفت عليك.. خفت توقع ليك شي مصيبه..
بسمة: غير خليك انت بعيد عليا و غانبقى سالمة من المصاايب..
انا: بسمة لآخر مرة غانسولك بالتي هي أحسن.. فين كنتي؟؟؟
بسمة: مع حبيبي..
انا: شناهوووو عاودي شنو قلتي
بسمة: ماكتعاود غير الصلاة على النبي..

مشات لبيتها، دورات الساروووت و خلاااتني على براا شاااعل كانغوووت غير الراسي..

وليت بحال المجنون، انااا مالي چاااع على هاد الحالة؟؟ لاااش مصدع راسي؛ تخرج تدخل تمووووت چااع...

بدلت حوايجي و خرجت نسهر على براااااا، اصلا بسمة غير كنت غالط فيها يصحابلي بنت فشكل ساعة ماصدقاااتش.. خارجة النهااار كامل و كي رجعااات دخلاات تدووش غاتكون سيغ كانت مع شي واحد، وغير وصلات دخلت تغسل وسخها..

يلعن جد بووووه هاد القلب لي بدا يتحرك على قبلها،..


#الجزء_السابع_A:

فاش قرب ليا و باسني حسيت قلبي نقز من بلاااصتووو؛.. و لكن لااا ماشي انا لي نكون ساهلة.. جمعتها معاه بتصرفيقة وجريت عليه من البيت..
لبست حوايجي، جمعت شعري و خرجت باش نهدر معاه.. دابزنا تاني، هوو كان معصب بزااف، مافهمتووش واش كان بصح مخلوع عليا؟ و لا عادي حيت محسوبة عليه،.. 
فاش سولني فين كنتي قلتلو مع حبيبي؛.. تعصب بجهد..
مشيت سديت عليا و خليتوو كايغوووت و يخبط؛..
شوية ولا الصقيل خرج من دار..
خرجت من بيتي وجدت ليا ماناكول، غسلت الماعن وجمعت الدار، دخلت لبيتي سورت عليا؛.. ماجانييش النعاس بقيت فايقة حتى رجع يحيى لدار مع ديك 3h عاد نعست..
مافهمتش علاش ماجانييش النعاس خفت عليه مثلا؟؟
تفووو مابقيتش عارفة راسي شنو باغا، ننتاقم ولا شنووو بالضبط؟؟؟ 

: مناش اصلا باغا تنتاقمي؟؟ قاتل ليك رووح مثلا؟؟
: حيت قلل مني..
: حتى انت قللتي منو، مالو مايفكر حتى هو ينتاقم منك؟؟ راكي غير كاتروني.. ماشفتيش السيد كي كان مخلووع عليك؟؟
: قولي ملهوف بحالا عمرو شاف بنت المرااا..
: غَلاَاط و وقع الله يسامح،..

فقت فالصباح بكري، وجدت الفطووور.. حطيتو فطابلة و تسنيتو يفييق..
اخيرا سي يحيى فااق.. خرج من بيتو ماشافش فيا ماعبرنيش، نيشان الباب خرج 😔..
فطرت الرااسي، و وجدت الغدا، ماجاااش تاني.. مارجع تال الليل..
فالصباح خرج بكري قبل مانشوفو، و رجع بالليل معطل،.. هكذا ولا حالو يوميا يفيق قبل مانفيق و يرجع من بعد ماننعس؛.. 
التقدية و اي حاجة ممكن نحتاجها كانت كاتجيني تال لدار مع الشيفوور،..
ولينا عايشين فدار وحدة و ماتنتلاقاوش نهائيا،.. مافهمتوش واش كايتجنب يشوفني؛.. أكثر من شهرين و حنا على هاد الحال..
انا مارضيتش نهدر معاه ولا نسولو مالو، و هو كذلك ..
صافي مابقاش عجبني الحال نهائيا كايتهرب مني مالي فيا جرب؟؟، انا لي كنت ناوية نخليه مزعوط فيا، شنو درت هربتوووو مني 

قررت نمشي لعندو لبيرو؛.. مشيت دوشت، قادييت حالتي، درت مايكاااب خفيف ولكن جيت قوقة (( شكاار راسوو عاد داز من هنا )).. لبست شمييز بلو سيل، سرواال بيض مطرطق، و صبيبيط طالوو بلو سيل، درت ساعة فايدي و حلقات و سليسلة؛.. جمعت شعري الفوق كوپ شوفال و درتلو ديك النفيخة من القدام؛..
و بطبيعة الحال البرفام ديالي لي كايعجبووو،.. 
هزيت صاكي و تجاكيط ديالي و خرجت.. 
وصلت لشركة،.. 

انا: بونجووغ، عافاك فين جا البيرو ديال ديغيكتووغ..
سيكرتير طلعات و نزلات فيا شي عشرين مرة عاد جاوبتني: عندك رونديفو؟؟
انا: لا ماعنديش..
سيكريتير: ايوا هي لا دردبتي من هنا..
انا: شناهو شنو كاتقولي انت؟؟؟ واش عارفة راسك معامن كاتهدري؟؟
سيكريتير( باستهزااء) : معامن كانهدر بسلامة؟؟ غاتكوني وحدة من بنات ليل.. سيري الله يعفو عليك..
ماشعرتش حتى جبدتها معاها بتصرفيقة؛.. هدشي لي بقا ليا فالحساب،..
سيكريتير ( مارضاتش) : اش هدشي درتي انت الحمارة فين كابرا فكوري؟؟


كابرا فكوري؟؟
انا: مزيان تبارك الله مازااال زايدة فيه؟؟؟؟

و انا نتلاح عليها جاو سيكريتي دخلو فرقوونا؛ و شدني واحد مچلظم باغي يجرني لباراا و انا كانغوت؛.. و المچلظم جارني و كايتحسس فيا..
المچلظم : ياله تباتي معايا هاد الليلة راه نعجبك..
بديت نغوت و نعاير و نسب..
و عو غير زايد فيه..
المچلظم: وا مشاغبة مع راسك، باين ليا ندوزوو انا وياك ليلة واعرة..
خرج يحيى نيشان مع ديك الهدرة لي قال، و انا كانسب فيه..
انا: حتارم راسك ا الحيوان راني مرات ..
مازال ماكملت هدرتي، جا يحيى نصلني من عندو و عطاه بكرووشي لكمارة حتى رعف و عاودو وحدة أخرى جابوو مجبد...
يحيى: برااا عليا مانشوفكش هنا مازال، عارف هادي شكون؟؟؟ راه مراتي ا لكلب.. سير خود حسابك و ضرق عليا زلافتك..

