نتا ليا عمرها تفرح بيك الجزء الرابع

نتا ليا عمرها تفرح بيك الجزء الرابع

الام:: غزلان نوضي جيبي ل خالتك عصير ف تلاجة عاد درتو يكون برد
(مشيت لكوزينة وبلا منحس بديت نبكي تفكرت هاد خالتي شريرة بنتها اش دارت فيا هادي 5 سنين كان يسكن حدا جدتي واحد الولد سميتو عماد كنا كامل بنات العائلة كنحماقو عليه ملي كنا صغار كنمشيو عند جدة غي باش نشوفوه و لعبو معاه عروسة عريس هه كنا كندابزو ديما عليه شكون تكون عروسة ديال عماد وهو دائما كان يختارني وكبرنا ولعبة تحولت لحقيقة وعماد بعد ما مشا المانيا ودار مستقبل رجع وخطبني كنت اسعد انسانة على وجه الارض ولاكن الفرحة مكملتش..
...عمرها تفرح بيك...نتا ليا اناا
من بعد ما خطبني ودرنا لملاك و ركبنا خواتم كنا مفاهمين على كلشي و كنستنى صيف يجي باش نديرو العرس و ف نهار جات مو عندنا انا شفتها حسيت كاين شي حاجة حيت عماد سيمانة مصوناش كنعيط ليه تلفون مطفي كنت كنقول يمكن الخدمة ولا شي حاجة نصبر منخلعش دارهم و دارنا حتى يبان عليه خبر و سكت حتى جات مو و قالت لماما سمحولينا مغديش عماد يكمل مع بنتكم بنتكم غا تبقى عندكم مكتابش نكملو انا مفهمت والو بغيتها تفهمني علاش اش وقع شنو سبب؛؟؟ قالت معنديش جواب هادي رغبة ديال عماد بقيت شهر وانا مريضة و كنبكي و باغيا نعرف غي سبب حتى واحد نهار دخلت فيس نشوف لقيتو مبلوكيني و بقيت نقلب ومع انا محقق كوناان بقيت نخبش ف فيس ديال عماد لي دخلت ليه من فيس جديد ولقيت عندو واحد فيس مغريبش عليا و تفكرت سوسن واحد نهار طلبت مني نفتح ليها كونط جديد تبقى ضحك بيه على بنات يكون بااسم دري هنا دخلني شك و بغيت نحل هاد فيس تلفلي ل ايميل باش فتحتو ليها و بقيت نحبش و نبش حتى لقيت لحنش ههه جربت جميع الايمايلات