كلهم تصدمووو، أما واحد سيكريتير ولاات كاتخضار و تصفار خافت على الپوسط ديالها لايصدق جاري عليها حتى هي من الخدمة..

سيكريتير : سمحيلي مادام والله ماعرفتك..
انا: انت بعدا خليتلي الفرصة فين نهدر؟؟
سيكريتير: والله حتى حشمانة منك سمحليا مرة أخرى ا لالة..
انا: علياش غانسمح عليك بالضبط، على شوفاتك لي كولهم احتقار و لا على معيورك ولا على نعتك ليا ب ببنت الليل؟
يحيى: شنوو، شنو قالت ليك؟؟
سيكريتير: الله يرحم ليك الوالدين ا لالة إلا ماسمحيليا.. راني خدامة على دارنا ماتقطعوش ليا رزقي..
بقاات فيا واخا عايراتني ولكن الله يسامح بارك غير التصرفيقة و النتفة لي نتفتها..
يحيى: من بعد هاد الهدرة لي قلتي، صافي التقطع رزقك من هنا..
انا: لا لا غير خليها سمحت ليها،حرام تقطع رزقها؛ غير مرة اخرى تعاملي مزيان ماشي غير معايا، مع أي واحد و لا وحدة؛ و ماتسرعيش حتى تفهمي شنو كاين.. 
سيكريتير : واخا ا لالة،.. الله يرحم ليك الوالدين،..
تلفتات عند يحيى: سي يحيى سمحليا ماعمر هدشي يتعاود مرة أخرى...
يحيى: لااا غير عاودي..
شاف فيا و قالي: تفضلي معايا..
مشينا لبيرو ديالوو؛..
يحيى: نعام علاش جيتي هنا؟؟
انا: اولا شكرا بزاف، حيت كبرتي بيا قدام الموظفين دياولك؛ واخا كان ممكن تقول اي حاجة الا تقول راني مراتك..

اي حاجة الا تقول راني مراتك..
يحيى: واخا ماتستاهليش..
انا: علاش ا يحيى شنو درت؟ واش مقلق مني؟؟
يحيى: وااو، البراءة؛.. شوفي راني مامساليش عندي اجتماع من ورا ربع ساعة؛ قولي شنو باغا؟؟

مارضيتش كايهدر معايا غير من نيوفوووو؛ شداتني البكية ماعرفتش علاش.. ولكن تحكمت فراسي ومابكيتش..
انا: نستاهل نيت لي جايا عندك حتى لهنا باش نطمئن عليك،.. و نعتاذر ليك على اخر مرة واخا انت لي غالط ..
يحيى: انا لي غالط؟؟ داك النهار كولو نقلب عليك كي الهبيل و انت ولا فهاد العالم مدوزة نهار مع صحايبك..
انا: حتاااارم راسك، شفتك كاتهدر بحال الموظفين ديالك؟؟؟
يحيى: انا لي كنت عمى وماشفتش حقيقتك، لي باينة و واضحة لكل الناس و الدليل هدشي لي واقع برا، ماعرفتش كيفاش تعميت و خليت قلبي يبغيك..
انا كانت الصدمة عليا مزدوجة،.. اولا شكو فيا بلي انا مانسواش، وتانية انو كايبغيني..

انا: فعلا انت عمى، ملي كالظن فيا هدشي، انا غانقوليك واخا ماتستاهلش ولكن غير باش نخليك لعذاب الضمير هادي إلا كان عندك شي ضمير بعدا.. داك نهار قنطت، وفاش كانكون كاعية كانخرج نبقى ندور حتى نتفش و نرجع؛ وداك النهار كنت ديجا مقلقة منك على هدرة قولتيها،.. فاش ضربتي داك السيد فريسطو وقلت ليك كون غير ماضربتيهش جاوبتي بلي ضربتيه حيت الأمر كايتعلق بكبرياءك حيت ماحتارمش وجودك معاياا ماعتابركش رجال قاسك فرجولتك، ماشي حيت كان كايتزلل عليا.. يعني سوا انا سوا غيري كنتي غادي التصرف نفس تصرف حتى لو كانت معاك بنت الليل..
يحيى: علاش انت شنو بالسلامة؛ ماشي بنت ليل ملي خارجة نهار كامل كي رجعتي دخلتي تغسلي من الجنابة..
ناري فاش قال هاد الهدرة بحال إلا شد موس و دچوو ليا فقلبي.. دموعي طاحووو بلا مانحس و جاوبتو بنبرة كولها مخنوقة...

انا: ......


#الجزء_السابع_B:

وليت كانخرج من الدار قبل ماتفيق بسمة، و ندخل بعد ماتنعس، ولييت كانتجب اللقاء معاها؛.. بغيت باش نمنع احساسي بيها يكبر،..
ولكن واخا هكاك نهار على نهار، كايزيد تعلقي بيها و ماعرفتش علااش؟؟
كنت شي مرات بالليل كاندخل لبيتها بلا ماتحس هي بيا، و نجلس نشوووف فيها، زعمة هاد الوجه الملائكي يكون فاسق؟؟
مافهمتش راسي اش وقع ليا نهائيا، عمرني ماكنت هكذا؟؟ لي قالو ان الحب ضعف ماكدبووش..

هاكا دازو أكثر من شهرين على هاد الحال، حتى لدااك الصباح لي سمعت الصداع وسط الشركة، خرجت من البيرو لقيت واحد من سيكيريتي شاد بسمة جارها و كايتبسل عليها..
مشيتليه ضربتو، وجريت عليه؛.. من بعد عرفت بلي حتى سيكريتر قلات الاحترام على بسمة.. جريت عليها، ولكن بسمة سامحاتها..
دابا اش هاد الطيبة كاملة، واش فعلا هي هاكا ولا كاتمثل؟؟
المهم خليت سيكريتر.. و مشيت انا و بسمة لبيرو نهدرو؛.. جاات زوينة بزااف شدا ديال الشعر جاتها كاتحمق، و ريحتها كيما العادة ماتخطاهاش..