وشوية تفكرت الكلمة الاولى من الايميل و كتبتها خرجلي حيت كان enregistrer تما و مودباس كنت عاقلة عليه دخلت و مشيت ل ميساجات لقيتها مسيفطا ل عماد ميساج فيه سلام خويا انا حبيب غزلان و راه كنبغيو بعضياتنا الى كنتي راجل بعد منها راه هي ناوية تزوج بيك دير لوراق و ترجع عندي ويلا متقتش شوف تصاور راه كنتلاقاو مزال رد عليه عماد قالو يمكن يكونو عندك تصاور قداام قبل منخطب غزلان انا منحكمش على غزلان من تصاور قداام واصلا مفيهم حتى حاجة عاديين 2 كالسين ف كافي عادي بنت لفعة لي دايرة راسها ولد مخططة مزيان هي تجاوبو شوف اش لابسة غادي تعرف بلي كنتلاقاو مور الخطوبة وانا ف الصورة لابسة كسوة عماد سيفطهالي مع ختو من جات من المانيا هنا عماد مرجعش جاوبو غتقولو اوا اش داك تخرجي مع شي واحد و نتي مخطوبة غنجاوبكم متيقوش حتى ف بنات الخوالات راه حتى واحد ميبغيلك الخير لفعة ديال سوسن كانت ميتة بالغيرة حيت عماد خطبني انا و معبرهاش خططت و نفدت خطتها ب كل برودة قبل ماعماد يسمح فيا ب10ايام جات سوسن لدار تزاوك فيا نخرج معاها تلاقا مع واحد دري عاد تعرفت عليه و خايفة تخرج بحدها معاد و بغاتني نشوفو باش نقولها واش زين و بقات شادا فيا وتزارك و بحكم انني بهلولة و دمدومة فيا غي بلا بلا بدون فائدة وافقت و انا كلبس حوايجي جات لسقتني و بقات هي تلبسني قاتلك باش نبان زينة كتبغيلي لخير قاتلي لبسي كسوة ديال عماد جديدة كتجيك غزالة تهبلي فيها لبستها انا و مشيت معاها كلسنا ف كافي فعلا جا دري متعرفة عليه مسكين هو ما فراسو والو عادي كنهضرو و هو بنيتو كيقولي عجباتني بنت خالتك شوية ناضت لفعة تمشي قاتلك طواليت تما خدمت شغل يديها و صورتنا انا وياه واخا ديك الكلسة كانت بريئة و مفيها حتى شي حاجة لي تسيئ ل عماد حيت هي مشات و حنا بقينا ساكتين حتى جات ولاكن هي كانت مخططة ل هاد شي ومن مور معرفت مرضت كتر حيت تقت فيها و غدراتني و هي اقرب ناس ليا كنا صحابات ناض صدااع كبير فضحتها ف العائلة كاملة و عام والعائلة ديالي مكتهضرش معاهم كاملين ولاكن ماما و خالتي رجعو يهضرو حيت خواتات و لي صرا تنسا بالنسبة ليهم اما انا عمري نسا اش دارت فيا و لحد الان مكنهضرش معاها و حتى عرسها مغنحضرش ليه واخا واحد راس كيقولي ندير فيها بحال لي دارتلي ولاكن انا ماشي بحالها دعيتها لله و وكلت امري ليه هو يجيبلي حقي منها الحمد الله على كل حال اصلا لوكان كنت تزوجت عماد كاع منشوف ونبغي نبيل نهار شفت نبيل عاد عرفت شنو هو الحب اما عماد كان غ عناد ديال بنات الخوالات زعمة انا الواعرة ديتولكم مكان لا حب لا زعتر الحووب هو نبيل احياني ماما كتغوت نسيت العصير تشرب فيه السم انمسح عينيا و نديلها تشرب لعصير و نبدل حوايجي نمشي عند سوسو نبرزطها شوية )
سهام:: جيتي كنت عارفاك غادي تصبحي عليا داك شي علاش لعبت خفيف و هضرت مع عبدو قبل متجي ديريلي الارارا غزلان:: حلفي با الله حتى هضرتي مع عبدو اش قلتيلو و شنو قاليك و كيعرف نبيل من امتى وفين و ..
سهام:: او اووو ا بلاتي عليك لا زربة على صلاح اجي دخلي كوزينة سخني صبيعاتك و عاونيني فل غدا و نحكيلك و حنا كنطيبو