شكراتني على تصرفي معاها باحترام قدام الموظفين دياولي، و من بعد دابزنا، انا تعصبت وقلت ليها بلي هي بنت الليل، و داك نهار لي كانت غابرا كانت مع صحيبها و دليل غير رجعات دوشات من الجنابة؛..
بسمة طاحوا دموعها شلال، جاوبتني بنبرة مخنوقة

بسمة: ككككيفاش؟؟؟ كيفاااش غاندير شي حاجة و انا داك نهار كنت غيچلي؟؟؟؟ ولا نسيتي ياك بليلة قبل ديتيني بنفسك لاكلينيك؟؟
الطبيبة قالت ليك الحريق سبابو لي غيچل، و شريتي لي الدوا...
شنووو زعمة هدشي مافكرتيش فيه،.. لنفرض اني مثلا بنت ليل، انت كاتمشي مع وحدة غيچلي؟؟؟؟؟

هي كاتهدر و انا الما نزل ليا فركابي، كيفاش نسيت بلي هي غيچلي؟؟؟ كيفاش حتى تكلخت كيفاش حتى نويت فيها هاكا؟؟؟
خبطت ايدي مع البيروو؛..
انا: بسمة انت السباب.. فاش سولتك مابغيتيش تجاوبيني فين كنتي، انت لي قلتلي كنتي مع حبيبك.. علااااش قلتي هكذااااك؟؟؟

بسمة: قلت ليك كنت مع


بسمة: قلت ليك كنت مع حبيبي، باااااش نعصبك، باااش تعتارف بلي كاتغير عليا،.. شوووف انت كيفاش نويتيها،.. و هادي يا حسرة عارف بلي انا كارهة الزواج و الرجال بسباب داكشي لي وقع لختي؛.. عمري نسمح ليك..ظلمتيني و حطيتي عليا باطل كبيييير،.. شوووف لي نطولووه نقصروووه.. اللعبة لي جامعانا سلات؛.. طلقني!!

هي غير كملات هدرتها خرجات كاتجري؛.. جرحتها بزااف؛.. صدقت أكبر مكلخ.. غاضني قلبي و حسيت بالغلط لي درت، كيفاش مارديتش البال بلي باغا غير تفقصني، كيفاش نسييييييت راها غيچلي و انا بإيدي ديتها لاكلينيك. .

تبعتها لقيتها مازال واقفة كاتسنا فطاكسي..

انا: بسمة سمحلياا عافاااك؛.. عارف راسي غالط فحقك.. معرفتش كيفاش تكلخت؟؟

بسمة (كاتبكي) : فاش غاتنفعني هاد سمحيليا؟؟؟ اااا فاااااش؟؟؟ واش عارف شنو قولتي؟؟ واش عارف باش تهمتيني؟؟ انا لي كنت مكلخة صدقت هدرتك فاش قلتي غاتفرحني كيما رانيا الله يرحمها..
انا: غلطت و مستاعد لأي حكم طلبيه، لأي حاجة، ندير أي حاجة باش تسمحيليا.. قلبك كبير ابسمة مع الناس كاملين، ماتجيش تال عندي و تقصحيه.. انا غلطت و معتاررف و عارف جرحتك، واخا نهدر حتى نعيا واخا نعتاذر الف مرة و مرة غايكون قليل وبزااف.. قوليلي شنو ندير؟؟
بسمة: نساليو هاد اللعبة اليوم قبل غدا؛.. ياله معايا دابا نجيبو لاكط و نمشيو نفكوو هاد الروينة؛ اليوم طلقني و نرجع لدارنا؛ مابقالي فين نزيد معاك..
انا: بسمة عافاك طلبي اي حاجة الا هادي..
بسمة: حتى لهنا و باراك بلا ماتزيد تصعبها أكثر، الغلطة ديالي انا لي آمنتك و تقت بيك و حليت قلبي و قلت اخيرا لقيت الإنسان لي يداوي جرحي من موت ختي، و يحل العقدة لي عندي من الرجال ساعة بحالك بحالهم كولكم ماتسواااوش..

انا: شنو؟؟؟ عاودي شنو قلتي؟؟ واش هدشي لي سمعت هو لي فهمت، زعمة حتى انت كاتبغيني كيما كانبغيك؟؟؟
جاوباتني بسمة و هي كاتغووت : بعد مني ما تستاهلش، هاد الاحساااس كبييير عليك، و انا بزااف علييك، انت عايش حياتك كلها فالوسخ مع بنات الليل يصحابليك الناس كاملين مسخين فحالك..
انا: لا ا بسمة عارف بلي كاينين بنات الناس..


انا: لا ا بسمة عارف بلي كاينين بنات الناس..
قطاعاتني وقالت: لا انت ماعارفش بلي كاينين بنات الناس، ماكيهمووهمش النزوات، كايهمهم غير ربي و والديهم..
ماعاارفش بلي كاينين بنات نقيات؛..
عارف غير الموسخاات اللي دايرين بيك.. حتى من سيكريتير عارفاك اش ساوي، و ملي شافتني يصحابليها انا وحدة من لي كا تقصر معاهم..
كون انا كنت بصح من داك النوع كون نهار دخلتي لبيتي و انا شبه عريانة قربتيلي وبستيني؛.. خليتك دير فيا مابغبتي و ندوز معاك الليلة و نقول اش فيها فالأول و الآخر هو راجلي والناس كاملين عارفين هدشي، ولكن لاااا صرفقتك وجريت عليك حيت لي بيني وبينك ورقة ماشي زواج ديال بصح لي يعطيك الحق تقربليا ك زوجة..

انا: سمحيليا على داك نهار؛.. ماكانش عليا نتصرف هكاك؛.. سمحيليا على كولشي، انت دابا معصبة؛ ياله نوصلك لدار، ترتاحي و من بعد نهدرو فهدشي..
بسمة: مابقاليا فاش نهدر معاك،لي عندي صافي قلتو..
انا: بسمة الله يهديك،.. 
بغيت نمسح الدموع من عينيها و بعدات عليا..
بسمة: خليتك مرة تمسح دمعتي، حيت يصحابلي راجل صدقتي..
انا: كملي قوليها انا شماتة مانسواش..
بسمة: ماغنقولهاش، غانخليك تقولها الراسك..

شيرات لطاكسي ومشاات؛.. انا نسيت الكونطاك الفوق ف البيرو،.. طلعت نجيبو، جات عندي سيكريتير.

سيكيرتير: موسيو يحيى، لي ديغيكتوغ ديال باركات چلوبال جاو وراهم فلاصال د غيونيو كايتسنناوك تجي باش تبداو الإجتماع..
ضطريت نمشي لاجتماع حيت هادي صفقة مهمة شهر و انا كانوجد ليها.. 

عقلي ماكاينش نهائيا بالي كولو مع بسمة: على الله تكون رجعات لدار و مامشاتش لشي بلاصة أخرى..


#الجزء_الثامن_A: 

من بعد ماخويت قلبي وقلت ليه كولشي، شديت طاكسي، وقلتلو يديني البحر؛.. يمكن تما نرتاح، يمكن هوا البحر ينسيني،..

وصلت تما وبقيت نبكي نبكي حتى تسالاو الدموع؛.. لقيت ايد صغيرة موسخة مادا ليا وردة بيضا..
تلفت لقيتها بنووتة صغيرة اية من الجمال، هازا الورد بيض و احمر كاتبيعو؛.. شفت فيها بإعجاب و تعجب،.. 
إعجاب حيت هبلاتني، و بتعجب علاش عطاتني وردة؟؟ وعلاش بيضا وماشي حمرا؟؟

انا: شكرا بزااف ا حبيبة، شنو سميتك؟؟
البنوتة: سميتي اية..
انا: سبحان الله، اسم على مسمى و انت فعلا اية من الجمال..
آية: انت لي عويناتك اية و حرام يبكيو هاكا..

انا دهشرااتني لسانها كاينقط عسسسل و مقطررر؛..
وليت كانضحك حتى ضراتني كرشي بالضحك..

آية: الله شحال جيتي زوينة و انت كاضحكي.. 
انا مدهشراني كيما العادة : آية فين تعلمتي هاد الهدرة؟؟
اية : شفت فيك وبدات كاطلع الهدرة غير بوحدها.. 
انا: هههههه عفيريتة، اجي عندي..
جريتها عنقتها..
آية: اش كاديري، راه غانوسخ ليك حوايجك؟؟
انا: و الا توسخووو چااع؟؟ غايتصبنو..
آية: انا غير هزيت ليك الهم لايضبغوو ..
انا: ههه و يضبغو انا بغيت نعنقك، غير انت الا مابغيتيش..
آية: كاين شي واحد كايبغي يعنقو القمر ويقوول لاا؟؟؟
انا: انت هي القمر 
و نزلت عليها ماح ماح..

سبحان الله، ربي صيفط ليا آية فالوقت المناسب، بحال الرحمة نساتني فكولشي، بحال إلا الحزن لي فقلبي مسحاتو وحطات فبلاصتووو فرحة، فرحة كبيييرة بزااف..
انا: علاش عطيتيني وردة بيضا وماشي حمرا؟؟
اية: ل 2 الأسباب 
انا: أما هوما؟؟
آية: اول سبب، كنتي كاتبكي حدا البحر، ولي كايبكي حدا البحر كايكون مجروح من الحب، و الأحمر كايدل على الحب، انت مامحتاجاش وردة حمرا تفكرك فيه محتاجة بيضا لووون السلااام،.. قررت نهديك سلاام دااخلي..
انا: اهااااه وشنو السبب التاني..
آية : السبب تاني الپوشيطة ديال التليفون ديال الرجاء العالمي، يعني الرجاوية ماتقبلش وردة حمرا 
انا: عفرييتة انت؛ فين كاتعرفي الحب و الجرح و السلام الداخلي؟؟؟
آية: الدنيااا، الدنيا كاتعلم لي مايتعلم..
انا: ههههه شحال فعمرك؟؟
آية: من الصباح و انت تسولي فيا، جات نوبتي ندير ليك لونكيط،..
انا:  تفضلي ا لالة..

وقفات تقادات معايا غوبشاات هزات حواجبها وقالت و هي مغلظة صوووتها...
آية : سميت مك؟ سميت باك؟ شحال فعمرك؟ وقت وقوع الجريمة فين كنتي بالضبط؟؟ ياله جاوبي..
انا تشتت بالضحك، وليت مجبدة فالرملة شادة كرشي، نضحك نضحك نضحك حتى بكيت بالضحك..
آية حتى هي طاحت حدايا وبداات تقلدني، صافي كملاات الباقي مابقيتش قادرة نحبس الضحك.

سطااااتني، فروحااااتني،.. 
دوزت معاها وقت واااعر، تغدينا بجووج ف ماكدوو، ظلام الحال؛.. 
آية: ناري انا تعطلت..
انا: فين كاتسكني؟؟ و علاش ماكتقرايش..
آية: عايشة مع بابا و مراتو، مكرفصة عليا بزااف، هي لي كاتخرجني لزنقة كاتقولي ماترجعي حتى تجيبي معاك 500 درهم، سرقيها ولا شوفي كيديري ليها؛..
انا: وباباك عارف هدشي؟؟
آية: اه عارف؛ اصلا بابا بحال إلا ميت مامسوقش ليا..
انا بقاات فيا بزااف،.. و اصلا وليت كانحمااق عليها.. قررت نديها معايا..
انا: اية شنو بان ليك تمشي معايا لدار؟؟
آية: ماكرهتش ولكن ملي رجع غدا غاتسلخني العقروشة سلخة ديال الكلاب.. مافي لي ياكولها تاني باراك غير الحرقة لي حرقاتني البارح..
انا: شنو انشووف..
وراتها ليا، بكييت،.

انا: واش هادي حيواان ماكتحسش؟؟؟ ياله انت غاتمشي معايا وغاتبقاي معايا، اش بان ليك تعيشي معايا؟؟
آية غاطير من الفرحة : بصاااح؟؟ غاتديني معاك؟؟ ماتخلينيش، ماغيجيش نهار وتهربي فيه عليا بحال ماما؟؟ ماغتخلايش عليا.. 
بدات كاتبكي و انا كانبكي معاها،..
انا: لاااا عمري نتخلا عليك،.. مشينا؟؟
آية عينيها لمعو كانت غاطير بالفرحة : آه نمشي..
شديت طاكسي ورجعت لدار؛.. لقيت يحيى كايتسناني..
يحيى ( كايغووت) : فين كنتي خلعتيني عليك؟؟
انا: ماشي وقت الهدرة انا ماجيتش بوحدي، جبت معايا الضياف،..
يحيى: شكون هاد الضياف؟؟؟
انا: آية حبيبة، دوخلي..
دخلات مهبطة راسها، خايفة من يحيى؛..
انا: اية ماتخافيش..
يحيى: شكوون هاد المتشردة..
انا: هادي سميتها اية ماشي متشردة؛.. و غاتعيش معانا هنا..
يحيى: لاااا مستحيل هدشي..
انا: ياك قولتي طلبي لي بغيتي، و مستاعد دير اي حاجة باش نسامحك، ايوا هذا شرطي الوحيييد باش نسامحك؛..


#الجزء_الثامن_B: 

رجعت لدار مع 17h مالقيتش بسمة؛.. جلست هاد المرة فالدار و تسنيتها حتى و كان ترجع على خاطرها؛.. ولكن تعطلات و بدييت نكعاا.. غير رجعات ماشعرتش بديت نغوت عليها.. حتى قالتلي جايين معاها الضيااف..

فاش شفت شكون هاد الضيااف، تصدمت؛..
جايبة ليا متشردة من الزنقة، موسخة،.. و قالت ليك تعيش معانا، لا وماشي غير هدشي شداتني من دراعي و لي كايضرني من الفوق..