غزلان؛: شناهواااا باغا تستغليني ماشي حشومة عليك وا هضري دغيا خلينا من خدمة ديال ماما دخلي لكوزينة باش نعطيك فلوس سيمانة ديالك ديريلي دابا بحالها حيت عارفة نقطة ضعفي نبيل جاب الله ماما معرفاش ما لوكان راني عايشة فل كوزينة صباح و ليل
سهام:: هاهاهاها اوا دخلي دابا لكوزينة و لا نمشي عند خالتي عتيقة نقولها على نبيل
غزلان:: كتهدديدني ياك واخا هاني داخلة بصح الى جاكم تسمم نتي المسؤولة
سهام:: عارفاك حادكة لهذا غنعطيك تقطعيلي غ الخضرة حيت مزال باغين نعيشو هههه
غزلان:: بزعطة عليك انا نطيبك نتي نيت ياك ما حسابك انا فنيانة راه غ حيت مكنبغيش ناكل داك تخربيق لي كتكلوه داك شي علاش مكنبغيش نطيب حيت منحتاجوش لاش نطيب لحريرة و كسكسو و مسمن طاجين و ... وانا اصلا مكنكلهمش
سهام:: اوا نهار تزوجي شنو تقولي ل راجلك مين يقوليك بقيت كسكسو ولا حريرة تجاوبيه سمحليا مكنكلش هاد شي
غزلان:: اولا نبيل كااع مكياكل هاد شي هو قالي بعني ل كوتر بلي مكنبغيش ماكلة ديال دار نبغي غي حاجة خفيفة بحال بيتزا كراتان بانيني سقايط...
سهام:: مدخلالي نبيل حتى فالماكلة ويلا متزوجتيش هاد سي نبيل اش ديري مع راجل لي غيديك توكليه شيكولا و شيبس
غزلان:: شوفي نتي بلا زيادة ف الهضرة انا نبيل هو لي ندي من غيرو منتزوجش
سهام:: وا سيري يا ديك لهبيلة تعلمي دخلي كوزينة راك زدتي فيه هي لي غتنفعك
غزلان:: خليني عليك دخلت ليها قبل منك و تعلمت ندير كلشي على ود رجل و ف لخر سمح فيا بلا ميقولي حتى كلمة و لا يسمع مني ولا يستفسر اش صرا تيق تصاور انا حلفت ولد مرا منطيب ليه ولا نتعلم على ودو لحاجة لي ناكلها و تعجبني انا هي لي غنطيبها و نتعلم ليها
سهام:: يلاه يلاه و نتي متقضايش خدامة 24 سير 24 دخلي نقيلي غ خضرة
غزلان:: واخا الالة نعاونك و حكيلي ب تفاصيل اش قاليك عبدو على نبيل
سهام:: يلاه هاكي نقي هاد الخضرة و انا نصب الغدا و نحكيلك ..
صباح عيط ليا عبدو باش يعلمني نتعشاو ب2 و هضرة تجيب هضرة تفكرك هو و قالي غزلان منوياش تزوج
غزلان:: حتى هو عديتووه كتحسسوني بلي زواج هو الحياة صافي انا عايشة تزوجت ولا لا و انا الى مديتش نبيل راه والله ولد مرا ل كنت ليه
سهام:: وا مالك تنقزي غي هضر عادي حيت قالي الى معندها حد ف حياتها نعرفها على صاحبي و الى تفاهمو راه ناوي المعقول
غزلان:: حلفي يا فرحي يا سعدي نبيل بغا يتزوج و ايمان يا ختي لبارح هضرت معاه (كوتر يعني) ف فيس مقالي والو على زواج

سهام:: نتي والله الى ناقصلك شي بولون ف دماغك اشمن نبيل بقاي معايا بلا مطيري و تمشي بعيد راه عبدو هضر على واحد اخر صاحبو ماشي نبيل
غزلان:: عارفة معندي زهر تفوو مالي انا وا مالي انا مالي انا و معندي زهر ايااه
سهام:: كتغني عاد هبيلة هبيلة فينيي
غزلان:: اوااا طلقينا لفراجة نتي اش جاوبتيه ياك ما قلتيلو اه نعرفوها عليه نقتلك ب هاد الموس لي ف يدي
سهام:: الهبيلة بعدي لموس غا تخشيهلي ف عيني وا لاا انا قتلو هي عاجبها واحد اخر و من صحابك مين شتو دصر و جبد معايا موضوع زواج و صاحبو جيتو كود كيما قلتيلي
غزلان:: ناري على دمدودة جيتيه فاااص انا فين ندير وجهي منو دابا زيدي زيدي
سهام:: تييي شنيولة قرحتيني و هاد لقرصة اييي يدييي
غزلان:: كملي ولا نزيدك ختها
سهام:: صافي صافي حيدي يديك هاني نكمل مهم جيتو نيشان قتلو عرفها على نبيل بقا بضحك ف الاول و قالي مكنعرفوش مزيان بلاه تلاقينا ف واحد عيد ميلاد كنت معروض ليه و تما عرفني عليه صاحبي صدق كيخدم ف نفس دومين ديالي و بقينا هضرة تجبد هضرة و تبادلنا نوامر و فيس و كنهضرو دابا غ ف الخدمة سي تو يعني ماشي ديك صحبة لي تخليني نجبد معاه هاد لموضوع و اصلا كان ف عيد ميلاد معاه بنت باين حبيبتو و كيبغيها حيت طريقتو معاها ف تعامل باين مزعوط فيها بالبيان
غزلان:: ومالك كتقوليها و فرحانا متعرفيش ديري مونتاج لهاد لهضور لي يجيبو سخفة تفوو لي شافو يعرفو يبغي ديك طفيريطة بصح والله لا خليتولها تفرح بيه نبيل طول ولا قصر زمان ليا ليا اناا
سهام؛: دابا خلينا من هضرة خاوية و اجيني لمعقول و مفاجئة تراااا
غزلان:: شنو شنو شي حاجة زينة شنو ايمان و نبيل تفارقو
سهام:: ماشي ل هاد درجة متزيديش فيه ولاكن حاجة زوينة قالي عبدو كاين رحلة ل شمال فيها سيمانة منضمها شي صاحبهم و غنمشي انا و عبدو و غيكون فيها حتى نبيل و هادي فرصة ديالك باش تخليه يشوفك و تقربي ليه حيت تسفيرة غيكون فيها ناس قلال و غنكونو ديما مجموعين و فيها العاب و حوايج زوينة يلاه ورينا شطارتك و فهامات ديالك
غزلان:: هاتيلي داك الحنك نبوسو يا سوسوووو سيري كيما فرحتيني بغيتك تولدي بنت زينة و فنة و هبيلة بحالي و تكبر و تشبهلي وتهبلك تكملك على داك شوية عقل لي خليتولك هههه
سهام:: الله يخليك ديما فرحانة و ناشطة و نشوفك فوق العمارية نتي و نبيل ان شاء الله الله يجعلو من نصيبك
غزلان:: ناري جدااا جات والايني خطيرة مع راسك كتعرفي دعي بحال جدا و مخياني ديما محنا و غادية نطلب منها دعي معايا و نتي حدايا مفيك ربح ولاكن فرحتيني يا حليلي وا اخيرا غادي نشوف نبيل و نهضر معاه و نن.. ولاكن سهام ماما و بابا نسيتهم مغاديش يبغيو يخليوني نسافر مستحيييل ناري لاااا ميمكنش نضيع هاد الفرصة ذهبية