انا: بسمة مشكلتنا بوحدها، و هاد البنت بوحدها مادخليش شي فشي...
بسمة: انا اصلا كنت عوالة نرجع لدارنا اليوم قبل غدا؛ كون ماشفتش آية كون والله لا شفتي وجهي هنا..
انا: بسمة انت كاديري هدشي ايكسپري..
بسمة: لي عندي ا يحيى قولتو، إلا بغيتيني نكمل معاك فهاد اللعبة شرطي هو هذا، دابا تجاوب.. الا اه مرحبا.. إلا لا نخرج انا وياها دابا نييت..
انا: بسمة عافاك كبري عقلك، هادي ماعرفنا أصلها من فصلها، و شكون عرف تكون مع شي عصابة، ولا يجيو يقولو خطفناها نوحلو فشي مشكيل..
بسمة: اية انا متأكدة منها غير رتاح، البنت ضروفها خايبة مرات باها كاتعدا عليها بالضرب و كاتصيفطها لزنقة تچريسي، و اية واخا صغيرة بعقلها مابغاتش تشفر خدامة كاتبيع الورد و فالعشيا كاتدي الفلوس لمرت باها وهدشي كولو غير باش تلقى فين تبات..
يحيى: بالطبيعة الحال هاد الهدرة عاودتها ليك هي و انت تيقتيها..
بسمة: ااااه تيقتها، حيت عينيها باين عليهم الصدق، حيت اية بحال ملااااك..
اية اية فينك..
ملي كنا كانهدرو اية تسلتات وهربات..
بسمة: صااافي هدشي لي بغيتي، هالبنت مشات يعلم الله فين غاتمشي و اللييل هذا، واش انت ماترحم ماتخلي رحمة ربي تنزل..
و مشات بسمة كاتجري، باش تقلب عليها، تبعتها انا،.. 
انا: بسمة فين غدا الليل هذا؟؟
بسمة: ليل غير عليك و عليا، اما أية لاااا بنت صغيررة مارحمتيهاش حراام عليك..
انا: فين غادة؟..
بسمة: تفرق بعد مني غادا نقلب عليها، و انت لي بيناتنا صافي تسالى قبل حتى مايبدا، انا كرهتك..
انا: بسمة عافاك ماتقوليش هاكا، انا غانقلب معاك عليها ومايكون غير خاطرك.. تسنايني انا نجيب طومبيل.. انت سولي كونسييج منين دازت...

مشيت جبت طومبيل و تبعناها من الاتجاه لي نعت لينا الكونسيييج؛ والووو مالقيناهاش تقووول الأرض تشقااات و بلعاتها...
ساعتين وحنا نقلبو مشينا حتى كورنيش عين دياب فين تلاقاتها مالقيناهش.. و رجعنا لدار، بسمة كاتبكي ماحاملاااش تشوف فيا..

انا: مافهمتش سبب تعلقك بهاد البنت..
بسمة: حيت انت ماشي انسان طبيعي كايحس بالناس و باوجاعهم كون كنتي بحال الناس كون فهمتي علااش؟؟
انا: بسمة عافااك انا ماشي خايب لهاد الدرجة ..

انا: بسمة عافااك انا ماشي خايب لهاد الدرجة ..
بسمة: انت خايب أكثر من هاد الدرجة كثر ماكتتخيل...
انا: شوفي كانواعدك غدا نقلب عليها ونجيبها حتى لعندك، غير سيري ترتاحي عافاك...
بسمة: لي سمعك هاز ليا الهم دابا مايتيقش هو هذا الصباح لي كان كايهيني فعرضي و فشرفي، لي شاف الحنانة و الخوف لي نازلين عليك دابا مايقولش هو هذا لي مارحمش طفلة بريئة و جرحها حتى هي، انت مايمكنش تكون طبيعي.. 
( مدااات ليا التليفووون) و قالت : هااااك شوووف.. 
شديتو شفت كريشة اية محروقة و ملتاهبة، رجيلاتها و ايديها عامرين سيكاطريس د الحرييق..

انا مصدوم بقات فيا : شنو هدشي؟؟
بسمة: هدشي لي كاتعااني منو بسمة كولا نهار، إلا مادخلاتش فايديها 500 درهم.. و اليوم غاترجع و غاتعدبها مرات باها بسبابي انا حيت ماخدماتش، حيت فاش شافتني كانبكي نساات همها هي و نسات اش كايتسناها إلا ماباعتش الورد و جات لعندي تواسيني.. جات بحال رحمة ربي نساااااتني فكولشي، بفضلها هي دوزت اسعد يووم فحياتي.. و كاتقول عليها انت متشردة موسخة، هاد الموسخة حسن منك و حسن من ألف بحالك لي نقايا و كايشعلو لكن الحقيقة لداخل ديالهم كحل من كوستيم لي لابسين..

مشات لبيتها، و بقات الهدرة د بسمة الضوور ليا فراسي، فعلا التصاور لي وراتني كايبنو بلي هاد البنت الصغير هي مسكينة مظلومة فهاد المجتمع، و الدليل على حسن نيتها فاش سمعتني مابغيتهاش تبقى معانا انساحبات بلا حس..

بقات فيا اية، بقيت نقلب تصاور لي فتليفون بسمة، شفت تصاور لي تصوراتهم اليوم هي و آية، كايبانووا بجوجات بحال الملائكة، فرحاناااات، ركزت فلامح بسمة فعلا فرحانة بزااف، انا الصباح جرحتها و اية دااوتها، انا فعلا غلطت فاش قسيت على ديك البنت، شفت تصاور اية حسيت بيها بحال بسمة نفس الملامح البريئة، و قررت نقلب عليها و نصلح غلطي، اولا باش نراضي بسمة؛ ثانيا باش نعتق البنت، و ثالثا باش نرييح ضميري،.. مالي على هاد القسوة كوللها فين غادي؟ الدنيا اش فيها چااع من غير العمل الصالح،..

شديت تصاور اية صيفطتهم لتليفوني باش غدا نقلب عليها و مانجي حتى نلقاها...


#الجزء_التاسع_B:

من بعد ماخرجات اية من لاكلينيك، ديناها معانا لدار، تعلقت ب اية بلا قياس،..
هي بصح عمرها 9 سنين ولكن ناضية ماشاء الله كاتفهم فكولشي، سجلتها ف ايكوول بعد صعوبة كبيرة و بطبيعة الحال المعارف ليهم دور كبير دخلتها للمستوى ديال قرانها؛.. و جبت ليها أستاذة خاصة لدار باش تعلمها داكشي لي ضاع منها و تقدر تريكيپيري، بمساعدة ديال بسمة و الأستاذة ديالها ما شاء الله قدرات تأقلم فليكوول بحال إلا من صغرها وهي كاتقرا..
دكية بزااف ودغيا ك تستوعب... و الذكاء ديالها ماشي غير هنا فكولشي، فاهمة ف مور الحياة كأنها فايتة 20 عام.. 
جات عندي
اية: واش ا صاحبي ماغديش ترجل؟؟
انا: كيفاش مانترجلش بنت ليك سميتي اية؟؟
اية: انت كاتبغي ماما بسمة بزااف، ( ولات تقولها ماما وفعلا بسمة كاتعاملها بحال بنتها) و هدشي باين على عينيك، مافهمتش علاش صابر حتى لدابا؟ علاش ماصارحتيهاش ورجعتو زواجكم زواج حقيقي؟؟
انا: هاد الهدرة ديال الكبار، و انت آ لعفريتة فين تعلمتي هدشي كامل..
آية: لااااا دانا مدرسة 
انا:  ههههه عليميني يا شيخة 😂
اية: شوف من الاخر طلقونا خلاص بغيت شي بيبي يونسني كلشي عندو خوتو إلا أنا 😭
انا (😮 مدهشر) : لا لا انت بزااف انت متأكدة عندك 9 سنين..
اية: لا
انا: كنت شااك فهادشي، غير چري شحال عندك؟
اية: 9 سنين و 5 شهور 
انا: هههه هبيلة، اجي لهنا..

عنقتها وبقيت نبوووس فيها، العفريتة عندها الحق حيت جا الوقت لي نصارحها فيه و يولي زواجنا حقيقي؛ و زيدون تال امتى غانبقاو على هاد الحال؟؟ بجوجنا كانبغيو بعضياتنا، و بجوجنا خاصنا نكونو أسرة و نجيبو وليدات، و بطبيعة الحال معزة اية ماغاداش تنقص حيت فعلا كانحسووها بحال الا كانت بنتنا..
انا: شوفي عندك الحق، و لكن عندي شرط
اية: ايهاي هاي كاتشرط.. قول اماهو؟؟
انا: هههه بغيتك تقوليلي بابا كيما كاتقولي لبسمة ماما..
آية: كاتغييير  بابا يحيى كانموت علييك، ياله طلقنا لفراجة..
انا:جنية طالعة منك هاد كلمة بابا بحال العسل..
آية: و مقطرررر 😂
دخلات بسمة لصالون، 
بسمة: اش كاتوشوشو تما..
انا: والو لقيتني كانفكر، شحال ماخرجنا.. اليوم عارض عليكم العشا، وجدو راسكم بالليل نسالي الخدمة و ندوز عليكم نديكم..
آية : يعييش بابا يعيش..
بسمة: ههههه صافي واخا..

مشيت للخدمة، بغيت نقول مشيت نوجد لبلان لي ناوي؛ 😉
حجزت ريسطو كولها للعشا، وصيتهم يتكلفو بيها، الورد و الشموع و الحالة.. الرومنسية وداكشي..
خرجت شريت حوايج يليقو بمقام الحدث.. و خواتم جداد، حيت لي شرينا فالعرس عمرنا درناهم،..

وصلات الوقيتة، صيفطت الشيفور بجيبهم و انا مشيت لريسطو نتسناهم..
وصلو صاحبات السمو الملكي الاميرات لالة بسمة و لالة آية.. كانت بسمة لابسة غوووب بلوون طوييلة بلا كمام،.. دايرة مشيطة، مع موالفا طلقو، اليوم فاش جامعة شعرها بان عنقها طوييل، جات بحال ليپرنسيس، هبلاااتني،..
غمزاتني اية العفريتة غاتكون هي لي قنعاتها تلبس لبلون ماتفوتهاش شي حاجة بحال هادي..

مشيت تلقيت ليهم، مديت لبسمة ايدي، عطاتني ايدها بستها،.. و حتى اية حتى هي باش مايبقاش فيها الحال..
بسمة متفاجئة؛.. 
بسمة: شنو هدشي كولو؟؟
انا: هدشي كولو على قبلك، تفضلو
جريت لبسمة لكرسي باش تجلس،..
بسمة: يحيى مافهمتش علاش حاجز ريسطو كولها؟؟
يحيى: تسمحيلي بهاد الرقصة ؟؟
بسمة: ماكنعرفش 😔
(( تبا جنس كايعرف غير لدردك عاود دردك 
يحيى : انا نعلمك 😉
قربتها ليا، أو بالأحرى لصقتها مع صدري، 
وبديت نهمس ليها، خطوة لور زوج لقدام، زعمة كانعلمها ترقص.. اية كاتفيلمي فينا كيما تافقت معاها بغيت هاد اللقطة تبقى عندنا،..
شوية همست ليها،..
انا: تال امتى ا حبيبة غانبقاو هاكا؟؟
بسمة تزنچاات؛..
هبطت على ركابية، جبدت الخاتم بسمة تقبلي تكوني مراتي؟؟؟
بسمة متفاجئة،..
انا: بسمة جاوبيني تقبلي تكوني مراتي ؟؟
بسمة مرفوعة من هاد العالم : لااا لا سمحليا و خرجات..
انا بقيت مصدوووم علاااش؟؟ علاااش مابغاتش، حسيت بحال إلا غرزت فيا موس فقلبي، شنو زعمة ماكتبغينيش، ولكن عينيها كايقولو العكس..
علاااش ا بسمة علااش؟؟


#الجزء_التاسع_A: 

ماتيقش بلي يحيى ماحنش حتى ف بنيييتة صغيرة بريئة الزمان قاهرها، ماماها ماقداتش على الفقر و العيشا فالكاريان، هربات وخلاتها مع باها ماحناتش فيها، مسكينة من صغرها كاتعاني، تحرمات من حب و حنان ام ماتسواش، ماتستاهلش تكون ام لبنت كاتهبل بحال اية، الزين الذكاء و الطيبة؛.. 
باها حتى هو تزوج بمرا صدقات ماكتولدش، فبلاصة ماتعوض حرمانها من هاد النعمة ب اية، كاتنتاقم منها كأنها هي السبب،.. مجتمع معاااق بهمجيتوووو كل واحد كايفكر غييير فراسووو و فمصلااحتو، اما اللوخرين طز فيهم ماشي مهم يكونو صغار، و لا كبار!! يستاهلو ولا أبرياء!!.. يعيشوو و لا يموتووو مايهمش.. الأهم هو الأنا الأعلى !!!