سهام:: متخافيش ماما موجودة غادي تبقا تابعا ماماك و باباك حتى يوافقو واصلا انا غادية هوما عارفيني و كيتيقو فيا مغديش يرفضو متخفيش
(خالتي ام سهام بقات مع ماما حتى وافقت و ماما قنعات بابا نسافر مع سهام حيت هي كبيرة و عاقلة و مخطوبة و كنعرفوهوم مزيان ورحلة مولاها باين لي منضمها عندو اجونس د فواياج ومعروف يعني معندهم مناش يخافو ... انا طايرة من الفرحة وكنوجد فاليز ديالي و ختكم محيحا و طالقا جنات و كنغني معاها وعايشة لحضة وجيالك بشوق الدنيا جيالك واحشنى ونفسى اقولهالك
حبيبى فى قلبى شيلالك غرام ميجيش على بالك ونويالك سنين العمر اعيشهالك حبيبى انا روحى رايحالك
ناري كتحمقني جنات غدا غدا يوم جديد و فيه سوف ارى الحبيب و نسافر معا ف نفس الكار ناري خليوني نوجد فاليزتي حتى الغدا و نتلقاو حدا الكار )

غزلان::الو فيقي مشاا لحاال يلاه غايمشي علينا الكار
سهام::وااا مامااا عتقنييي :'( وا غزلان الله يهديك مزاال لحال. شوفي شحال ف ساعة را شيفور لي غيدينا تلقايه مزال مففاق
غزلان:: يلااه فيقي الكسولة هادا هو الوقت يلاه باش تفطري و تلبسي و تقادي راسك ومتنسايش لمكياج ههه
سهام:: واش مسطية نتي غانوجد راسي ف 4 سوايع مالي انا غاديا القمر
غزلان:: وايااه ليوم انا لي غادي نشوف القمر و نكلس معاه يا حليلي ختك راني طايرة
سهام:: واتي طايرة وانا مالي طيريلي نعاس اش ذنبي رجعي احبيبة نعسي مزال ساعة 6 دصباح وحنا حتى 10 عاد نتحركو يلاح تلاحي
غزلان:: وا فيقي اشمن نعاس اويكي انا الو الوو قطعتي عليا واخا عليك .. اوا هي نوض نوجد راسي نصلي لول و نشوف اش ندير..
(اصلا منعستش ليل كامل وانا نستنى امتى يجي هاد صباح مسكينة سهام لي ديما واكلة ضربة معايا فيقتها على بوصبيح اوا معذورة اناا خفت يمشي عليا الكار هههه يلاه راها 9.30 انا خارجة دابا نفوت عند سهام باش نمشيو فين تافقنا نتلقاو..)
سهام:: غيزو شوفي شكون جاي
عبدو:: ههه غزلان راك طايحة طيحة لي ما بعدها طيحة
غزلان:: ويكي انا سكتو حشمتوني
عبدو:: صبري نعيطلو يجي و نعرفك عليه

يتبع بعض لحضات