كرهت العيشا فمجتمع كيما مجتمعنا، القوي يحچر على الضعيف، قانون الغابة لي خداااام... كلشي ولا همجي، كلشي قاسي، كلشي اناني،.. حتى واحد مايفكر ف الاخر.. ماكاين غير عفططط...

ضرني قلبي بزااااف، و تحركووو عليا چااااع المواجيع، القديم و جديد بداية من موت ختي، لجرح يحيى ليا، لفقدان اية، من بعد مالقيت معاها الآمان الداخلي، لي فقدتووو هادي سنييين،.. 
علم الله بحالها، واش وصلات لدارهم ولا لا؟؟ واش مغطية ولا بردانة؟؟؟ واش واكلة ولا جيعانة؟؟ واش وصلت ونعسات ورتاحت؟؟ ولا ضرباتها تاني ديك الكافرة لي ماكتخافش من الله؟؟

ماجانيش النعاس نهائيا بقات بين عين ملامح اية، ضحكتها، هدرتها، كلشي فيها كايبان قدام عيني مانعست ماشفتووو هاديك الليلة،..
قررت غير يطلع الصباح، غير يبان خيط من خيوط ضو ربي، نخرج نقلب عليها..
ديك الليلة دوزتها فالصلاة دعيت ربي يجمعني بيها؛ و تكوون بخير..
ياربي تحميها، ياربي تقوم بيها، ياربي انت احن و ارحم مني عليها، ياربي ماتضربهاش مرات باها ياربي حميها منها،.. ياربي نلقاها و نرجعها معايا،.. ياربي انت وعدتينا و وعدك حق، قلت لينا ندعيوك و فالمقابل وعدتينا بالاجابة، ياربي ماتخذلنيش يارب انت اعلم مني بحالها، هي غير طفلة بريئة بغيت ننقدها ياربي ترجعها ليا...

غير طلع الفجر صليت و لبست و خرجت نقلب عليها؛.. شي 3 سوايع وانا نقلب والوو؛..
تفو يحيى كايصوني اش بغا؟؟

انا: اشنوووو باغي؟
يحيى : فقت مالقيتكش، فينك؟
انا: وااش سوقك؟؟؟
يحيى: بسمة عافاك جاوبيني فينك..
انا: خرجت نقلب على آية..
يحيى: فينك أنا نجي لعندك نقلبو عليها بجوج، راه اصلا كنت ناوي نقلب عليها..
انا: بلاش ماكاين لاش، نقلب عليها بوحدي..

طفيت تليفون، و بقيت نقلب عليها، والو مالقيتهاش،.. سولت عليها فين لقيتها، قالولي إلا غبرات غاتكون واكلة شي سلخة جديدة من عند مرت باها، سولت عليها فين ساكنة حتى واحد ماعرف..
نهار كولو و انا نقلب عليها بلا فايدة، مالقيتهاش.. كنت غانهبل و زدت خفت عليها اكثر، انا السباب هاد السلخة؛..
رجعت لدار، كان يحيى ماكاينش، رجع مورا مارجعت بشي ساعة؛ جا دق عليا فبيتي..
يحيى: بسمة نهار كامل مخلي خدمتي وكانقلب عليها مالقيتهاش، راني كلفت شي رجال يقلبو عليها، غايقلبووو كازا كولها، كانواعدك غادي نلقاها، عطيتهم تصويرتها..
انا تفرچعت بالبكا، جا يحيى عنقتي؛ و وعدني بلي ماغيرتاااح حتى يلقاها..
فعلا كلف شي رجال، ماخلاااو فين قلبووو عليها.. حتى من تصويرتها طبعوها وفرقوها على ناس و لي عندو شي معلومة توصلنا ليها ياخد 2000 درهم مكافأة؛.. 
15 يوم دازت، كل نهار كايجيونا بزاااف مكالمات كلهم كايكدبوو.. تا عيطات واحد انفيرميي فسبيطار ديال المخزن، قالت بلي البنت لقاوها محروقة و مليوحة فالزنقة..
مشينا لعندها كانجريو.. أخيرا لقيناها..
غير هي حالتها حالة عدوك و ماتبغيهالووو..
تكلف يحيا داها لا كلينك.. نهار على نهار اية كاتحسن، وحتى علاقتي انا و يحيى كاتحسن،..
دوزاات شهر كولووو ف لاكلينيك تعالجات الحمد لله ولاات بخير..
يحيى تعلق بزااااف ب اية ولا كايهبل عليها، بالطبيعة الحال ماشي قدي. .
اليوم اية غاتخرج و فاتمشي معانا لدار، يحيى شرا ليها بزاااف د الحوايج.. لبسناها لبيسة من ليشرا ليها و ديناها لدار..

بالنسبة لمرات باها ديكلارينا بيها عند البوليس، و باها وافق تعيش معانا اية فالمقابل يعطيه يحيى شي براكة ديال الفلوس،.. فعلا هدشي لي كان..

اليوم عارض علينا يحيى لعشا انا و اية على برا.. حنا دابااا لابسيين كانتسناو فيه يجي باش نخرجو..


#الجزء_الاخير :

مافهمتش علاش ماجاش يحيى يدينا كيما قال، وصيفط لينا الشيفور، ولكن ماشي مشكيل، غانلقاوه كايتسنانا فريسطو..
مع كي وصلت، الصقيل، و الحس مقطوع، بحال إلا خاوية الدنيا من بنادم؛..
دخلت و انا نتصدم، فعلا خاوية من بنادم، فيها غير يحيى،.. الضواو مطفين كاين غير ضو الشمووع، خدامة موسيقى كلاسيكية؛.. و الدنيا كلها مفرشة بالورد مافهمت تا لعبة..
يحيى مبدل ماشي هوما هادو الحوايج لي خرج بيهم الصباح!!
جا عندنا باس لي يدي، و باس حتى ل آية ايدها..
جرلي كرسي جلست،..
هدشي بزاف عليا ماقادراش نستوعب، كانشوفو غير ف الأفلام؛.. راه مايمكنش هدشي يكون حقيقة و كانعيشو انا؛ انا يا اما كنحلم يا اما كنحلم وحدة من زوج؛..
شوية يحيى قالي نرقص معاه، اويلي شي أحد يقرصني.. بدينا كانرقصو، كنت قريبة ليه بزاف، لدرجة انفاسو تخلطو بانفاسي، قلبي ولا كايضرب، شوية همس ليا فودني تال امتى ا حبيبة غانبقاو هاكا؟؟
لا لا هنا طلعاتني السخانة، كاميرا كاشي هادي مافيهاش..
اويلي اش هدشي، يحيى تحنى على ركابيه وطلبني لزواج صااافي تبنجت انا شداتني اللقوة هو كايسول فيا و يعاود..
ماعرفتش كيفاش قلتلو لا وخرجت برا؛..

😇: اش درتي ابسمة؟؟ علاش قولتيلو لا؟؟ ياك كاتبغيه ومن شحال هادي كاتسنايه يدير هاد الخطووة؟؟

: اشمن حب ولا زواج ولا بعر، نسيتي ماداز على اختك؟؟ نسيتي شحال تعدبات؟؟ نسيتي هاد يحيى شنو قال ليك نهار الأول و شنو قال ليك داك نهار انت بنت الليل، و انتاقمك فين هو فين خلتيه؟؟

: انتقام واش من نيتك، اش دارر ليك بسلامة، من نهار عرفتيه، تبدلات حياتك 100% ؛ شوفي شنو دار على قبلك قبل اية تعيش معاكم، و دار بزااف الحوايج على قبلها أو بالأحرى على قبلك انت باش تكوني فرحانة، اي حاجة كاتفرحك كايديرها بلا مايتردد، شنو باغا اكثر، البنات كاملين كايتمناو ربع هدشي لي انت فيه و مالقاوه و انت كاتعفري!!

جات عندي آية.

اية: اشنو كاديري ا ماما؟؟ علاش قولتيلو لا؟ علاش كاتعدبي راسك و تعدبيه؟ 
انا:( الصمت)..
اية: ماما عافاااك ماتدريش فراسك هاد الحالة، اهئ اهئ انا بغيت نشوفكم بزوج بحال اي زوج مزوجين ماشي كل واحد عايش فبيت و انتوما ربي لي عالم بيكم ماضيعيش بابا و مواضيعيش راسك..

شفت فيها و ضحكت هاد البنت صغيرة لكن عقلها يوزن بلاد، شي مرات كانحسها فعلا بنتي، شي مرات كانحسها صاحبتي لي كاتفهمني بلا حتى مانهدر غير تشوف فعيني تحس بيا و بلي بيا..
عنقتها و قلت ليها: اية انت نعمة من عند الله..
اية: انتوما لي نعمة، كون ماشي انتوما كون راني ميتة..
انا: ماتقوليش هاكا، ماتصوريش وجودك فحياتنا شحال مفرحنا..
اية: ها أنت قولتيها حياتكم، انت و بابا يحيى مخلوقين لبعضياتكم.. ياله سربي عتقي الموقف..


مشيت رجعت لقيت يحيى باغي يخرج، قلتلو يحيى انا موافقة..
يحيى: انا مابقيتش باغي..
بحال إلا صرفقني،.. شوية تلاح عليا عنقني، يحيى: مانقدرش آ لحمقة راني غير ضحكت معاك باش تحسي باش حسيت..
دارت بيك الدنيا ياك؟؟
انا ضربتووو و عنقتووو بجهد،.. أما اية كاتفيلمي فينا، و كاتعلق..
اية: و هكذا سيداتي سادتي تزوج العشاق من جديد  و رجع مارياج بلونش ل حقيقة 😉

رجعنا لدار؛ دخلت لبيتي ياله بغيت نبدل وجا يحيى،.. 
يحيى:اختاري دابا يا انا نتحول عندك يا انت تحولي عندي 😉
انا: لا لا بقا ف بيتك و نبقى فبيتي، عرفتي خلينا خوت حسن،..😂
يحيى: والله احبيبة لا فلتي منها اليوم،..
ولا عرفتي شنو انا اصلا موجد كلشي..
انا: كيفاش مافهمتش! !
يحيى: عرفتك غاتزربي عليا، داكشي علاش غانزرب عليك.. عيطت لاستاذة ديال اية تبات معاها هاد الليلة، حيت حنا غانخرجو..
انا: شنو فين غانمشيو؟؟
يحيى: حتى تشوفي بعينيك،.. اه هاهي جات صوت تسرسير..
حلات اية الباب، خرجنا لكولوار..
يحيى: سمحيلينا بزاف برزطناك معانا، ولكن معروضين على برا و مانقدروش نخليو اية بوحدها..
الاستاذة: لا لا ماشي مشكيل..
جرني يحيى من ايدي وخرجني، 
انا: بلاتي نهز صاكي..
يحيى: ماعندك ماديري بيه..
انا: ياله نجيب غير تليفوني..
يحيى: حتى هو ماعندك ماديري بيه، هاد الليلة خاصك غير انا 😉
داني يحيى لأوطيل..
انا: شنو جينا نديرو هنا؟؟
يحيى: زعمة ماعارفاش..
انا ( عارفة راسي الليلة نولي مادام) : لا ماعارفاش..
يحيى: نوصلوو و تعرفي..
دخلنا لسوويت وااااعر ديال بصح، و اصلا الاوطيل وااااعر بلا قياس، دخلت شومبر لقيتو عامر بالورد و الشموع...
جو رومانسي نيت..
عرفت بلي صافي وصلات الوقيتة نعطيه حقوقو الزوجية و زايدون راه حتى انا كنبغيه؛.. قلتلو بلاتي خليك هنا، سديت عليا فالشومبر دوشت لقيت بزاف لي پرودوي تهليت فراسي، حتى من البارفام ديالي جابووو لعفريت، و انا شحال قلبت عليه قبيلة.. لبست داكشي لي كايلبسو النسا ههه، و درت مايكاب خفيف.. و و و 

و صافي باراك عليكم باقي التفاصيل راكم عارفينها ماتسناونيش نعاود ليكم راه اصلا حرااام 😂

دابا تزاد عندنا ولد سميناه إسلام.. و هاكا ولاو عندنا اية و اسلام؛.. زينة حياتنا..
أنا و يحيى فرحانين، بحال چاع الناس مرة مناچرين مرة سمن على عسل، و الحب بيناتنا زاااد كبر وبلا قياس،.. 

نصيحتي ليكم ماعمركم تخليو تجارب الناس الآخرين الفاشلة تأثر على حياتكم، واخا يكونو أقرب الناس ليكم، ماتسدووش بيبانكم لمجرد تجربة خوك أو ختك ولا صاحبتك فشلاات، اولى تجربة قديمة فشلااات، حيت كيما الناس ماشي بحال بحال، حتى القصص ماشي بحال بحال، و العلاقات ماشي بحال بحال، و حتى التجارب ديالك ماشي بحال بحال،..
كل واحد فهاد الدنيا كايعيش بطريقتو، كايفكر بطريقتو، و كايبغي بطريقتو؛.. حتى كايتلاقى بالإنسان لي كايكملووو و لي كايفهموو بحال حبيبي يحيى الله يخليه ليا 
النهاية